ឯកសារប្រមូលពីផ្ទះប៊ិនឡាដិនបង្ហាញពីការបាក់បែកផ្ទៃក្នុងរបស់អាល់កៃដា
ចុះផ្សាយនៅថ្ងៃ៖
ស្តាប់ - ០៤:៥៩
បណ្ឌិតសភាយោធាអាមេរិក (West Point) បានចេញផ្សាយឯកសារមួយចំនួន ដែលកងកុម្ម៉ងដូអាមេរិកប្រមូលបាន ក្នុងអំឡុងប្រតិបត្តិការសម្លាប់ប៊ិនឡាដិន នៅក្នុងប្រទេសប៉ាគីស្ថាន កាលពីថ្ងៃទី២ ឧសភា ឆ្នាំ២០១១។ ឯកសារដែលចេញផ្សាយនេះបង្ហាញឲ្យឃើញអំពីភាពបាក់បែកផ្ទៃក្នុង និងអំពីការថយចុះនៃអំណាចរបស់ប៊ិនឡាដិន ក្នុងអង្គការភេរវកម្មអាល់កៃដា។
ឯកសារដែលកងកុម្ម៉ង់ដូអាមេរិក (Navy SEAL) ប្រមូលបានពីផ្ទះរបស់ប៊ិនឡាដិន កាលពីឆ្នាំទៅមិញ មានរហូតដល់ទៅរាប់ពាន់ទំព័រ។ ក៏ប៉ុន្តែ មានតែប្រមាណ ១៧៥ទំព័រប៉ុណ្ណោះ ដែលត្រូវបានគេចេញផ្សាយជាសាធារណៈ កាលពីថ្ងៃព្រហស្បតិ៍ម្សិលមិញ។
ឯកសារទាំងនេះបង្ហាញឲ្យឃើញថា នៅក្នុងរយៈពេលប៉ុន្មានឆ្នាំមុនពេលស្លាប់ ប៊ិនឡាដិនមិនបានក្តោបក្តាប់អំណាចទាំងស្រុង នៅក្នុងអាល់កៃដា ដូចជាពីពេលមុននោះទេ។ ក្នុងអំឡុងពេលនោះ ប៊ិនឡាដិនស្ថិតនៅតែក្នុងផ្ទះ មើលទូរទស្សន៍ ហើយផ្ញើសារទៅកាន់មេដឹកនាំអាល់កៃដា ដែលនៅក្រោមបង្គាប់ ក៏ប៉ុន្តែ ភាគច្រើនបទបញ្ជារបស់ប៊ិនឡាដិន មិនត្រូវបានគេគោរពតាមនោះទេ។
ប៊ិនឡាដិនបានសម្តែងនូវការមិនសប្បាយចិត្តចំពោះប្រតិបត្តិការភេរវកម្មមួយចំនួនរបស់អាល់កៃដា ដែលបណ្តាលឲ្យស្លាប់ ឬរបួសអ្នកកាន់សាសនាអ៊ីស្លាមដូចគ្នា។ ប៊ិនឡាដិនយល់ថា ទង្វើបែបនេះនឹងធ្វើឲ្យអាល់កៃដាត្រូវបាត់បង់ការគាំទ្រពីបណ្តាជនអ៊ីស្លាម។
ប៊ិនឡាដិនក៏បង្ហាញនូវកង្វល់ផងដែរ ចំពោះការណ៍ដែលក្រុមភេរវជននៅកន្លែងផ្សេង ដែលមិនមែនជាសាខារបស់អាល់កៃដា ហើយមិនស្ថិតក្រោមការគ្រប់គ្រងរបស់អាល់កៃដា ប៉ុន្តែ យកឈ្មោះអាល់កៃដាទៅប្រើ។ ប៊ិនឡាដិនបានគិតគូរចង់ដូរឈ្មោះ “អាល់កៃដា” នេះចេញហើយដាក់ឈ្មោះថ្មី។
ចំណុចដែលគួរឲ្យកត់សម្គាល់មួយទៀត នៅក្នុងឯកសារដែលចេញផ្សាយនេះ គេមិនសូវឃើញប៊ិនឡាដិនទាក់ទងជាមួយ Ayman al-Zawahiri នោះទេ។ គេសន្និដ្ឋានថា ភេរវជនទាំងពីររូបនេះ ទំនងជាបែកបាក់គ្នា ហើយ Zawahiri ទំនងជាគ្រប់គ្រងអាល់កៃដាបានច្រើនជាងប៊ិនឡាដិន។ គួរបញ្ជាក់ថា Zawahiri គឺជាអតីតមេដឹកនាំអាល់កៃដាលំដាប់ទី២ និងធ្លាប់តែជាមនុស្សជំនិតរបស់ប៊ិនឡាដិន។ ក្រោយប៊ិនឡាដិនស្លាប់ គឺ Zawahiri ដែលជាអ្នកឡើងមកកាន់តំណែងជាប្រមុខដឹកនាំរបស់អាល់កៃដា។
បើទោះជាត្រូវលាក់ខ្លួននៅតែក្នុងផ្ទះ នៅ Abbottabad (ប៉ាគីស្ថាន) ប៊ិនឡាដិននៅតែមានមហិច្ឆតាចង់ឃើញការវាយប្រហារភេរវកម្មទ្រង់ទ្រាយធំប្រឆាំងនឹងអាមេរិក។ ប៊ិនឡាដិនបានដាក់ចេញនូវផែនការភេរវកម្មពីរធំៗ។
ទីមួយ គឺការធ្វើឃាតលោកអូបាម៉ា ដើម្បីបង្កចលាចល ក្នុងជួររដ្ឋាភិបាលអាមេរិក។ ប៊ិនឡាដិនបានដាក់បញ្ជាឲ្យគេចាត់ភេរវជនពីរក្រុមទៅឃ្លាំចាំមើលព្រលានយន្តហោះពីរ (មួយនៅអាហ្វហ្កានីស្ថាន និងមួយទៀត នៅប៉ាគីស្ថាន) ដែលយន្តហោះដឹកមេដឹកនាំអាមេរិកតែងតែធ្វើការចុះចត។ ភេរវជនទាំងពីរក្រុមនេះមានបេសកកម្មបាញ់កម្ទេចយន្តហោះដឹកលោកអូបាម៉ា ឬយន្តហោះដឹកមេបញ្ជាការកងទ័ពអាមេរិកប្រចាំប្រទេសអាហ្វហ្កានីស្ថាន។
ផែនការទីពីរ គឺការវាយប្រហារនៅក្នុងទឹកដីអាមេរិក ដោយប្រើតាក់ទិក ដែលធ្លាប់បានប្រើ កាលពីថ្ងៃទី១១ កញ្ញា ២០០១ ពោលគឺ វាយប្រហារដោយប្រើយន្តហោះ។ ប៊ិនឡាដិនបានដាក់បញ្ជាឲ្យមន្រ្តីក្រោមបង្គាប់រើសសម្រាំងភេរវជនមួយចំនួន ដែលមានឈ្មោះស្អាតស្អំ មិនជាប់ការសង្ស័យរបស់អាជ្ញាធរអាមេរិក ហើយបញ្ជូនពួកគេឲ្យទៅរៀនបើកបរយន្តហោះ នៅអាមេរិក។
នៅក្នុងឯកសារ ដែលចេញផ្សាយជាសាធារណៈ ម្សិលមិញនេះ មិនបានបញ្ជាក់ច្បាស់នោះទេថា តើគម្រោងការភេរវកម្មទាំងពីរនេះត្រូវបានមន្រ្តីក្រោមបង្គាប់ប៊ិនឡាដិនយកទៅអនុវត្តដែរឬទេ? តើអនុវត្តបានដល់ដំណាក់កាលណា?
ជាចុងក្រោយ គេសង្កេតឃើញថា នៅមុនពេលស្លាប់ ប៊ិនឡាដិនតែងតែមានការព្រួយបារម្ភជាប់ជានិច្ច អំពីជោគវាសនារបស់អាល់កៃដា នៅក្រោយពេលគាត់ស្លាប់ និងអំពីកេរ្តិ៍ឈ្មោះរបស់គាត់ នៅក្នុងប្រវត្តិសាស្រ្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ