កម្ពុជាបញ្ជូនយោធា១៥២នាក់ ទៅបំពេញបេសកម្មសន្តិភាពនៅសូដង់ខាងត្បូង
កម្ពុជាបានបញ្ជូនយោធារបស់ខ្លួនចំនួន១៥២នាក់បន្ថែមទៀត នៅថ្ងៃសៅរិ៍នេះ ដើម្បីចេញទៅបំពេញបេសកម្មរក្សាសន្តិភាពនៅប្រទេសស៊ូដង់ខាងត្បូង។ យោធាកម្ពុជា ដែលស្ថិតនៅក្រោមឆ័ត្ររបស់អង្គការសហប្រជាជាតិទាំង១៥២នាក់នេះ នឹងទៅជំនួសយោធាកម្ពុជា ក្រុមចាស់ដែលត្រូវបញ្ចប់បេសកម្មនាថ្ងៃខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
កងទ័ពកម្ពុជាទាំង១៥២នាក់នេះ មកពីកំលាំងកងរាជអាវុធហត្ថចំនួន៧៣នាក់ និងក្រុមគ្រូពេទ្យកំរិត២ចំនួន៧៩នាក់ នឹងត្រូវធ្វើការលើជំនាញខុសៗគ្នា ស្របទៅតាមគោលការណ៍របស់អង្គការសហប្រជាជាតិ។
ក្រុមនេះ នឹងមានតួនាទីជាទីប្រឹក្សាបច្ចេកទេសដល់គ្រប់ផ្នែកជំនាញ ធ្វើជាគណៈកម្មការក្រុមប្រឹក្សាវិន័យផ្ទៃក្នុង ដោយចូលរួមរៀបចំតាក់តែងបទបញ្ជាផ្ទៃក្នុងសម្រាប់កងឯកភាព និងចូលរួមសម្រេចនូវការដាក់ទណ្ឌកម្មដល់យោធិនដែលប្រព្រឹត្តខុស ដោយផ្នែកលើបទដ្ឋានបច្ចេកទេស (SOP) ស្របតាមតម្រូវការរបស់អង្គការសហប្រជាជាតិ (អ.ស.ប.) និងតំបន់បេសកកម្មជាក់ស្តែង។ នេះបើតាមការបញ្ជាក់ពីលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជាដែលបានជូនដំណើរកងទ័ពកម្ពុជា នៅព្រឹកថ្ងៃសៅរិ៍ទី១៧ឧសភានេះ។ លោក ទៀ បាញ់ បានថ្លែងថា ”កងទ័ពកម្ពុជា ត្រៀមខ្លួនជានិច្ច ដើម្បីទទួលយកការងារក្នុងតំបន់ឲ្យស្របទៅតាមរបៀបរបបនៃអង្គការសហប្រជាជាតិ។
ប្រទេសកម្ពុជាគឺជាប្រទេសមួយ ដែលបានពឹកផ្អែកអង្គការសហប្រជាជាតិ កាលពី២២ឆ្នាំមុន បន្ទាប់ពីប្រទេសនេះមាន សង្គ្រាមផ្ទៃ ក្នុងដ៏រ៉ាំរ៉ៃរបស់ខ្លួនជាង៣០ឆ្នាំកន្លងទៅ តែបច្ចុប្បន្ននេះ កម្ពុជាបានប្រែក្លាយជាប្រទេសដែលបញ្ជូនទាហានរបស់ខ្លួន ទៅបំពេញបេកកម្មនៅក្រៅប្រទេសក្រោមឆ័ត្ររបស់អង្គការសហប្រជាជាតិទៅវិញ។
អ្នកសម្របសម្រួលរបស់អង្គការសហប្រជាជាតិប្រចាំនៅកម្ពុជា អ្នកស្រី Claire Van Der Vaeren បានមានប្រសាសន៍ក្នុងពេលជូនដំណើរយោធាកម្ពុជាកាលពីព្រឹកថ្ងៃសៅរិ៍ដែរថា ”បេសកជនរបស់ យោធាកម្ពុជាទាំងអស់ នឹងក្លាយទៅជាគ្រួសារតែមួយ របស់អង្គការសហប្រជាជាតិ ដោយពួកគេនឹងពាក់មួកខៀវ មានស្លាកសញ្ញា UN។
ចាប់តាំងពីឆ្នាំ២០០៦មករហូតមកដល់ពេលបច្ចុប្បន្ននេះ កម្ពុជាបានបញ្ជូនកងកម្លាំងមួកខៀវចំនួន ២.១១០ នាក់ហើយ ទៅចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិ ដូចជា ប្រទេសស៊ីរី, ឆាដ, ស៊ូដង់, ស៊ូដង់ខាងត្បូង, ម៉ាលី, អាហ្វ្រិកកណ្តាល និងប្រទេសលីបង់ជាដើម។ ការបំពេញបេសកម្មរបស់យោធាកម្ពុជានៅក្រៅប្រទេស គឺផ្អែកលើជំនាញបី ទី១ជំនាញដោះមីន ជំនាញពេទ្យ និងជំនាញវិស្វកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ