ទស្សនៈដាច់ខាតរបស់ពលរដ្ឋ ធ្វើអោយកម្ពុជាប្រឈមនឹងការបែកបាក់
ចុះផ្សាយនៅថ្ងៃ៖
ស្តាប់ - ០៤:៤៧
បច្ចុប្បន្ននេះ គេបានឃើញហើយ ការប្រឈមមុខដាក់គ្នារវាងមេដឹកនាំនៃគណបក្សកាន់អំណាច និងមេដឹកនាំគណបក្សប្រឆាំង។ នេះគឺជាការប្រកួតប្រជែងនយោបាយ ដើម្បីឈានទៅរកអំណាច ដែល ដែលជាញឹកញាប់វាបានធ្វើអោយកម្ពុជាធ្លាក់ក្នុងវិបត្តិ។ ប៉ុន្តែលើសពីនេះ ហើយជាអ្វីដែលអាចកាន់តែគ្រោះថ្នាក់នោះ គឺទំនាស់ផ្នែកគំនិតរបស់ក្រុមអ្នកគាំទ្រនៃគណបក្សនយោបាយនិមួយៗ។ អ្នកគាំទ្រគណបក្សនយោបាយបានបង្ហាញជំហរដាច់ខាតរៀងៗខ្លួន ពោលគឺអ្នកដែលនិយាយផ្ទុយពីខ្លួន គឺជាសត្រូវ គឺជាអ្នកប្រឆាំងនឹងខ្លួនតែម្តង។ ការប្រកាន់ជំហរជ្រុលនិយមនេះ នឹងធ្វើអោយសង្គមកម្ពុជាជួបនឹងការប្រេះឆា កាន់តែជ្រៅ។
តាំងពីការចាប់ផ្តើមនៃសម័យព្រះរាជាណាចក្រកម្ពុជាទី២មក ពោលគឺជាការចាប់ផ្តើមនៃរបបសេរីពហុបក្សដែលអនុញ្ញាតអោយប្រជាពលរដ្ឋអនុវត្តសិទ្ធនយោបាយរបស់ខ្លួននោះ ពលរដ្ឋកម្ពុជាក៏ចាប់ផ្តើមប្រកាន់បក្សនយោបាយរៀងៗខ្លួន។ ដោយសារតែភាពថ្មីថ្មោងនៃលទ្ធិប្រជាធិបតេយ្យ និងការអប់រំនៅទាប បញ្ហាសង្គមមួយបានកើតឡើង គឺការបែកបាក់សាមគ្គីភាព។ មិត្តភក្រក្លាយជាសត្រូវ ប្តីប្រពន្ធ និងក្រុមគ្រួសារក៏ឈ្លោះបែកបាក់គ្នា។ គេនៅចាំបានថា អំពើហិង្សាក៏បានកើតមានច្រើនករណីទៀតផង ដោយសារតែការប្រកាន់និន្នាការផ្ទុយគ្នានោះ។
ពេលនោះគណបក្សនយោបាយធំមាន៣ គឺគណបក្សប្រជាជនកម្ពុជា និងគណបក្សហ៊្វុនស៊ីនប៉ិចដែលធ្វើជាគណបក្សកាន់អំណាច ក្នុងរដ្ឋាភិបាលចម្រុះ និងគណបក្សប្រឆាំងគឺជាគណបក្សសម រង្ស៊ី។ គណបក្សទាំង៣សុទ្ធតែមានបណ្តាញសារព័ត៌មានរបស់ខ្លួន។
ពលរដ្ឋខ្មែរ អ្នកដែលគាំទ្រគណបក្សណា អានតែសារព័ត៌មានរបស់គណបក្សនោះ។ សារព័ត៌មានទាំងនោះ តែងតែនិយាយល្អ លើកដំកើងមេដឹកនាំគណបក្សដែលខ្លួនគាំទ្រ និងបន្តុះបង្អាប់ រិះគន់ ជេរប្រមាថ មេដឹកនាំគណបក្សដទៃ។ គេបានកត់សម្គាល់ថា អ្នកអានសារព័ត៌មានតែងតែគាំទ្រ និងជឿទាំងស្រុងទៅតាមការចុះផ្សាយរបស់សារព័ត៌មាននិមួយៗរបស់គណបក្សដែលខ្លួនស្រឡាញ់ ហើយរួមផ្សំនឹងសម្មានចិត្តដែលខ្លួនមានរួចស្រាប់ ចំពោះគណបក្សនោះកំហឹងទៅលើគណបក្សមួយទៀត កាន់តែពុះកញ្ជ្រោល។
អ្នកអានសារព័ត៌មានដែលគាំទ្រគណបក្សកាន់អំណាច កាន់តែស្អប់មេដឹកនាំគណបក្សប្រឆាំង រីឯអ្នកអានសារព័ត៌មាននៃគណបក្សប្រឆាំង កាន់តែខឹងមេដឹកនាំនៃគណបក្សកាន់អំណាច។ គ្រាន់តែថានៅពេលនោះ កំហឹង និងការស្អប់ ត្រូវបានលាក់ទុកក្នុងចិត្ត ហើយគ្មានកន្លែងបញ្ចេញឡើយ។
ទិដ្ឋភាពនិងសកម្មភាពទាំងនេះ តាមពិតទៅ បានកើតឡើងបន្តរហូតដល់សព្វថ្ងៃនេះ។ ហើយវាកំពុងបង្ហាញខ្លួន និងគ្របដណ្តប់នៅតាមបណ្តាញសង្គម ដែលជាកន្លែងសាធារណៈដ៏ទូលំទូលាយទៀតផង។ នៅពេលដែលមានវេទិកាសម្រាប់បញ្ចេញមតិយ៉ាងដូច្នេះទើបគេដឹងថា បាតុភូតនេះ ពិតជាបញ្ហាសង្គមមួយដ៏គួរអោយព្រួយបារម្ភមែនទែន។
នៅលើទីលានបណ្តាញសង្គម ក្រុមអ្នកគាំទ្រគណបក្សផ្សេងគ្នាកំពុងប្រើប្រាស់ពាក្យអសុរស ជេរប្រមាថគ្នាយ៉ាងពេញទំហឹង ដោយគ្មានក្រែងរអាអ្វីឡើយ។ ពួកគេកាន់តែហ៊ានប្រមាថគ្នាដោយចំហដល់មេដឹកនាំគណបក្សដែលគេមិនពេញចិត្តទៀតផង។ អ្វីដែលគួរអោយព្រួយបារម្ភនោះ គឺជាជំហរជ្រុលនិយម ជំហរដាច់ខាតនិយមនៃពលរដ្ឋអ្នកគាំទ្រគណបក្សនយោបាយ។
ឧទាហរណ៍ ចំពោះអ្នកគាំទ្រគណបក្សប្រជាជនកម្ពុជាកាន់អំណាចវិញ តាមរយៈការបញ្ចេញមតិនៅក្នុងបណ្តាញសង្គមនេះ អ្នកដែលបានកសាងប្រទេសរហូតដល់ថ្ងៃនេះ គឺមានតែមេដឹកនាំគណបក្សប្រជាជនកម្ពុជានោះទេ។ ប៉ុន្តែគឺលោកសម រង្ស៊ី និងលោកកឹម សុខាដែលជាអ្នកបង្កអសន្តិសុខ និងធ្វើនយោបាយប្រជាភិថុត។ ផ្ទុយទៅវិញ ចំពោះអ្នកគាំទ្រគណបក្សសង្គ្រោះជាតិវិញ គ្រប់សកម្មភាពរបស់មេដឹកនាំរបស់ពួកគេ ដែលរិះគន់សុទ្ធតែត្រូវបានផ្សព្វផ្សាយតគ្នា។ គ្រប់ពាក្យពេចន៍អំពាវនាវមេដឹកនាំគណបក្សប្រឆាំងសុទ្ធតែត្រូវបានសាទរ និងចែកផ្សាយដូចគ្នាដែរ។
សម្រាប់អ្នកគាំទ្រទាំងសងខាងនេះ គឺមានតែគណបក្សខ្លួន និងមេដឹកនាំរបស់ខ្លួនទេដែលនិយាយត្រូវ និងធ្វើត្រូវ។ មេដឹកនាំផ្សេង អ្នកអត្ថាធិប្បាយនានាផ្សេងទៀត ប្រសិនបើនិយាយផ្ទុយពីមេដឹកនាំខ្លួននោះ គឺជាអ្នកខុស គឺជាសត្រូវ។ ហើយការរិះគន់ ជេរប្រមាថនៅលើបណ្តាញសង្គម ក៏ត្រូវបានគេធ្វើ និងផ្សព្វផ្សាយភ្លាមដែរ។
ប្រការទាំងនេះកំពុងតែធ្វើអោយកម្ពុជាប្រឈមនឹងបញ្ហាមួយចំនួន។ ទីមួយ នោះគឺទិដ្ឋភាពនៃបែកបាក់ក្នុងសង្គមនេះឯង។ ជាសង្គមបែកបាក់ជាពីរយ៉ាងខ្លាំង ហើយដែលពេលខ្លះ ការបែកបាក់នេះ ត្រូវបានជំរុញ្ដោយប្រព័ន្ធសារព័ត៌មានដែលគាំទ្រគណបក្សនីមួយទៀតផង។ ទីពីរ ការបង្កើនទំហំនៃបែកបាក់នេះហើយ ដែលវាជាការបង្កើនវប្បធម៌នៃការស្អប់គ្នា និងគំនុំសងសឹកនោះនៅក្នុងសង្គមខ្មែរ។ និងទីបី គឺការធ្លាក់ចុះនៃសីលធម៌សង្គម។ ប្រសិនបើគេអាននៅលើទំព័រហ្វ៊េសប៊ុក ពាក្យពេចន៍ជេរប្រមាថគ្នា ទាំងជាវីដេអូ និងការសរសេរនោះ គឹជាពាក្យអសុរសយ៉ាងខ្លាំង។ ពេលខ្លះ រូបថតអ្នកនយោបាយត្រូវបានគេ យកមកប្រើប្រាស់កាត់រូបភាពជាមួយសត្វក៏មានដែរ។ ទាំងអស់នេះ គឺសុទ្ធតែជាបញ្ហាសង្គមដែលគេត្រូវដោះស្រាយ និងកាត់បន្ថយលុបបំបាត់ដើម្បីសន្តិភាព និងសុខដុមរមនាក្នុងសង្គមខ្មែរនោះ។
អ្នកគាំទ្រគណបក្សនយោបាយទាំងអស់គួរប្រកាន់ជំហរទន់ភ្លន់ជាងនេះ មិនដាច់ខាត និងជ្រុលនិយម ដើម្បីផ្តល់ឱកាសអោយខ្លួនឯង អាចមើលឃើញនូវអ្វីដែលជាចំនុចវិជ្ជមានច្រើនពីខាងក្រៅ លើសពីអ្វីដែលខ្លួនបានឃើញនៅក្នុងក្រុមនយោបាយរបស់ខ្លួន។ ធ្វើយ៉ាងនេះបាន នោះគឺជាការរួមចំនែករបស់ពួកគេ ទៅក្នុងការកសាងសង្គមកម្ពុជាអោយមានសន្តិភាព ដូចដែលពួកគេគិតថា គឺមានតែមេដឹកនាំគណបក្សរបស់ពួកគេ ដែលអាចធ្វើកិច្ចការងារនេះបាននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ