សហភាពការងារកម្ពុជាអំពាវនាវរកជំនួយដើម្បីសង់អគារមជ្ឈមណ្ឌលសាមគ្គីកម្មករ
សហភាពការងារកម្ពុជាអំពាវនាវរកជំនួយពីសប្បុរសជន ដើម្បីសាងសង់អគារមជ្ឈមណ្ឌលសាមគ្គីកម្មករកាត់ដេរ។ ការអំពាវនាវរបស់មេដឹកនាំសហជីពសហភាពការងារកម្ពុជាបានធ្វើឡើង បន្ទាប់ពីស្ថាប័នរបស់ខ្លួនប្រឈមនឹងកង្វះខាតប្រាក់ សម្រាប់ជួលអគារពីឯកជន។
ចុះផ្សាយនៅថ្ងៃ៖
ស្តាប់ - ០១:៥៩
ដោយមានការលំបាកក្នុងការជួលការិយាល័យធ្វើការបម្រើផលប្រយោជន៍កម្មករកាត់ដេរ និងដោយសារថ្លៃឈ្នួលជួលការិយាល័យចេះតែឡើងថ្លៃនោះ លោក អាត់ ធន់ ប្រធានសហភាពការងារកម្ពុជា បានអំពាវនាវ នៅថ្ងៃអាទិត្យនេះ ស្វែងរកជំនួយពីសប្បុរសជនពីគ្រប់ទិសទី និងពីកម្មករកាត់ដេរ ដែលជាសមាជិក ដើម្បីសាងសង់អគារការិយាល័យ សម្រាប់បម្រើផលប្រយោជន៍ជូនកម្មករ។
អស់រយៈពេលជាច្រើនឆ្នាំមកហើយ ដែលសហភាពការងារកម្ពុជាបានជួលការិយាល័យពីសំណាក់ឯកជន ប៉ុន្តែ ពីមួយឆ្នាំទៅមួយឆ្នាំ តម្លៃជួលការិយាល័យមានការកើនឡើងជាលំដាប់ រហូតធ្វើឲ្យសហភាពការងារកម្ពុជាមានបញ្ហាហិរញ្ញវត្ថុមិនអាចជួលបន្តទៀតបាន។
អ៊ីចឹងហើយទើបសហភាពការងារកម្ពុជាសម្រេចចិត្តស្វែងរកមូលនិធិ ដើម្បីសាងសង់អគារមួយខ្នង ដែលកើតចេញពីការគាំទ្ររបស់មហាជនទូទៅ និងពីសំណាក់កម្មករកាត់ដេរទាំងមូល នៅក្នុងប្រទេសកម្ពុជា។ អគារនេះមានឈ្មោះថា “អគារមជ្ឈមណ្ឌលសាមគ្គីកម្មករនៃសហភាពការងារកម្ពុជា”។
បើយោងតាមគម្រោង អគារនេះនឹងបម្រើសេវាកម្មរដ្ឋបាល និងជាកន្លែងបណ្តុះបណ្តាលកម្មករ។ អគារនេះកើតចេញពីស្នាដៃរបស់កម្មករ ហើយវានឹងបម្រើផលប្រយោជន៍របស់កម្មករ។
លោក អាត់ ធន់ ប្រធានសហភាពការងារកម្ពុជាបានពន្យល់ថា បច្ចុប្បន្ននេះ ស្ថាប័នរបស់លោកចំណាយថវិកាជួលការិយាល័យ និងចំណាយលើសេវារដ្ឋបាល អស់ប្រមាណជា ៥ម៉ឺនដុល្លារអាមេរិក ក្នុងមួយឆ្នាំៗ។ រីឯថវិកាប្រមូលបានពីកម្មករកាត់ដេរវិញមានចំនួនតែ ២ម៉ឺន៥ពាន់ដុល្លារអាមេរិកប៉ុណ្ណោះ។ ថវិកានៅខ្វះគឺជាជំនួយរបស់សហជីពអន្តរជាតិមួយចំនួន។
លោក អាត់ ធន់ បានបន្តបញ្ជាក់ទៀតថា ប្រសិនបើកម្មករមានអគារខ្លួនឯងដោយមិនបាច់ជួលគេ ពេលនោះ ថវិកាប្រមូលបានពីកម្មករប្រចាំឆ្នាំអាចចំណាយលើដំណើការរដ្ឋបាលបានដោយគ្មានបញ្ហា។
ដើម្បីប្រមូលវិភាគទានពីសប្បុរសជន សហភាពការងារកម្ពុជាគ្រោងនឹងរៀបចំបុណ្យផ្កាមហាសាមគ្គី ដែលគ្រោងនឹងប្រព្រឹត្តទៅ នៅដើមខែមីនាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ