អនុប្រធានាធិបតីអាមេរិកទៅចែចូវអនាគតមេដឹកនាំចិន
នៅថ្ងៃអង្គារ ១៦ សីហា ២០១១នេះ លោកអនុប្រធានាធិបតីអាមេរិក ចូ បាយដិន (Joe Biden) បានចេញដំណើរទៅបំពេញទស្សនកិច្ចផ្លូវការ នៅប្រទេសចិន។ ដំណើរទស្សនកិច្ចនេះធ្វើឡើងទៅតាមការអញ្ជើញរបស់អនុប្រធានាធិបតីចិន ដែលទំនងជានឹងត្រូវឡើងធ្វើជាប្រធានាធិបតីចិន នៅឆ្នាំ២០១៣។ គោលដៅចម្បងរបស់លោកបាយដិន គឺស្វែងយល់ និងចែចូវអនាគតប្រមុខដឹកនាំចិន។
ចុះផ្សាយនៅថ្ងៃ៖
ស្តាប់ - ០១:៣៩
លោកចូ បាយដិន នឹងស្នាក់នៅប្រទេសចិន រយៈពេល ៥ថ្ងៃ ដែលជាដំណើរទស្សនកិច្ចមួយ មានរយៈពេលវែងកម្រឃើញ។ ក្នុងអំឡុងទស្សនកិច្ចនេះ លោកបាយដិន នឹងជួបជាមួយលោកប្រធានាធិបតីចិន ហ៊ូ ជិនតាវ នៅទីក្រុងប៉េកាំង ហើយបន្ទាប់មក លោកនឹងធ្វើដំណើរជាមួយលោកស៊ី ជីងពីង (Xi Jingping) ទៅទស្សនាតំបន់ផ្សេងៗទៀត ក្នុងប្រទេសចិន។
លោកស៊ី ជីងពីង បច្ចុប្បន្ន ជាអនុប្រធានាធិបតីចិន ក៏ប៉ុន្តែ គេរំពឹងថា លោកនឹងឡើងមកកាន់តំណែងជាប្រធានាធិបតីជំនួសលោកហ៊ូ ជិនតាវ នៅឆ្នាំ២០១៣ខាងមុខនេះ។ នៅពេលបច្ចុប្បន្ននេះ លោកស៊ី ជីងពីង គឺជាឥស្សរជននយោបាយ ដែលគេមិនសូវស្គាល់ប៉ុន្មានទេ នៅលើឆាកអន្តរជាតិ។ ក្នុងអំឡុងដំណើរទស្សនកិច្ចរយៈពេល ៥ថ្ងៃនេះ លោកបាយដិន អាចនឹងមានឱកាសស្វែងយល់អំពីបុគ្គលិកលក្ខណៈ និងគំនិតនយោបាយរបស់អនាគតមេដឹកនាំចិនរូបនេះ។ បើយោងតាមទីប្រឹក្សាសន្តិសុខជាតិរបស់លោកបាយដិន គោលដៅចម្បងរបស់អនុប្រធានាធិបតីអាមេរិក គឺត្រួសត្រាយផ្លូវ ដើម្បីពង្រឹងទំនាក់ទំនងចិន-អាមេរិក ទៅថ្ងៃអនាគត។
ក៏ប៉ុន្តែ អនុរដ្ឋមន្រ្តីក្រសួងហិរញ្ញវត្ថុអាមេរិកបានប្រាប់អ្នកសារព័ត៌មានថា នៅក្នុងពេលជួបជាមួយមេដឹកនាំចិន លោកចូ បាយដិន ក៏នឹងលើកឡើងផងដែរ អំពីនយោបាយរូបិយវត្ថុ និងយុទ្ធសាស្រ្តកំណើនសេដ្ឋកិច្ចរបស់ចិន។ អាមេរិកយល់ថា លុយយ័នរបស់ចិន បច្ចុប្បន្ននេះ នៅតែមានតម្លៃទាបជាងតម្លៃធម្មតាក្នុងទីផ្សារ។ ម្យ៉ាងទៀត អាមេរិកចង់ឃើញចិនផ្លាស់ប្តូរយុទ្ធសាស្រ្ត ពីការស្វែងរកកំណើនសេដ្ឋកិច្ចតាមរយៈការនាំចេញ ទៅជាការពង្រីកតម្រូវការទីផ្សារក្នុងស្រុករបស់ខ្លួនវិញ។
បញ្ហាសិទ្ធិមនុស្សក៏ជាប្រធានបទមួយដែរ ក្នុងដំណើរទស្សនកិច្ចរបស់លោកបាយដិន នៅពេលនេះ។ នេះបើយោងតាមមន្រ្តីសេតវិមាន។
បន្ទាប់ពីបញ្ចប់ដំណើរទស្សនកិច្ចនៅចិន លោកចូ បាយដិន នឹងបន្តដំណើរទស្សនកិច្ចទៅកាន់ប្រទេសជប៉ុន និងប្រទេសម៉ុងហ្គោលីបន្តទៀត។ នៅជប៉ុន លោកបាយដិន គ្រោងធ្វើដំណើរទៅទស្សនាតំបន់ដែលរងគ្រោះរញ្ជួយដី កាលពីខែមីនាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ