លោកប្រធានាធិបតីស៊ីរីផ្ចាញ់សហគមន៍អន្តរជាតិ
ចុះផ្សាយនៅថ្ងៃ៖
ស្តាប់ - ០៧:០៦
បន្ទាប់ពីវាយយកបានសង្កាត់Baba Amrដែលជាសម្បុករបស់ពួកទាហានបះបោរ រដ្ឋាភិបាលលោកBachar Al Assad បានអនុញ្ញាតឲ្យក្រុមជំនួយមនុស្សធម៌អន្តរជាតិ ចូលទៅក្នុងទីក្រុងHoms។ ប៉ុន្តែ យ៉ាងណាក៏ដោយ រហូតមកដល់ថ្ងៃសៅរ៍ទី ៣ មីនា ២០១២ អង្គការកាកបាទក្រហមអន្តរជាតិ និយាយថា ពួកគេនៅតែមិនទាន់ត្រូវទាហានរដ្ឋាភិបាលអនុញ្ញាតឲ្យទៅចូលជួយ ជនរងគ្រោះ ក្នុងសង្កាត់Baba Amr ដែលទទួលរងការបាញ់ប្រហារយ៉ាងដំណំទាហានរដ្ឋាភិបាល នៅរយៈពេលប៉ុន្មានថ្ងៃចុងក្រោយនេះ។
ប្រធានកាកបាទក្រហម អន្តរជាតិ និងលោកអគ្គលេខាធិការអង្គការសហប្រជាជាតិបានរិះគន់ទង្វើរដ្ឋាភិបាល ស៊ីរីថា ជារឿងមិនអាចទទួលយកបានដែលគេហាមមិនឲ្យក្បួនរថយន្តដឹកជំនួយ មនុស្សធម៌ចូលទៅក្នុងសង្កាត់Baba Amrក្នុងទីក្រុងHoms ក្នុងពេលដែលជនរងគ្រោះដោយការបាញ់ប្រហារ ប៉ុន្មានថ្ងៃនេះ កំពុងត្រូវការជំនួយពេទ្យ និងអាហារជាបន្ទាន់។
លោកបាន គីមូនបានប្រាប់ទៅប្រធានាធិបតីBachar Al Assad ឲ្យអនុញ្ញាតឲ្យក្រុមរថយន្តដឹកជំនួយចូលទៅក្នុងសង្កាត់Baba Amr ដោយគ្មានលក្ខខណ្ឌ។
ភាគីរដ្ឋាភិបាលស៊ីរីរបស់លោកBachar Al Assad អះអាងថា គេមិនទាន់អនុញ្ញាតឲ្យក្រុមការងាររបស់អង្គការកាកបាទក្រហម ចូលទៅក្នុងសង្កាត់Baba Amrនៅពេលនេះ ក៏ដោយសារហេតុផលសុវត្ថិភាព ព្រោះគេជឿថា សង្កាត់Baba Amrត្រូវពួកក្រុមបះបោរស៊ីរីដាក់បង្កប់គ្រាប់មីន ឬបង្កៃគ្រឿងផ្ទុះ មុននឹងពួកគេត្រូវទាហានរដ្ឋាភិបាលវាយបណ្តេញចេញពីសង្កាត់នេះ កាលពីថ្ងៃព្រហស្បតិ៍។
ប៉ុន្តែ បើតាមក្រុមប្រឹក្សាជាតិស៊ីរីដែលតំណាងឲ្យក្រុមប្រឆាំងស៊ីរី រដ្ឋាភិបាលកំពុងឆ្លៀតឱកាសនេះដើម្បីបោសសម្អាត ឲ្យផុតសូន្យសកម្មជនប្រឆាំង និងកម្ទេចភស្តុតាងក្នុងសង្កាត់Baba Amrដែលអាចដាក់បន្ទុកលើខ្លួន។ គួរដឹងថា ប្រជាជននៅទីក្រុងហូមស៍មានជាង មួយសែននាក់ ប៉ុន្តែ ចាប់តាំងពីមានការវាយប្រហារជិតមួយខែ ក្រុមអ្នកប្រឆាំងបានលើកឡើងពីចំនួនប្រជាជនតែជាងប៉ុន្មានពាន់នាក់ ប៉ុណ្ណោះ ដែលនៅរស់រានមានជីវិត។
ជាក់ស្តែង បើតាមចលនាប្រឆាំងស៊ីរីដដែល ដែលមានទីតាំងបរទេស ទាហានរដ្ឋាភិបាលបានចូលឆែកឆេរតាមផ្ទះ ក្នុងសង្កាត់ Baba Amrដើម្បីចាប់រាល់យុវជនដែលមានអាយុលើសពី១៤ឆ្នាំ។
ពួកគេទាំងនោះត្រូវទាហានរដ្ឋាភិបាលចាប់ប្រមូលដាក់ឃុំ នៅក្នុងមជ្ឈមណ្ឌលពាណិជ្ជកម្ម ក្នុងចំណោមនោះ មនុស្សជាង ១០នាក់ត្រូវទាហានរដ្ឋាភិបាលប្រហារជីវិត កាលពីល្ងាចថ្ងៃសុក្រម្សិលមិញ។ ក្រុមអ្នកប្រឆាំងស៊ីរីបានជំរុញក្រុមកាកបាទក្រហមឲ្យប្រញាប់ទៅចូល ទៅក្នុងសង្កាត់Baba Amr ជាបន្ទាន់ ដើម្បីរារាំងកុំឲ្យទាហានរដ្ឋាភិបាលប្រហារជីវិត ក្រៅច្បាប់ទៅលើប្រជាជន។
តាមរយៈ ការវាយបានសង្កាត់ Baba Amr ដែលជាជម្រកសំខាន់ចុងក្រោយរបស់ក្រុមបះបោរស៊ីរីនៅទីក្រុងHoms កាលពីថ្ងៃព្រហស្បតិ៍ រដ្ឋាភិបាលរបស់លោកBachar Al Assad ចង់ ប្រាប់ក្រុមប្រឆាំងនឹងខ្លួន និងសហគមន៍អន្តរជាតិថា ខ្លួននៅតែមានអំណាច និងសមត្ថភាពគ្រប់គ្រាន់ដើម្បីវាយដណ្តើមយកវិញ តំបន់មួយដែលក្រុមបះបោរធ្លាប់យកទៅធ្វើជាទីតាំងប្រឆាំងតបរដ្ឋាភិបាល។
បើតាមក្រុមអ្នកកាសែតបរទេស ដែលជាសាក្សីនៅកន្លែងកើតហេតុ ការវាយប្រហាររបស់ទាហានរដ្ឋាភិបាលទៅលើទីក្រុងHoms គឺសង្រ្គាមមួយដែលឃោរឃៅដែលគេមិនធ្លាប់ឃើញមានពីមុនមក។ គ្រាប់ផ្លោងត្រូវរដ្ឋាភិបាលបាញ់ព្រោងព្រាតទៅលើទីក្រុងHoms ដោយមិនសំដៅទៅរកចំណុចណាមួយពិតប្រាកដ គឺមិនមែនសំដៅទៅលើតែក្រុមប្រដាប់អាវុធទេ ប៉ុន្តែ វាសំដៅផងដែរទៅលើប្រជាជនស៊ីវិល។ លើកនេះ លោកBachar Al Assad អាចយកជ័យជំនះរបស់ខ្លួនលើទីក្រុងHoms ទៅព្រមានដល់ប្រជាជនតវ៉ានៅកន្លែងផ្សេងទៀត។ នោះគឺថា អ្នកដែលគាំទ្រអ្នកប្រឆាំងអាចនឹងជួបវាសនាអាក្រក់ ស្លាប់បាត់បង់ជីវិតដូចប្រជាជននៅទីក្រុងHoms។
មួយវិញទៀត កាវាយយកបានសង្កាត់ Baba Amr ពីក្រុមបះបោរ រឹតតែបង្ហាញកាន់តែច្បាស់ថា នៅចំពោះមុខអសមត្ថភាព និងគ្មានអំណាចសហគមន៍អន្តរជាតិ ប្រជាជនទីក្រុងមួយដែលនៅដាច់តែឯង គ្មានទទួលជំនួយអន្តរាគមន៍ពីទ័ពបរទេស ត្រូវជួបជោគវាសនាអាក្រក់ គឺត្រូវរដ្ឋាភិបាលផ្តាច់ការបាញ់សម្លាប់ដោយគ្មានខ្លាចរអែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ