អតីតមេប៉ូលិសចិនត្រូវអាជ្ញាធរចាប់ខ្លួនពីបទពុករលួយ
ចុះផ្សាយនៅថ្ងៃ៖
ស្តាប់ - ០៤:២១
ទីភ្នាក់ងារព័ត៌មានរដ្ឋចិន (ស៊ីនហួ) បានផ្សព្វផ្សាយឲ្យដឹងនៅថ្ងៃសៅរ៍នេះថា អតីតមន្រ្តីជាន់ខ្ពស់ចិនម្នាក់ គឺលោក ចូវ យ៉ុងកាង (Zhou Yongkang) ត្រូវបានអាជ្ញាធរចាប់ខ្លួន ដោយចោទប្រកាន់ពីបទពុករលួយ។
ការចាប់ខ្លួនលោកចូវ យ៉ុងកាង ត្រូវបានធ្វើឡើង ក្រោយពីមានសេចក្តីសម្រេចពីការិយាល័យនយោបាយនៃបក្សកុម្មុយនិស្តចិន កាលពីថ្ងៃសុក្រ។ នេះបើយោងតាមទីភ្នាក់ងារព័ត៌មានរដ្ឋស៊ីនហួ ដែលបានចុះផ្សាយ ដោយដកស្រង់សេចក្តីប្រកាសរបស់បក្សកុម្មុយនិស្ត។ លោកចូវ យ៉ុងកាង ក៏ត្រូវបានបណ្តេញចេញពីសមាជិកភាពបក្សកុម្មុយនិស្តផងដែរ។
គួរបញ្ជាក់ថា លោក ចូវ យ៉ុងកាង ដែលបច្ចុប្បន្នមានអាយុ ៧១ឆ្នាំ ធ្លាប់កាន់តំណែងជារដ្ឋមន្រ្តីក្រសួងសន្តិសុខជាតិ ហើយនៅចន្លោះពីឆ្នាំ២០០៧ ដល់ឆ្នាំ២០១២ លោកគឺជាសមាជិកគណៈអចិន្រ្តៃយ៍បក្សកុម្មុយនិស្តចិន និងជាប្រធានគណៈកម្មាធិការមជ្ឈិមបក្សផ្នែកច្បាប់ និងនយោបាយ មានន័យថា ជាអ្នកក្តោបក្តាប់កម្លាំងប៉ូលិស ទីភ្នាក់ងារចារកិច្ច រដ្ឋអាជ្ញា និងប្រព័ន្ធតុលាការ នៅទូទាំងប្រទេសចិន។
និយាយជារួម នៅក្នុងពេលដែលលោកហ៊ូ ជិនតាវ នៅកាន់តំណែងជាលេខាបក្សកុម្មុយនិស្ត និងជាប្រធានាធិបតីចិន លោកចូវ យ៉ុងកាង ធ្លាប់ស្ថិតក្នុងចំណោមឥស្សរជនទាំង ៩រូប ដែលមានអំណាចបំផុត នៅក្នុងប្រទេសចិន។ រហូតដល់ឆ្នាំ២០១២ នៅពេលដែលបក្សកុម្មុយនិស្តចិនរុះរើអ្នកដឹកនាំ ហើយតែងតាំងលោកស៊ី ជីនពីង ជាមេដឹកនាំថ្មី ទើបលោកចូវ យ៉ុងកាង ចូលនិវត្តន៍ជាមួយនឹងមេដឹកនាំចាស់ ហើយចាប់ពីពេលនោះមក មន្រ្តី ដែលជាខ្សែរបស់លោកចូវ យ៉ុងកាង ត្រូវបានតុលាការបើកការស៊ើបអង្កេត ចាប់ខ្លួន និងកាត់ទោសជាបន្តបន្ទាប់ មុននឹងឈានទៅចាប់ខ្លួន លោកចូវ យ៉ុងកាង ផ្ទាល់ នៅពេលនេះ។
លោកចូវ យ៉ុងកាង ត្រូវបានចោទប្រកាន់ពីបទល្មើសជាច្រើន រួមមាន ដូចជា ការទទួលសំណូកដោយផ្ទាល់ ឬតាមរយៈក្រុមគ្រួសារ ការប្រើអំណាច ដើម្បីបម្រើផលប្រយោជន៍ផ្ទាល់ខ្លួន និងញាតិមិត្ត បក្ខពួករបស់ខ្លួន និងការធ្វើឲ្យលេចធ្លាយការណ៍សម្ងាត់របស់បក្ស ជាដើម។
នេះគឺជាលើកទីមួយ ដែលមន្រ្តីកំពូលកម្រិតសមាជិកគណៈអចិន្រ្តៃយ៍បក្ស ដូចជាលោកចូវ យ៉ុងកាង ត្រូវតុលាការបើកការស៊ើបអង្កេត និងចាប់ខ្លួន។ តាំងពីដើមមក គេតែងតែសង្កេតឃើញថា បើទោះបីជាមិនមានច្បាប់ចែងផ្លូវការ ក៏ប៉ុន្តែ នៅក្នុងការអនុវត្តជាទំនៀមទម្លាប់នៅក្នុងបក្សកុម្មុយនិស្តចិន មន្រ្តីកំពូលៗរបស់បក្ស ដែលឈប់កាន់តំណែងតែងតែត្រូវគេលើកលែងមិននាំយកមកកាត់ទោសទេ ដើម្បីចៀសវាងកុំឲ្យមានវិវាទផ្ទៃក្នុង ហែកហួរគ្នាទៅវិញទៅមក នាំឲ្យបែកធ្លាយរឿងសម្ងាត់របស់បក្ស។
ការចាប់ខ្លួនលោកចូវ យ៉ុងកាង ត្រូវបានអ្នកខ្លះលើកឡើងថា ជាករណីមួយ ដែលបង្ហាញ អំពីភាពប្តូរផ្តាច់របស់លោកស៊ី ជីនពីង ក្នុងការប្រយុទ្ធប្រឆាំងនឹងអំពើពុករលួយនៅគ្រប់ជាន់ថ្នាក់ តាំងពីមន្រ្តីតូចតាច រហូតដល់មន្រ្តីកំពូលៗ។
ក៏ប៉ុន្តែ ក្នុងពេលជាមួយគ្នា ក៏មានអ្នកខ្លះសង្ស័យដែរថា លោកស៊ី ជីនពីង ប្រហែលជាកំពុងតែឆ្លៀតយកយុទ្ធនាការប្រយុទ្ធប្រឆាំងនឹងអំពើពុករលួយនេះមកកម្ចាត់ក្រុមបដិបក្ខ ដើម្បីពង្រឹងអំណាចនៅក្នុងបក្ស ពីព្រោះ គេមើលឃើញថា លោកចូវ យ៉ុងកាង គឺស្ថិតនៅក្នុងខ្សែជាមួយលោកប៉ ស៊ីឡៃ ដែលធ្លាប់ជាគូប្រជែងរបស់លោកស៊ី ជីនពីង ក្នុងការដណ្តើមតំណែងជាលេខាបក្ស។
តាមពិតទៅ កន្លងមក គេឃើញមានសង្គមស៊ីវិល អង្គការសិទ្ធិមនុស្ស និងបណ្តាញផ្សព្វផ្សាយបរទេសជាច្រើន តែងតែបានសរសេររិះគន់លោកចូវ យ៉ុងកាង ថាជាមេប៉ូលិសឃោរឃៅ និងពោរពេញដោយអំពើពុករលួយ យកអំណាចទៅប្រើ ដើម្បីភាពមានបានផ្ទាល់ខ្លួន និងក្រុមគ្រួសារ រហូតកើបលុយរាប់រយលានដុល្លារក្នុងពេលកាន់អំណាច។ ក៏ប៉ុន្តែ អ្វីដែលគេចោទសួរ គឺនៅត្រង់ថា អំពើពុករលួយនៅចិន វាកើតមានជាទូទៅស្ទើរតែគ្រប់កន្លែង គ្រប់ជាន់ថ្នាក់ ជាពិសេស នៅក្នុងចំណោមមន្រ្តីកំពូលៗ ប៉ុន្តែ ហេតុអ្វីបានជាគេឃើញមានការស៊ើបអង្កេតតែទៅលើក្រុមរបស់លោកប៉ ស៊ីឡៃ និងលោកចូវ យ៉ុងកាង ដែលជាក្រុមបដិបក្ខរបស់លោកស៊ី ជីនពីង?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ