កងទ័ពមួកខៀវកម្ពុជា១៥២នាក់ផ្លាស់វេនទៅបំពេញបេសកកម្មរក្សាសន្តិភាពនៅស៊ូដង់ខាងត្បូង
កាលពីព្រឹកថ្ងៃព្រហស្បតិ៍នេះកងទ័ពមួកខៀវកម្ពុជា ចំនួន ១៥២ នាក់បានចេញដំណើរទៅបំពេញបេសកកម្មថែរក្សាសន្តិភាពក្រោមឆ័ត្រអង្គការសហប្រជាជាតិនៅប្រទេសស៊ូដង់ខាងត្បូង។ កងទ័ពកម្ពុជាទាំងនោះ ជាកងអាវុធហត្ថនិងពេទ្យទាហានដើម្បីទៅបំពេញបេសកកម្ម ជាកងសុខាភិបាលនិងកងរក្សាសណ្តាប់ធ្នាប់នៅប្រទេសស៊ូដង់ខាងត្បូងជំនួសក្រុមចាស់ ដែលបានបញ្ចប់បេសកកម្មរយៈពេល១ឆ្នាំហើយនឹងមកដល់ភ្នំពេញវិញនៅថ្ងៃទី៦មេសា។ គិតចាប់ពីឆ្នាំ២០០៦ មកដល់ពេលនេះ កងទ័ពកម្ពុជា សរុបប្រមាណ ១៦០០ នាក់ បាន និងកំពុងបំពេញបេសកកម្ម ជាទាហានមួកខៀវរបស់អង្គការសហប្រជាជាតិ នៅប្រទេសស៊ូដង់ ប្រទេសឆាត អាហ្វ្រិកកណ្តាល លីបង់ និងប្រទេសស៊ីរី លើផ្នែកបោសសំអាតមីន ផ្នែកសង្កេតការណ៍យោធា វិស្វកម្មធ្វើផ្លូវស្ពាន និងផ្នែកថែរក្សាសណ្តាប់ធ្នាប់ ជាដើម។
ចុះផ្សាយនៅថ្ងៃ៖
ស្តាប់ - ០២:៥៨
ពិធីជូនដំណើរកងទ័ពកម្ពុជា ១៥២ នាក់ ក្នុងនាមជាទាហានមួកខៀវអង្គការសហប្រជាជាតិ ដើម្បីថែរក្សាសន្តិភាព នៅប្រទេសស៊ូដង់ខាងត្បូង បានធ្វើឡើង កាលពីព្រឹកថ្ងៃទី៤ ខែមេសា ឆ្នាំ២០១៣ នៅព្រលានយន្តហោះកងទ័ពអាកាសពោធិចិនតុង ដោយមានការចូលរួមពីលោក ទៀ បាញ់ រដ្ឋមន្ត្រីក្រសួងការពារជាតិ និងតំណាងអង្គការសហប្រជាជាតិ ប្រចាំកម្ពុជា។
កងទ័ពមួកខៀវកម្ពុជាទាំង ១៥២ នាក់ ដែលត្រូវចេញទៅបំពេញបេសកកម្មថែរក្សាសន្តិភាព របស់អង្គការសហប្រជាជាតិ នៅប្រទេសស៊ូដង់ខាងត្បូង រួមមាន កងអាវុធហត្ថ លេខ ៧១១ និងពេទ្យកម្រិត ២ លេខ ៨០៨។ ក្នុងនោះ មានស្ត្រី ១០ នាក់។
ក្រុមកងទ័ពកម្ពុជាទាំង ១៥២ នាក់នេះ ត្រូវទៅផ្លាស់វេនកងអាវុធហត្ថលេខ ៧០២ និងពេទ្យកម្រិត២ លេខ ៨០១ ដែលបានបញ្ចប់បេសកកម្មរក្សាសន្តិភាព របស់អង្គការសហប្រជាជាតិ រយៈពេល ១ ឆ្នាំ នៅប្រទេស៊ូដង់ខាងត្បូង។ ក្រុមចាស់នោះ នឹងមកដល់ភ្នំពេញ នៅថ្ងៃទី៦ ខែមេសា ឆ្នាំ២០១៣។
ក្នុងពិធីជូនដំណើរកងទ័ពកម្ពុជា ទៅបំពេញបេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ នៅព្រឹកថ្ងៃទី៤ ខែមេសា ឆ្នាំ២០១៣ រដ្ឋមន្ត្រីការពារជាតិលោក ទៀ បាញ់ បានលើកឡើងថា កងយោធពលខេមរភូមិន្ទកម្ពុជា ត្រូវបានហ្វឹកហាត់ត្រឹមត្រូវ ដើម្បីបំពេញបេសកកម្មរក្សាសន្តិភាពនៅក្រៅប្រទេស។
លោករដ្ឋមន្ត្រី ក៏បានផ្តាំផ្ញើឲ្យកងទ័ពកម្ពុជា ប្រកាន់ខ្ជាប់គោលការណ៍មនុស្សធម៌ ដើម្បីលើកតម្កើងកិត្តិនាមរបស់កម្ពុជា លើឆាកអន្តរជាតិ។ កងទ័ពមួកខៀវកម្ពុជានេះហើយ ដែលលោក ទៀ បាញ់ ចាត់ទុកថា ជានាយទាហានការទូត របស់កម្ពុជា នៅលើឆាកអន្តរជាតិ។
ចំណែកតំណាងអង្គការសហប្រជាជាតិក៏បានកោតសសើរចំពោះយោធាកម្ពុជា។ កម្ពុជា ដែលក្នុងក្រសែភ្នែករបស់អង្គការសហប្រជាជាតិ ចាត់ទុកថា ជាប្រទេសមួយ បានធ្វើពលិកម្ម ដើម្បីឲ្យមានសន្តិភាព សន្តិសុខ និងមិត្តភាព។ ម្យ៉ាងទៀតតាមរយៈការចូលរួមចំណែកក្នុងបេសកកម្មថែរក្សាសន្តិភាពរបស់អង្គការសហប្រជាជាតិនេះ ប្រទេសកម្ពុជា តែងតែឈរជាគំរូមួយ សម្រាប់ពិភពលោក។
មកដល់ពេលនេះ អង្គការសហប្រជាជាតិមានបុគ្គលិក មិនតិចជាង ១២០.០០០ នាក់ទេ ដែលមកពី ១១៤ប្រទេសកំពុងបម្រើការងារលើផ្នែកប្រតិបត្តិការរក្សាសន្តិភាព១៥ជំនាញ។ចំណែកកម្ពុជាវិញ ចាប់តាំងពីឆ្នាំ២០០៦ បានបញ្ជូនកងទ័ព ទៅបំពេញបេសកកម្មថែរក្សាសន្តិភាព របស់អង្គការសហប្រជាជាតិ នៅប្រទេសស៊ូដង់ ខាងត្បូងប្រទេសឆាត ប្រទេសអាហ្វ្រិកកណ្តាលប្រទេសលីបង់ និងប្រទេសស៊ីរី។
កងកម្លាំងយោធាកម្ពុជា សរុប ១.៦០២ នាក់ បាន និងកំពុង បំពេញបេសកកម្ម ជាកងទាហានមួកខៀវរបស់អង្គការសហប្រជាជាតិ ផ្នែកបោសសំអាតមីន ផ្នែកសង្កេតការណ៍យោធា ផ្នែកវិស្វកម្មធ្វើផ្លូវស្ពាន និងផ្នែកថែរក្សាសណ្តាប់ធ្នាប់ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ