ស្លាប់ម្នាក់ របួស៥នាក់ ក្នុងការវាយប្រហារដោយកាំបិត នៅទីក្រុងឡុងដ៍
ចុះផ្សាយនៅថ្ងៃ៖
ស្តាប់ - ០៤:៤៦
ថ្ងៃពុធម្សិលមិញ នៅទីក្រុងឡុងដ៍ ប្រទេសអង់គ្លេស មុនម៉ោង១០កន្លះយប់ ពលរដ្ឋនរវែស ដើមកំណើតសូម៉ាលីម្នាក់ បានប្រើកាំបិតចាក់មនុស្ស នៅសួនច្បារ ជិតសារមន្ទីរមួយកន្លែង ធ្វើអោយស្ត្រីជនជាតិអាមេរិក អាយុជាង៦០ឆ្នាំម្នាក់ស្លាប់។ មនុស្ស៥នាក់ផ្សេងទៀត បានរងរបួស។ ជនរងគ្រោះទាំង៥នាក់ ជាជនជាតិអាមេរិក អូស្ត្រាលី អ៊ីស្រាអែល និងម្នាក់ជាពលរដ្ឋអង់គ្លេស។ ប៉ូលិសបានប្រើកាំភ្លើងដើរដោយចរន្តអគ្គិសនី បង្ក្រាបជនល្មើសនៅនឹងកន្លែង។
ប៉ូលិសលើកឡើងថា ហេតុការណ៍វាយប្រហារនេះ ជាករណីឃាតកម្ម។ អភិបាលក្រុងឡុងដ៍បានអំពាវនាវអោយប្រជាជនរក្សាភាពស្ងប់ស្ងាត់ និងជូនដំណឺងប៉ូលិស ករណីមានបញ្ហាអ្វីគួរសង្ស័យ។ ថ្ងៃព្រហស្បតិ៍នេះ ប៉ូលិសធ្វើការការពង្រឹងសន្តិសុខ បន្ថែមទៀតក្នុងទីក្រុង។
ជនល្មើសមានបញ្ហាផ្លូវចិត្ត- ប៉ូលិសគ្មានភស្តុតាងថា ជនល្មើសជាជនជ្រុលនិយម
ប៉ូលិសឃើញថា ជនល្មើសមានបញ្ហាផ្លូវចិត្ត។ ដំបូង ជនល្មើសត្រូវបានបញ្ជូនទៅមន្ទីរពេទ្យ មុននឹងត្រូវឃុំខ្លួននៅប៉ុស្តិ៍ប៉ូលិស។ ពេលនេះ ប៉ូលិសបន្តការស៊ើបអង្កេតលើសុខភាពផ្លូវចិត្តរបស់ឧក្រិដ្ឋជន ព្រោះបើមើលស្ថានភាពទៅ គេអាចថា ការវាយប្រហារនេះ គឹដោយសារជនល្មើសរងបញ្ហាផ្លូវចិត្ត។
ថ្ងៃព្រហស្បតិ៍នេះ ប៉ូលិសប្រាប់ថា គ្មានភស្តុតាងបញ្ជាក់ថា ជនល្មើសជាជនជ្រុលនិយម ដែលអាចអោយគេសន្និដ្ឋានថា ការវាយប្រហារដោយកាំបិត យប់ម្សិលមិញនេះជាភេរវកម្មទេ។ ត្បិតថា ជនរងគ្រោះជាពលរដ្ឋបរទេស ជាផ្ទាំងស៊ីបរបស់ក្រុមភេរវជនរដ្ឋអ៊ីស្លាម ត្បិតថា មួយរយៈចុងក្រោយនេះ មានភេរវកម្មកើតឡើង នៅបារាំង រឺអាល្លឺម៉ង់ក្តី ក៏ប៉ូលិសមិនអាចចេះតែសន្និដ្ឋាន ថាអោយតែមានអ្វីកើតឡើង គឺជាភេរវកម្មទាំងអស់នោះដែរ។ ប៉ូលិសអង់គ្លេសត្រូរការស៊ើបអោយច្បាស់លាស់សិន មុននឹងចេញសេចក្តីសន្និដ្ឋាន។
ក្រោយហេតុការណ៍ភ្លាមៗ ប៉ូលិសមិនបានទាត់ចោលទាំងស្រុងនូវលទ្ធភាពភេរវកម្ម
ប៉ូលិសហាក់នៅរារែកចិត្ត នឹងរឿងថា តើហេតុការណ៍យប់ម្សិលមិញ ជាភេរវកម្មរឺយ៉ាងណា ដោយសារជនល្មើស មើលទៅ គឺជាមនុស្សមានបញ្ហាផ្លូវចិត្ត។ ព្រោះតែការរារែកនេះ កងកម្លាំងប្រឆាំងភេរវកម្មបានសំដែងការគាំទ្រ ចំពោះការស៊ើបអង្កេតរបស់ប៉ូលិស។
ប៉ុន្តែ ភ្លាមៗក្រោយហេតុការណ៍ ប៉ូលិសក៏មិនទាត់ចោលទាំងស្រុងនូវលទ្ធភាពនៃភេរវកម្មដែរ ព្រោះថា ជនល្មើសវ័យក្មេងរូបអាចជាមនុស្សឯកា ហើយក្លាយខ្លួនជាភេរវជនបាន។ អាជ្ញាធរអង់គ្លេសបារម្ភថា ក្រុមភេរវជនជិហាតរដ្ឋអ៊ីស្លាម អាចអូសទាញមនុស្សដែលមានបញ្ហាផ្លូវចិត្ត ជំរុញពួកគេអោយធ្វើសកម្មភាព ភេរវកម្មក្នុងស្រុក។ យើងដឹងថា មនុស្សមានបញ្ហាផ្លូវចិត្ត អាចជាមនុស្សដែលទន់ខ្សោយ ងាយធ្លាក់ចូលក្នុងការអូសទាញណាមួយបាន។ ហេតុនេះហើយ បានជាប៉ូលិសមិនទាត់ចោលទាំងស្រុងលទ្ធភាពនៃភេរវកម្ម។
គេនៅចាំទៀតថា កាលពីខែធ្នូ ឆ្នាំ២០១៥ ពោលគឺក្រោយមានភេរវកម្មនៅក្រុងប៉ារីស ប្រទេសបារាំង នៅភាគខាងកើតទីក្រុងឡុងដ៍ មានជនល្មើសម្នាក់ បានប្រើកាំបិតធ្វើបាបអ្នកដំណើរ នៅស្ថានីយ៍រថភ្លើងក្រោមដីមួយកន្លែង។ ជននោះបានស្រែកថា បង្ហូរឈាម គឺដើម្បីបងប្អូននៅប្រទេសស៊ីរី។ ប៉ូលិសបានចាត់ទុកថា នេះជាអំពើភេរវកម្ម។
ប៉ុន្តែ យោងតាមអាជ្ញាធរ ក្នុងពេលធ្វើសកម្មភាពនេះ ជនល្មើសកំពុងរងបញ្ហាផ្លូវចិត្ត គឺគេមិនបានចែកដាច់ស្រឡះ នូវអ្វីដែលហៅថា ភាពស្រមើស្រមៃ និងការពិត ដែលកំពុងកើតមានទេ។ ដូច្នេះ មានន័យថា ជនជួបបញ្ហាផ្លូវចិត្តអាចនឹងធ្លាក់ក្នុងការអូសទាញរបស់ក្រុមភេរវជនបាន។ ដោយសារបញ្ហាអស់នេះ ក្នុងបេសកកម្មការងារមួយចំនួន ប៉ូលិសក៏បាននាំអ្នកឯកទេសសុខភាពផ្លូវចិត្ត ទៅធ្វើការជាមួយដែរ។
អង់គ្លេសស្ថិតក្រោមការគំរាមកំហែងភេរវកម្មកម្រិតខ្ពស់
មួយរយៈចុងក្រោយនេះ ក្រុមរដ្ឋអ៊ីស្លាម បានវាយប្រហារបែលហ្ស៊ិក បារាំង និងអាល្លឺម៉ង់ ធ្វើអោយប៉ូលិសក្រុងឡុងដ៍មានការត្រៀមការប្រុងប្រយ័ត្ន កម្រិតខ្ពស់។ អង់គ្លេសស្ថិតក្រោមការគំរាមភេរវកម្មខ្ពស់ ២ឆ្នាំមកហើយ។ ខែសីហា ឆ្នាំ២០១៤មក អាជ្ញាធរបានដាក់កម្រិតគំរាមកំហែងភេរវកម្ម ឡើងដល់លេខ៤ គឺខ្ពស់ខ្លាំង ព្រោះថា កម្រិតគំរាមកំហែងអតិបរមា គឺកម្រិត៥។
មេប៉ូលិសក្រុងឡុងដ៍ប្រើពាក្យរហូតថា គេមិនចាំបាច់សួរថា តើភេរវកម្មអាចកើតឡើងរឺក៏អត់ទេ តែគេត្រូវសួរថា តើភេរវកម្មនឹងកើតនៅពេលណា។ មានន័យថា អាជ្ញាធរអង់គ្លេសច្បាស់ណាស់ថា ភេរវកម្មអាចកើតឡើងគ្រប់ពេលទាំងអស់។
ម្សិលមិញ មុនមានហេតុការណ៍ចាក់ដោយកាំបិតនេះ អាជ្ញាធរបានប្រកាសពង្រាយកម្លាំងប៉ូលិស៦០០នាក់ ដើម្បីការពារសន្តិសុខ ទីក្រុងឡុងដ៍។ គិតជាតួលេខបូករួមប៉ូលិសបន្ថែម៦០០នាក់នេះ ប៉ូលិសការពារក្រុងឡុងដ៍មាន២៨០០នាក់ គឺច្រើន។ មិនពិបាកឆ្ងល់ទេ ដែលប៉ូលិសមានភាពរហ័សរហួនក្នុងការងារ។
ដោយឡែក ប៉ូលិសទាំងនេះក៏បំពាក់អាវុធដែរ។ ពីមុន ប៉ូលិសអង់គ្លេសមិនដែលបំពាក់អាវុធទេ។ ប៉ូលិសមានទំនោរប្រើអាវុធ គឺក្រោយពេលអង់គ្លេសរងភេរវកម្ម៤បន្តបន្ទាប់គ្នា នៅខែកក្កដាឆ្នាំ២០០៥។ ភេរវកម្មទាំង៤ នៅស្ថានីយ៍រថភ្លើង និងរថយន្តក្រុង នៅទីក្រុងឡុងដ៍។ ភេរវកម្មកាលនោះ សម្លាប់មនុស្ស៥២នាក់។ ក្រោយភេរវកម្មឆ្នាំ២០០៥ ប៉ូលិសបានទប់ស្កាត់បានគម្រោងវាយប្រហារជាង១០។
ទោះប្រុងប្រយ័ត្នយ៉ាងណាក្តី ក៏ការវាយប្រហារនៅតែអាចកើតនៅក្រុងឡុងដ៍។ ដូចជាកាលពីឆ្នាំ២០១៣ មានបុរស២នាក់ បានបើកឡាន បុកទាហានម្នាក់ ហើយថែមទាំងអារកសម្លាប់ទាហាននោះទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ