សសរស្តម្ភ២នៃព្រះរាជាណាចក្រកម្ពុជាកំពុងប្រេះស្រាំ
ចុះផ្សាយនៅថ្ងៃ៖
ស្តាប់ - ០៣:៥៣
បាវចនាជាតិរបស់ព្រះរាជាណាចក្រកម្ពុជាគឺ ជាតិ សាសនា ព្រះមហាក្សត្រ។ ក្នុងពេលបច្ចុប្បន្ននេះ ពាក្យ២ គឺជាតិ និងសាសនា ហាក់ដូចជាកំពុងតែទទួលរងនូវភាពប្រេះស្រាំ។ គណបក្សនយោបាយជាប់ឆ្នោតទាំងពីគ្មានពន្លឺនៃការដោះស្រាយបញ្ចប់ទំនាស់នយោបាយឡើយ។ ដោយមានឥទ្ធិពលពីនយោបាយវិស័យសាសនារបស់រដ្ឋក៏បានបង្ហាញទិដ្ឋភាពប្រេះឆាជាអន្លើៗដែរ។ ប្រសិនបើ បាវចនាជាតិ ដែលមានពាក្យទាំង៣ជាទម្រនៃព្រះរាជាណាចក្រកម្ពុជាមែននោះ គេមិនគួរអោយមានពាក្យណាមួយ ត្រូវប្រេះស្រាំឡើយ ដើម្បីធ្វើជាចន្ទល់រឹងមាំរបស់ព្រះរាជណាចក្រកម្ពុជា។
មាត្រា៤នៃរដ្ឋធម្មនុញ្ញរបស់កម្ពុជាចែងពីបាវចនារបស់ព្រះរាជណាចក្រកម្ពុជា។ បាវចនាជាតិកម្ពុជា គឺជាតិ សាសនា ព្រះមហាក្សត្រ។ ពាក្យទាំងបីដែលត្រូវបានគេសរសេរនៅក្រោមពាក្យព្រះរាជាណាចក្រកម្ពុជា ប្រៀបបាននឹងសសរស្តម្ភបី ដែលជាទម្រទល់ជ្រោងឡើងលើ ព្រះរាជាណាចក្រកម្ពុជាអីចឹងដែរ។
ប្រសិនបើ ពាក្យទាំងបី គឺជាចន្ទល់ទ្រព្រះរាជាណាចក្រកម្ពុជាមែននោះ ចន្ទល់ទាំង៣នេះ ត្រូវតែជាចន្ទល់ដ៏រឹងមាំ មិនរំខានដោយភាពប្រេះស្រាំឡើយ។
ប៉ុន្តែ អ្វីទៅជាទិដ្ឋភាពជាក់ស្តែង ក្នុងចំណោមសសរស្តម្ភទាំង៣ សសរស្តម្ភជាតិ និងសសរស្តម្ភសាសនាតែងតែងប្រឈមនឹងបញ្ហាមិនចេះដាច់។
ក្រឡេកមើលសសរស្តម្ភជាតិមុន។ ស្ថានភាពនយោបាយនៅកម្ពុជានៅតែស្ថិតក្នុងសភាពផុយស្រួយគ្រប់ពេលវេលា ពិសេសនៅក្រោយពេលបោះឆ្នោត។ បោះឆ្នោត៥លើកហើយ តើមានម្តងណា ដែលគ្មានបញ្ហាទំនាស់នយោបាយ ធ្វើអោយអ្នកបោះឆ្នោត និងពលរដ្ឋទាំងមូលបារម្ភនោះ? បោះឆ្នោតនីតិកាលទី៥នេះ ខណៈដែលសំឡេងគណបក្សប្រឆាំងឡើងខ្លាំងប្រហាក់ប្រហែលនឹងគណបក្សប្រជាជនកម្ពុជាដែលកាន់អំណាចជារៀងរហូតមកនោះ វាបានធ្វើអោយទំនាស់នយោបាយកាន់តែអូសបន្លាយយូរពេល ហើយក៏គ្មានពន្លឺនៃដំណោះស្រាយឡើយរហូតដល់ពេលនេះ។
មិនមែនជាការបែកបាក់ជាតិនៅឡើយទេ វាគ្រាន់តែជាទំនាស់ផ្នែកនយោបាយតែប៉ុណ្ណោះ។ ប៉ុន្តែ តាំងពីក្រោយថ្ងៃបោះឆ្នោតថ្ងៃទី២៨កក្កដាមក ទំនាស់នេះបានបង្កអោយមានហិង្សាជាច្រើនលើក និងបានធ្វើអោយមានមនុស្សស្លាប់ និងរបួសមិនតិចនាក់ដែរ។ បើទោះជាមិនទាន់បាក់បែក គ្រាន់តែជាទំនាស់ ប៉ុន្តែជាទំនាស់ដែលនៅត្រាំត្រែងយូរខែដែលបានផ្តល់ឱកាសអោយអ្នកគាំទ្រនៃគណបក្សជាប់ឆ្នោតទាំងពីរចិញ្ចឹមចិត្ត ពង្រីកគំនុំគុំកួនទៅលើគ្នាទៅវិញមក។ មិនទាន់ជាការបាក់បែកប៉ុន្តែ កងកម្លាំងប្រដាប់អាវុធរបស់រដ្ឋាភិបាលដែលដឹកនាំដោយគណបក្សប្រជាជនកម្ពុជា បានបន្តសិ្ថតនៅក្នុងស្ថានភាពប្រកាសអាសន្នជានិរន្ត ខណៈមេដឹកនាំគណបក្សបសង្គ្រោះជាតិនៅបន្តអំពាវនាវអោយអ្នកគាំទ្រនៅតាមខេត្តចូលរួមធ្វើបាតុកម្មទាមទាររកយុត្តិធម៌នៃការបោះឆ្នោត។ បើទំនាស់ប្រឆាំងគ្នានៅតែបន្ត ហើយគំលាតនៃការចរចាដោះស្រាយទំនាស់នៅធំនៅឡើយ ដូចលោកនាយករដ្ឋមន្ត្រីហ៊ុន សែនបានប្រកាសអោយដឹងជាសាធារណៈនោះ តើពេលណា ទំនាស់ ឬភាពប្រេះស្រាំនៃសរសេរស្តម្ភជាតិ នឹងត្រូវបានផ្សះផ្សារអោយរឹងមាំឡើងវិញ?
និយាយអំពីសសរស្តម្ភសាសនាម្តង។ តាមពិតបញ្ហាសាសនា គឺជាបញ្ហាដ៏រសើបបំផុត មិនថានៅក្នុងប្រទេសណានោះទេ ដែលមិនគួរអោយមានទំនាស់។ នៅកម្ពុជា ចុងក្រោយនេះ តាមរយៈផ្លូវនយោបាយ គេឃើញមានព្រះសង្ឃបាននិមន្តចេញមកធ្វើសកម្មភាពនយោបាយ ហើយក៏បានថ្លែងរិះគន់ថ្នាក់ដឹកនាំសង្ឃ និងបានចោទប្រកាន់គ្នាទៅវិញទៅមកអំពីការប្រកាន់បក្សនយោបាយរៀងៗខ្លួន។ នេះនិយាយអំពីព្រះសង្ឃនឹងការប្រកាន់និន្នាការនយោបាយ។ នៅក្នុងជីវភាពប្រចាំថ្ងៃ សកម្មភាពរបស់ព្រះសង្ឃមួយចំនួនដែលសំដែងអោយឃើញអំពីសំភារៈនិយមក៏បានធ្វើអោយពុទ្ធបរិស័ទអស់ជំនឿ។ ចំនុចអសកម្មនៃព្រះសង្ឃអង្គខ្លះដែលត្រូវបានសមត្ថកិច្ចចាប់ឃាត់ខ្លួនដោយការប្រព្រឹត្តិល្មើសនានានោះ ក៏បានធ្វើអោយបាត់បង់ការគោរពពីពុទ្ធបរិស័ទដែរ។ ចោរកម្មព្រះសារីរិកធាតុ និងព្រះពុទ្ធបដិមាវាជាបទល្មើសមួយមែន ប៉ុន្តែវាក៏ឆ្លុះបញ្ចាំងអំពីការមិនខ្លបខ្លាច គោរពសាសនាព្រះពុទ្ធដែលជាសាសនារបស់រដ្ឋដែរ។
និយាយសរុបមកវិញ ជាតិ និងសាសនា ដែលស្ថិតនៅក្នុងបាវចនាជាតិនោះ ហាក់មិនបានបង្ហាញអំពីភាពរឹងមាំនោះឡើយ តែគឺមានតែបញ្ហាចាក់ស្រែះ។ ដូច្នេះ ចាប់ពីពេលនេះទៅ អ្នកនយោបាយ និងប្រជាពលខ្មែរគួរងាកមករកសាមគ្គីភាព ផ្សះផ្សារ ជួសជុលភាពប្រេះស្រាំនៃជាតិ និងសាសនាអោយបានរឹងមាំឡើងវិញ រួមជាមួយព្រះមហាក្សត្រ ដើម្បីធ្វើជាបាវចនាដ៏មានសក្តានុពល ទ្រព្រះរាជាណាចក្រកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ