នៅពីក្រោយការបែកបាក់សម្ពន្ធភាព«សហជីពប្រឆាំង»
ចុះផ្សាយនៅថ្ងៃ៖
ស្តាប់ - ០៤:៣០
ទីបំផុតទៅសម្ពន្ធ័មិត្តដ៏ល្អិតរមួតរវាងលោក ជា មុនី និងលោក រ៉ុង ឈុន ដែលគេស្គាល់ថាជាសកម្មជនសហជីពដ៏ល្បីល្បាញ និងមានទំនោរទៅរកបក្សប្រឆាំងបានឈានដល់ផ្លូវបំបែក។លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជាដែលស្នងតំណែងពីបងប្រុសគឺលោក ជា វិជ្ជា បានសម្រេចដើរចេញពីសម្ពន្ធភាពជាមួយលោករ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ។ តើអ្វីទៅជាដើមហេតុនៃការបែកបាក់នេះ? ហើយតើវាជះឥទ្ធិពលមិនល្អបែបណាចំពោះចលនាសហជីព និងមានផលប៉ះពាល់ដល់គណបក្សប្រឆាំងដែរឬទេ?
ការបែកបាក់រវាងលោកជា មុនី និងលោក រ៉ុង ឈុន លែងជារឿងអាថ៌កំបាំងទៀតហើយ។ លោក ជាមុនី បានសម្រេចចាកចេញពីសហភាពសហជីពកម្ពុជាដែលកើតចេញពីការផ្តុំគ្នារវាងសហជីពសេរីកម្មកររបស់លោក ជាមួយសមាគមគ្រូបង្រៀនកម្ពុជាឯករាជ្យរបស់លោក រ៉ុង ឈុន។ ការបែកបាក់សម្ពន្ធភាពរវាងសកម្មជនសហជីពដែលមានទំនោរទៅរកបក្សប្រឆាំងទាំងពីរបានកើតឡើងដោយសារការសង្ស័យអំពីហេតុផលនយោបាយនៅពីក្រោយបើទោះបីនេះជាហេតុផលពិត ឬក៏គ្រាន់តែជាហេតុផលសិប្បនិម្មិតក៏ដោយចុះ។ជាបឋម គេគួររម្លឹកថាសហជីពសេរីកម្មករនៃព្រះរាជាណាចក្រកម្ពុជាក្រោមការដឹកនាំរបស់អតីតសកម្មជនសហជីពដ៏ល្បីល្បាញគឺលោក ជា វិជ្ជា ត្រូវបានគេស្គាល់ថា ជាសហជីពរៀមច្បងគេមួយនៅកម្ពុជាដែលអាចប្រមូលផ្តុំអ្នកគាំទ្របានយ៉ាងច្រើនបំផុត។សហជីពនេះបានដើរតួនាទីនាំមុខគេនៅក្នុងការដឹកនាំចលនាបាតុកម្មការពារសិទ្ធិកម្មករទល់នឹងការរំលោភបំពានរបស់ថៅកែ។ក្រៅពីការពារផលប្រយោជន៍កម្មករ សហជីពនេះក៏ជាចលនាសង្គមដ៏ធំមួយដែលរកសំឡេងគាំទ្រឲ្យគណបក្សប្រឆាំង។
អំពើឃាតកម្មទៅលើលោក ជា វិជ្ជា កាលពីដើមឆ្នាំ២០០៤ មិនបានធ្វើឲ្យសហជីពនេះចុះទន់ខ្សោយទេតែផ្ទុយទៅវិញឃាតកម្មនេះរឹងរឹតតែជំរុញទឹកចិត្តកម្មករឲ្យពុះកញ្ជ្រោលឡើងថែមទៀតនៅជុំវិញលោក ជា មុនី ដែលជាប្រធានស្នងតំណែងពីបងប្រុស។លោក រ៉ុង ឈុនដែលជាអតីតសម្ពន្ធមិត្តចាក់ទឹកមិនលិចជាមួយលោក ជា វិជ្ជា បានពង្រីកសម្ពន្ធភាពជាមួយលោកជា មុនី ដោយដាក់សមាគមគ្រូបង្រៀន និងសហជីពសេរីកម្មករធ្វើជាដើមទុន។សម្ពន្ធភាពថ្មីនេះបានកើតឡើងក្រោមដំបូល«សហភាពសហជីពកម្ពុជា»។
ប៉ុន្តែ មិនយូរប៉ុន្មាន ភាពរកាំរកូសក៏បានកើតឡើង។ ភាពរកាំរកូសដោយសារការងារជារឿងមួយ តែចុងក្រោយនេះ ភាពរកាំរកូសបានឈានដល់ការសង្ស័យពីរឿងនយោបាយ។ លោក ជា មុនី ត្រូវបានសម្ពន្ធមិត្តសង្ស័យថា បានផ្លាស់ប្តូរជំហរងាករេខុសពីមុន។ការសង្ស័យកើតមានកាន់តែខ្លាំងនៅខណៈដែលលោក ជា មុនី បានបង្ហាញពីការផ្លាស់ប្តូរជីវភាពផ្ទាល់ខ្លួន និងពេលខ្លះហាក់បានដកឃ្លាពីសហជីព។
ការឆ្លើយតបជាវិជ្ជមានរបស់លោកនាយករដ្ឋមន្ត្រី ហ៊ុន សែន ចំពោះសំណើរបស់លោក ជា មុនី ដែលស្នើសុំសាងសង់រូបសំណាកសពលោក ជា វិជ្ជា កាលពីពេលថ្មីៗនេះ ដែលគួរតែជាដំណឹងល្អសម្រាប់អ្នកស្មោះស្មគ្រ័នឹងលោក ជា វិជ្ជា នោះ បែរក្លាយទៅជាក្តីមន្ទិលសង្ស័យទៅលើលោក ជា មុនី កាន់តែខ្លាំងទៅវិញ។ស្របពេលជាមួយគ្នានោះ លោក ជា មុនី ហាក់បានបង្ហាញជំហរទន់ភ្លន់ជាមួយរដ្ឋាភិបាលគួរឲ្យកត់សម្គាល់។លោកបានប្តូរយុទ្ធសាស្ត្រពីការធ្វើបាតុកម្មតាមដងផ្លូវដែលបងប្រុសរបស់លោកតែងប្រកាន់យ៉ាងតឹងរ៉ឹងនោះទៅជាការចរចាច្រើនជាងមុន។សម្រាប់លោកជា មុនី យុទ្ធសាស្ត្រនេះអាចទទួលបានលទ្ធផលល្អជាងមុន និងចៀសវាងបានការប្រឈមមុខដាក់គ្នាដ៏តានតឹងទៀតផង។ ប៉ុន្តែ ជំហរបែបនេះបានធ្វើឲ្យលោក រ៉ុង ឈុន និងសកម្មជនសហជីពដទៃទៀត សង្ស័យកាន់តែខ្លាំងរហូតដល់លែងអាចធ្វើការជាមួយគ្នាបាន។ នេះជាហេតុផលដែលនាំការបែកបាក់សម្ពន្ធ័ភាពរវាងសកម្មជនសហជីពទាំងពីរ។
ការបែកបាក់នេះប្រាកដណាស់ថាវាមិនដែលផ្តល់ផលល្អឡើយទាំងសម្រាប់ចលនាសហជីព ក៏ដូចជាសម្រាប់គណបក្សប្រឆាំងពីព្រោះនរណាក៏ដឹងដែរថា សហជីពទាំងពីរនេះមានទំនោរទៅរកបក្សប្រឆាំង។ ប៉ុន្តែ ថាតើការបែកបាក់នេះប៉ះពាល់ដល់គណបក្សប្រឆាំងកម្រិតណា?គឺជាសំណួរដែលពិបាកនឹងរកចម្លើយនៅឡើយ ពីព្រោះ គេត្រូវមើលបន្តទៀតសិនថា តើលោក ជា មុនី ប្រាកដជាប្តូរជំហរពិតមែនដែរឬទេពីព្រោះពេលខ្លះ ការសង្ស័យដែលគ្មានមូលដ្ឋានវាគ្រាន់តែរឿងសិប្បនិម្មិតតែប៉ុណ្ណោះ? តែប្រសិនបើការសង្ស័យនោះជាការពិតវិញគេត្រូវមើលទៀតថា តើលោកជា មុនី នៅតែមានឥទ្ធិពលនៅក្នុងចំណោមសមាជិកសហជីពសេរីកម្មករខ្លាំងដូចពីមុនដែរឬទេ? ចម្លើយជាក់លាក់ទៅនឹងសំណួរនេះទើបជាមូលដ្ឋានរឹងមាំក្នុងការវាយតម្លៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ