ទស្សនកិច្ចលើកទីមួយរបស់អនុប្រធានាធិបតីអាមេរិកនៅប្រទេសចិន
នៅពីថ្ងៃពុធទី១៧សីហាម្សិលមិញ លោកអនុប្រធានាធិបតីអាមេរិក ចូ បាយដិន(Joe Biden) បានទៅដល់ប្រទេសចិន ដើម្បីបំពេញទស្សនកិច្ចផ្លូវការចំនួនប្រាំថ្ងៃ។ នេះគឺជាលើកទីមួយហើយដែលអ្នកដឹកនាំកំពូលអាមេរិកលំដាប់ថ្នាក់ទីពីររូបនេះ បានទៅប្រទេសចិន។ លោកត្រូវជួបជាមួយលោកប្រធានាធិបតីចិន ហ៊ូ ជិនតាវ លោកអនុប្រធានាធិបតីចិនស៊ី ជីងពីង(Xi Jingping) ដែលនឹងឡើងធ្វើជាប្រធានាធិបតីចិន នៅឆ្នាំ២០១៣។ នៅក្នុងពេលមួយដែលសេដ្ឋកិច្ចអាមេរិកកំពុងដើរអូសជើង លោកចូ បាយដិន គ្រោងជជែកជាមួយថ្នាក់ដឹកនាំទីក្រុងប៉េកាំង អំពីសំណុំរឿងសេដ្ឋកិច្ចមួយចំនួន រួមមានជាអាទិ៍ តម្លៃថោកជ្រុលនៃប្រាក់យ័នចិន។ ទន្ទឹមនេះ លោកចូ បាយដិនចង់ប្រាប់ចិនដែលជាម្ចាស់បំណុលធំជាងគេរបស់អាមេរិកថា រដ្ឋអាមេរិកាំងនៅតែមានលទ្ធភាពគ្រប់គ្រាន់ក្នុងការសងបំណុលរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៥៨
ក្នុងចំណោមប្រធានបទសំខាន់ៗដែលលោកចូ បាយដិន ត្រូវលើកមកពិភាក្សាជាមួយថ្នាក់ដឹកនាំចិន មានរឿងរសើបនិងរឿងល្អ។
សំណុំរឿងរសើបជាងគេ គឺបញ្ហាជុំវិញតម្លៃទាបជ្រុលនៃប្រាក់យ័នចិន។ អាមេរិកចង់ឲ្យទីក្រុងប៉េកាំងពន្លែងលុយយ័នឲ្យអណ្តែតចុះឡើងទៅតាមហាងឆេងនៃទីផ្សារហិរញ្ញវត្ថុ។ យោងទៅតាមទីក្រុងវ៉ាស៊ីនតោន តម្លៃទាបពេកនៃលុយយ័នធៀបនឹងលុយដុល្លារជួយឲ្យចិនអាចបន្តលក់ផលិតផលរបស់ខ្លួនក្នុងតម្លៃថោកជាងផលិតផលរបស់អាមេរិក នៅលើទីផ្សារអន្តរជាតិ។
សំណុំរឿងរសើបធំមួយទៀត គឺវិបត្តិស្តីពីការដំឡើងកម្រិតអតិបរមានៃប្រាក់បំណុលរបស់អាមេរិកដែលថ្នាក់ដឹកនាំនៅវ៉ាស៊ីនតោនបានបណ្តោយឲ្យនៅរ៉ាំរ៉ៃច្រើនសប្តាហ៍មុននឹងដោះស្រាយចេញ កាលពីថ្ងៃទី២សីហា។ ទីក្រុងប៉េកាំងដែលជាម្ចាស់បំណុលធំជាងគេរបស់សហរដ្ឋអាមេរិកបារម្ភខ្លាំងឡើងៗខ្លាចទីក្រុងវ៉ាស៊ីនតោនក្ស័យធន។ ក្នុងន័យនេះថ្នាក់ដឹកនាំចិនបានអំពាវនាវឲ្យអាមេរិកឈប់ចាយធំ ឈប់ចាយច្រើនលើសលុយដែលរកបាន។
សំណុំរឿងរសើបចុងក្រោយ គឺការដែលអាមេរិកនៅតែបន្តលក់អាវុធទៅឲ្យតៃវ៉ាន់។ កាលពីថ្ងៃអង្គារទី១៦សីហា មួយថ្ងៃមុនលោកចូ បាយដិនទៅដល់ទីក្រុងប៉េកាំង កាសែតផ្លូវការរបស់ចិនបានសរសេរថា ដរាបណាវ៉ាស៊ីនតោននៅតែលក់អាវុធឲ្យតៃវ៉ាន់ ដរាបនោះទំនាក់ទំនងចិន-អាមេរិកនឹងមិនអាចល្អទៅកើតឡើយ។
យ៉ាងណាក៏ដោយ ទាំងចិននិងទាំងអាមេរិកយល់ថា ពីពេលនេះតទៅ ស្ថិរភាពនៃសេដ្ឋកិច្ចពិភពលោកអាស្រ័យទៅលើទំនាក់ទំនងនិងសហប្រតិបត្តិការរវាងប្រទេសគេទាំងពីរ។ អ៊ីចឹងហើយ បានជានៅព្រឹកមិញនេះ លោកចូ បាយដិននិងសមភាគីចិនលោកស៊ី ជីងពីងបានប្រកាសដូចគ្នាថា នៅក្នុងបរិបទបច្ចុប្បន្ន អាមេរិកនិងចិនមានប្រយោជន៍រួមគ្នាច្រើននិងមានការទទួលខុសត្រូវរួមគ្នាខ្ពស់។
នៅក្នុងឱកាសទស្សនកិច្ចជាលើកទីមួយនេះរបស់ខ្លួននៅប្រទេសចិន ក្រៅពីជួបជាមួយលោកស៊ី ជីងពីង លោកចូ បាយដិនត្រូវជួបជាមួយលោកប្រធានាធិបតីចិន ហ៊ូ ជិនតៅនិងលោកនាយករដ្ឋមន្ត្រីចិន វេន យ៉ាបៅ។ លោកចូ បាយដិនស្នាក់នៅប្រទេសចិនប្រាំថ្ងៃ រួចហើយលោកនឹងបន្តដំណើរទៅម៉ុងហ្គោលីនិងក្រោយមកទៀតទៅប្រទេសជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ