កម្ពុជាបញ្ជូនកងទ័ពជាង៣០០នាក់ទៅបំពេញបេសកកម្មមនុស្សធម៌និងរក្សាសន្តិភាពនៅប្រទេសម៉ាលី
កងទ័ពផ្នែកវិស្វកម្មនិងកងកម្លាំងដោះមីនកម្ទេចគ្រឿងផ្ទុះសរុប៣០៩នាក់ត្រូវបានរដ្ឋាភិបាលកម្ពុជាបញ្ជូនទៅបំពេញបេសកកម្មមនុស្សធម៌ និងរក្សាសន្តិភាពនៅក្នុងប្រទេស ម៉ាលី។ កងទ័ពកម្ពុជា ដែលស្ថិតក្រោមឆ័ត្រអង្គការសហប្រជាជាតិ ទាំង ៣០៩ នាក់ បានចេញដំណើរជាបន្តបន្ទាប់ទៅកាន់ប្រទេសម៉ាលី ចាប់តាំងពីថ្ងៃទី១៣កុម្ភៈ ហើយក្រុមចុងក្រោយ នឹងចេញទៅ នៅថ្ងៃទី១១មីនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ពិធីបញ្ជូនកងកម្លាំងវិស្វកម្ម និងដោះមីន កម្ទេចគ្រឿងផ្ទុះ របស់កងទ័ពកម្ពុជា ទៅកាន់ប្រទេសម៉ាលី បានធ្វើឡើង កាលពីព្រឹកថ្ងៃទី២៧កុម្ភៈ។ ជាក្រុមទី២ ដែលមានចំនួន ៧៤ នាក់ ក្នុងចំណោមកងទ័ពមួកខៀវកម្ពុជាសរុប ៣០៩ នាក់ ដែលត្រូវទៅបំពេញបេសកកម្ម មនុស្សធម៌ ក្រោមស្លាកអង្គការសហប្រជាជាតិ UN នៅប្រទេសម៉ាលី។
ជាលើកទី១ហើយ ដែលកម្ពុជា បានបញ្ជូនកងកម្លាំងទ្រង់ទ្រាយធំ រហូតដល់ទៅ ៣០៩ នាក់ ដើម្បីចូលរួមក្នុងបេសកកម្មរួមគ្នាជាមួយអង្គការសហប្រជាជាតិ ដើម្បីថែរក្សាស្ថិរភាពក្នុងប្រទេសម៉ាលី។ នេះបើតាមលោក សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្គ្រាម។
តាមលោកនាយឧត្តមសេនីយ៍ សែម សុវណ្ណនី កងកម្លាំងមួកខៀវកម្ពុជា ទៅកាន់ប្រទេសម៉ាលី លើកនេះ ត្រូវបានបញ្ជូនទៅបំពេញបេសកកម្ម ជាមួយនឹងការបំពាក់ដោយឧបករណ៍ មធ្យោបាយ និងសម្ភារៈជាច្រើន ស្របតាមនិយាមការរបស់អង្គការសហប្រជាជាតិ។
តាមកម្មវិធី កងទ័ពកម្ពុជាទាំង ៣០៩ នាក់ ត្រូវបញ្ជូនចេញទៅកាន់ប្រទេសម៉ាលីជា ៤ ដំណាក់កាល។ លើកទី១ បានធ្វើឡើង កាលពីថ្ងៃទី១៣កុម្ភៈ មានចំនួន ៣ នាក់។ លើកទី២ នៅថ្ងៃទី២៧ ខែកុម្ភៈ ឆ្នាំ២០១៤ ចំនួន ៧៤ នាក់។ លើកទី៣ នឹងធ្វើឡើងនៅថ្ងៃទី១ ខែមីនា ចំនួន ៣០នាក់ និងលើកទី៤ នឹងធ្វើឡើង នៅថ្ងៃទី ១១ ខែមីនា ឆ្នាំ២០១៤ ចំនួន ២០២ នាក់។
ចាប់តាំងពីឆ្នាំ២០០៦ កងទ័ពកម្ពុជារាប់ពាន់នាក់ ត្រូវបានបញ្ជូនទៅបំពេញបេសកកម្មមនុស្សធម៌ ដើម្បីថែរក្សាសន្តិភាព ក្រោមស្លាកអង្គការសហប្រជាជាតិ លើផ្នែកបោសសម្អាតមីន ផ្នែកសង្កេតការណ៍យោធា ផ្នែកវិស្វកម្មធ្វើផ្លូវស្ពាន និងផ្នែកថែរក្សាសណ្តាប់ធ្នាប់ នៅប្រទេសស៊ូដង់ខាងត្បូង ប្រទេសឆាត ប្រទេសអាហ្វ្រិចកណ្តាល ប្រទេសលីបង់ និងចុងក្រោយនៅប្រទេសម៉ាលី។ បេសកកម្មទាំងនោះ ក្នុងមួយក្រុមៗ មានអាណត្តិរយៈពេល ១ ឆ្នាំ ហើយត្រូវផ្លាស់ប្តូរក្រុមថ្មី ទៅជំនួស ជាបន្តបន្ទាប់។
តំណាងអង្គការសហប្រជាជាតិ ប្រចាំកម្ពុជា បានសរសើដល់កងទ័ពកម្ពុជា នៅក្នុងសកម្មភាព ថែរក្សាសន្តិភាព ដែលបាននាំមកនូវកិត្តិយសដ៏ធំធេង ជូនដល់ប្រទេសជាតិមាតុភូមិកម្ពុជា។ កម្ពុជា ជាប្រទេសមួយ មានការយល់ច្បាស់ និងស្រឡាញ់សន្តិភាព សន្តិសុខ និងសាមគ្គីភាព សម្រាប់ប្រជាជននៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ