នាយករដ្ឋមន្រ្តីអូស្រ្តាលីប្រកាសរៀបចំបោះឆ្នោតជាតិនៅខែសីហា
ចុះផ្សាយនៅថ្ងៃ៖
ស្តាប់ - ០៧:១៩
នៅថ្ងៃសៅរ៍ ទី១៧ កក្កដា ២០១០នេះ លោកស្រីជូលីយ៉ា ហ្គីឡាដ (Julia Gillard) ដែលទើបនឹងឡើងកាន់តំណែងជានាយករដ្ឋមន្រ្តីអូស្រ្តាលីបានមិនដល់ មួយខែផង បានប្រកាសកំណត់យកថ្ងៃទី២១ សីហា ២០១០ ជាថ្ងៃបោះឆ្នោតជាតិ។ អ្នកវិភាគជាច្រើនយល់ថា លោកស្រីហ្គីឡាដ មានប្រៀបច្រើនជាងគូប្រជែង ក្នុងការបោះឆ្នោតខាងមុខនេះ។ ក៏ប៉ុន្តែ ក៏មានអ្នកព្រួយបារម្ភផងដែរ ខ្លាចក្រែងគ្មានគណបក្សណាមួយឈ្នះបានសំឡេងគ្រប់គ្រាន់អាចបង្កើត រដ្ឋាភិបាលតែឯងបាន ដែលអាចនាំឲ្យមានភាពជាប់គាំងនយោបាយ។
លោកស្រីជូលីយ៉ា ហ្គីឡាដ បានក្លាយជានាយករដ្ឋមន្រ្តីភេទស្រី ទី១ របស់អូស្រ្តាលី កាលពីថ្ងៃទី២៤ មិថុនា ២០១០ ក្រោយពីបានទម្លាក់លោកខេវិន រូដ (Kevin Rudd) ពីតំណែងជាប្រធានគណបក្សពលករ (Labor Party)។ មិនដល់មួយខែក្រោយមកផង លោកស្រីត្រូវប្រឈមមុខនឹងកិច្ចការដ៏លំបាកមួយទៀត គឺដណ្តើមជ័យជំនះក្នុងការបោះឆ្នោតជាតិ។ លោកស្រីហ្គីឡាដ ត្រូវបានគេទទួលស្គាល់ថា ជាអ្នកនយោបាយម្នាក់ប្រកបដោយភាពវៃឆ្លាត។ ក៏ប៉ុន្តែ រវាងការឡើងកាន់អំណាចតាមរយៈការជ្រើសរើសក្នុងបក្ស និងការឈ្នះឆ្នោតសកល គឺជារឿងពីរខុសគ្នាស្រឡះ។
មានអ្នកខ្លះយល់ថា លោកស្រីហ្គីឡាដ ឡើងមកកាន់តំណែងជានាយករដ្ឋមន្រ្តី ដោយគ្មានធម្មានុរូបភាព។ នេះហើយ ដែលទំនងជាហេតុផលជំរុញឲ្យលោកស្រីប្រញាប់ប្រញាល់រៀបចំការបោះឆ្នោត ដោយមិនចាំដល់ពេលសភាផុតអាណត្តិ នៅខែវិច្ឆិកា ២០១០។ គោលដៅ គឺចង់បង្ហាញពីភាពក្លាហានរបស់លោកស្រី ក្នុងការប្រឈមមុខនឹងការបោះឆ្នោត។ ប្រឈមមុខនឹងការជ្រើសរើសរបស់ម្ចាស់ឆ្នោត។
គូប្រជែងរបស់លោកស្រីហ្គីឡាដ គឺលោកថូនី អ៊ែបត (Tony Abbott) មកពីគណបក្សសេរីនិយម (Liberal Party) ដែលជាបក្សប្រឆាំង បានលើកឡើងថា ការដែលលោកស្រីហ្គីឡាដ ឡើងមកកាន់អំណាចតាមរបៀបបក្សប្រហារនេះ អាចនឹងធ្វើឲ្យបាត់បង់ការគាំទ្រពីសំណាក់ពលរដ្ឋអូស្រ្តាលី។ ក៏ប៉ុន្តែ កាលពីខែធ្នូ ឆ្នាំ២០០៩ កន្លងទៅនេះ លោកថូនី អ៊ែបតខ្លួនឯង ក៏បានឡើងមកកាន់តំណែងជាប្រធានបក្សប្រឆាំង ក្នុងរូបភាពស្រដៀងគ្នានឹងលោកស្រីហ្គីឡាដដែរ។
លោកស្រីហ្គីឡាដ និងលោកអ៊ែបត នឹងត្រូវប្រឈមមុខគ្នា លើនយោបាយសំខាន់ៗមួយចំនួន៖ ការគ្រប់គ្រងជនអន្តោប្រវេសន៍ បញ្ហាសេដ្ឋកិច្ច បញ្ហាទប់ស្កាត់ការឡើងកម្តៅផែនដី កំណែទម្រង់សុខាភិបាល ។ល។
នៅក្នុងការគ្រប់គ្រងជនអន្តោប្រវេសន៍ លោកស្រីហ្គីឡាដ និងលោកអ៊ែបត សុទ្ធតែបានអះអាងរៀងៗខ្លួនថា មាននយោបាយល្អ ដើម្បីទប់ស្កាត់ការហូរចូលដោយខុសច្បាប់ នៃជនភៀសខ្លួនតាមទូក។ ក៏ប៉ុន្តែ ដំណោះស្រាយរបស់បេក្ខជនទាំងពីរ គឺផ្ទុយគ្នាស្រឡះ។ លោកអ៊ែបត ចង់បញ្ជូនជនភៀសខ្លួនខុសច្បាប់ទាំងអស់ចេញពីអូស្រ្តាលី។ ចំណែកលោកស្រីហ្គីឡាដវិញ ចង់ធ្វើចម្រោះ ដើម្បីជ្រើសរើសមើលថា តើជនភៀសខ្លួនប្រភេទណាគួរបញ្ជូនទៅវិញ ប្រភេទណាគួរផ្តល់សិទ្ធិឲ្យជ្រកកោននៅអូស្រ្តាលី។ នាពេលថ្មីៗនេះ លោកស្រីបានសន្យាថានឹងបង្កើតមជ្ឈមណ្ឌលមួយ នៅប្រទេសទីម័រខាងកើត ដើម្បីធ្វើចម្រោះជនភៀសខ្លួននេះ។ ក៏ប៉ុន្តែ រដ្ឋាភិបាលទីម័រខាងកើតបានបដិសេធការបង្កើតមជ្ឈមណ្ឌលនេះ ហើយលោកស្រីហ្គីឡាដ បានទទួលរងនូវការរិះគន់យ៉ាងខ្លាំង ដែលបានធ្វើការសន្យា ដោយមិនបានសុំការយល់ព្រមពីរដ្ឋាភិបាលទីម័រ ដែលជាម្ចាស់ផ្ទះជាមុន។
នៅក្នុងបញ្ហាអាកាសធាតុវិញ គណបក្សពលកររបស់លោកស្រីហ្គីឡាដ ក៏ទទួលរងនូវការរិះគន់ពីសំណាក់អ្នកធ្លាប់គាំទ្រដែរ។ គួររំឭកថា នៅក្នុងយុទ្ធនាការឃោសនាបោះឆ្នោត ឆ្នាំ២០០៧ លោកខេវិន រូដ បានសន្យាថានឹងបង្កើតយន្តការ ដើម្បីកាត់បន្ថយឧស្ម័នកាបូនិក។ ក៏ប៉ុន្តែ ៣ឆ្នាំក្រោយមក យន្តការនេះនៅតែមិនទាន់បង្កើតបាន។ អ្នកដែលមិនសប្បាយចិត្តនឹងបញ្ហានេះ អាចនឹងឈប់បោះឆ្នោតឲ្យគណបក្សកាន់អំណាច ហើយងាកទៅបោះឆ្នោតឲ្យគណបក្សបរិស្ថាននិយម (Australian Greens) វិញ។
ក៏ប៉ុន្តែ បើទោះជាគណបក្សកាន់អំណាចបាត់បង់ប្រជាប្រិយភាពក៏ពិតមែន តែអ្នកវិភាគជាច្រើនគិតថា លោកស្រីហ្គីឡាដ នៅតែមានប្រៀបជាងលោកអ៊ែបត ក្នុងការបោះឆ្នោត នៅខែសីហា ខាងមុខនេះ។ ដើម្បីយកឈ្នះ ឡើងកាន់អំណាចបាន គណបក្សប្រឆាំងត្រូវដណ្តើមអាសនៈពីបក្សកាន់អំណាចឲ្យបានយ៉ាងតិច ១៧អាសនៈ។ ក៏ប៉ុន្តែ អាសនៈដែលគណបក្សអំណាចអាចបាត់បង់ ទំនងជានឹងត្រូវធ្លាក់ក្នុងដៃគណបក្សតូចៗ (ដូចជាគណបក្ស Australian Greens ជាដើម) ច្រើនជាងធ្លាក់ក្នុងដៃគណបក្សប្រឆាំង។
អ្នកវិភាគនយោបាយអូស្រ្តាលីបានលើកឡើងថា ជាទូទៅ នៅអូស្រ្តាលី នៅក្នុងការបោះឆ្នោតចុងអាណត្តិទី១ គណបក្សកាន់អំណាចតែងតែបាត់សំឡេងគាំទ្រខ្លះ ក៏ប៉ុន្តែ មិនដែលបាត់បង់រហូតដល់របូតអំណាចពីដៃនោះទេ។ អស់រយៈពេល ៨ទសវត្សរ៍មកហើយ មិនដែលមានរដ្ឋាភិបាលអូស្រ្តាលីណាមួយចាញ់ឆ្នោត នៅចុងអាណត្តិទី១នោះទេ។
មានអ្នកវិភាគខ្លះទៀត ព្យាករថា គណបក្សពលករ និងគណបក្សសេរីនិយមអាចនឹងទទួលបានសំឡេងប្រកៀកប្រកិតគ្នា ក្នុងការបោះឆ្នោតខាងមុខនេះ។ ថាមិនបាន ក្នុងចំណោមគណបក្សធំៗទាំងពីរនេះ មិនមានគណបក្សណាមួយទទួលបានសំឡេងភាគច្រើនគ្រប់គ្រាន់ ដើម្បីបង្កើតរដ្ឋាភិបាលតែម្នាក់ឯងបានផងក៏មិនដឹង។ ក្នុងករណីនេះ ការបង្កើតរដ្ឋាភិបាលថ្មីអាចនឹងត្រូវជាប់គាំង ដែលអាចនឹងតម្រូវឲ្យមានការបោះឆ្នោតសាជាថ្មីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ