សហជីពកម្មករជួបជុំហែក្បួន សាទរទិវាពលកម្មអន្តរជាតិ១ ឧសភា
សហជីពកម្មករប្រមាណ៥.០០០ នាក់ បានប្រមូលផ្តុំនៅមុខរដ្ឋសភាក្នុងទីក្រុងភ្នំពេញ បន្ទាប់ពីដើរហែក្បួនលើកបដានិងថ្លែងការណ៍ដើម្បីសាទរទិវាពលកម្មអន្តរជាតិថ្ងៃ១ឧសភា ខួបលើកទី១២៦។ ក្រុមកម្មករ ក៏បានដាក់ញត្តិទៅកាន់រដ្ឋសភាដើម្បីស្នើសុំឲ្យរដ្ឋាភិបាលដោះស្រាយនូវបញ្ហារបស់កម្មករ ទាក់ទងនឹងលក្ខខណ្ឌការងារនិងសុំដំឡើងប្រាក់ខែជាដើម។ ដោយឡែកនៅឯខេត្តព្រះសីហនុ នៅព្រឹកមិញ ខណៈដែលលោកនាយករដ្ឋមន្ត្រី ហ៊ុនសែន ជួបសំណេះសំណាលជាមួយកម្មករ ក្នុងឱកាសទិវាពលកម្មអន្តរជាតិ លើកទី១២៦ និងសម្ពោធបើកឲ្យប្រើប្រាស់ជាផ្លូវការ តំបន់សេដ្ឋកិច្ចពិសេស កំពង់ផែក្រុងព្រះសីហនុ ប៉ូលិសបានរារាំងមិនឲ្យសហជីពអ្នករត់ម៉ូតូកង់បី ហែក្បួនតាមដងផ្លូវឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
សហជីពកម្មករជាង ៥.០០០ នាក់ បានប្រមូលផ្តុំនៅមុខរដ្ឋសភា ក្នុងទីក្រុងភ្នំពេញនៅព្រឹកមិញ បន្ទាប់ពីកម្មករកាត់ដេរមួយក្រុមដឹកនាំដោយសហភាពការងារកម្ពុជារបស់លោក អាត់ ធន់ ដើរហែក្បួនពីសួនច្បារ ជិតវត្តភ្នំ និងមួយក្រុមទៀត ជាសមាជិកសម្ព័ន្ធសហជីពចលនាកម្មករ បានជិះឡានហែក្បួនមកពីតំបន់រោងចក្រកាត់ដេរ ៦ ជាន់ តាមផ្លូវវេងស្រេង។
ក្រោយពីជួបជុំថ្លែងការណ៍ និងលើកបដានៅមុខរដ្ឋសភាក្រុមសហជីពកម្មករទាំងពីរក្រុម បានយកញត្តិដាច់ដោយឡែកពីគ្នាដាក់ទៅកាន់ប្រធានរដ្ឋសភាដែលមិនធ្វើការព្រោះជាថ្ងៃបុណ្យឈប់សម្រាក។
ញត្តិរបស់សហជីពកម្មករ បានស្នើឲ្យរដ្ឋសភានិងប្រមុខរដ្ឋាភិបាលដោះស្រាយនូវបញ្ហាកម្មករកាត់ដេរ មានជាអាទិ៍៖
ការបង្កើនយន្តការការពារសិទ្ធិកម្មករកំណត់ប្រាក់ឈ្នួលអប្បបរមាសម្រាប់កម្មករកាត់ដេរ យ៉ាងហោចណាស់ ១៣១ ដុល្លារ ខណៈដែលកម្មករសព្វថ្ងៃទទួលប្រាក់ខែត្រឹមតែ ៦១ ដុល្លារ បង្កើនប្រាក់ខែមន្ត្រីរាជការដល់ ២០០ ដុល្លារបញ្ចប់កិច្ចសន្យាខ្លី បង្កើតតុលាការការងារ និងទាមទារឲ្យរដ្ឋាភិបាលចាប់ខ្លួនជនសង្ស័យដែលបាញ់កម្មករ យកទៅផ្តន្ទាទោស ដូចករណី លោក ឈូក បណ្ឌិត អតីតអភិបាលក្រុងបាវិត ជាដើម។
នៅមុខរដ្ឋសភា នៅព្រឹកថ្ងៃទី១ឧសភា ឆ្នាំ២០១២ ក៏មានក្រុមស្ត្រីបឹងកក់ បានជួបជុំ និងហែញត្តិ ដាក់ទៅរដ្ឋសភា ដើម្បីស្វែងរកដំណោះស្រាយលើបញ្ហាដីធ្លីនៅតំបន់បឹងកក់ផងដែរ។ ប៉ុន្តែត្រូវប៉ូលិសរារាំង។ ក្រុមស្ត្រីបឹងកក់ បានស្រែកតវ៉ា និងដោះខោអាវ ទាំងដៃដាក់ច្រវាក់ខ្លួនឯង។ ស្ត្រីបឹងកក់ ធ្វើយុទ្ធនាការហែក្បួនបាតុកម្មដីធ្លី រយៈពេល ១ សប្តាហ៍ ចាប់ផ្តើមពីថ្ងៃទី៣០មេសា កាលពីថ្ងៃម្សិលមិញ។
ការរារាំងដំណើរសហជីព មិនឲ្យហែក្បួន ក៏កើតមាននៅឯខេត្តព្រះសីហនុ កាលពីព្រឹកមិញ ខណៈដែលលោកនាយករដ្ឋមន្ត្រី ហ៊ុន សែន បានចុះទៅសំណេះសំណាលជាមួយកម្មករបុគ្គលិក ក្នុងឱកាសទិវាពលកម្មអន្តរជាតិ លើកទី១២៦ និងពិធីសម្ពោធបើកឲ្យប្រើប្រាស់ជាផ្លូវការ តំបន់សេដ្ឋកិច្ចពិសេសកំពង់ផែក្រុងព្រះសីហនុ។
នៅទីនោះ លោកនាយករដ្ឋមន្ត្រី ហ៊ុន សែន បានអំពាវនាវឲ្យមានការសម្របសម្រួលរវាងថៅកែរោងចក្រ ជាមួយនឹងកម្មករ សហជីព ដោយគោរពច្បាប់ សម្រាប់ដោះស្រាយបញ្ហា ដើម្បីរក្សាការងារកាត់ដេរនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ