កូរ៉េខាងជើងបង្កើនគំនាបដាក់អាមេរិក ខណៈដែលថ្ងៃឱសានវាទខិតចូលកាន់តែជិត
ចុះផ្សាយនៅថ្ងៃ៖
ស្តាប់ - ០៧:១៤
នៅថ្ងៃអាទិត្យ ទី៨ ធ្នូ កូរ៉េខាងជើងបានប្រកាសឲ្យដឹងពីការសាកល្បងដ៏សំខាន់មួយនៅទីតាំងសូហេដែលជាកន្លែងបាញ់បញ្ជូនផ្កាយរណប។ ព័ត៌មាននេះត្រូវបានដកស្រង់ដោយទីភ្នាក់ងារផ្លូវការកូរ៉េខាងជើងឈ្មោះ KCNA តែមិនបានលំអិតបន្ថែមទេថា តើការសាកល្បងនោះជាការសាកល្បងផ្កាយរណប នុយក្លេអ៊ែរ ឬគ្រាប់មីស៊ីល។ ទោះជាយ៉ាងនេះក្តី ព្រឹត្តិការណ៍មួយនេះបានកើតមានឡើង ខណៈដែលកិច្ចចរចាស្តីពីការរំសាយនុយក្លេអ៊ែររវាងកូរ៉េខាងជើង និងអាមេរិកកំពុងជាប់គាំង។ ទន្ទឹមគ្នានេះ ថ្ងៃឱសានវាទដែលក្រុងព្យុងយ៉ាងបានដាក់ឲ្យក្រុងវ៉ាស៊ីនតោនដើម្បីផ្តើមកិច្ចចរចានុយក្លេអ៊ែរឡើងវិញក៏រំកិលចូលកាន់តែជិតដែរ។
ជាការសាកល្បងផ្កាយរណប នុយក្លេអ៊ែរ ឬគ្រាប់មីស៊ីល គេនៅមិនទាន់អាចនិយាយបានទេ ហើយក្រុងព្យុងយ៉ាងក៏នៅមិនទាន់បានផ្តល់ព័ត៌មានលំអិតអ្វីបន្ថែមដែរ។ ព័ត៌មានមួយនេះត្រូវបានប្រកាសដោយអ្នកនាំពាក្យបណ្ឌិតសភាវិទ្យាសាស្រ្តជាតិកូរ៉េខាងជើងដែលថា ការសាកល្បងដ៏សំខាន់ខ្លាំងមួយនេះបានធ្វើឡើងនារសៀលថ្ងៃសៅរ៍ ទី៧ ធ្នូនៅមូលដ្ឋានសូហេដែលជាទីតាំងបាញ់បញ្ជូនផ្កាយរណប។ អ្នកនាំពាក្យរូបនេះដដែលបានបន្ថែមថា លទ្ធផលនៃការសាកល្បងនេះនឹងមានឥទ្ធិពលដ៏សំខាន់ដែលឈានទៅផ្លាស់ប្តូរលក្ខន្តិកយុទ្ធសាស្ត្ររបស់កូរ៉េខាងជើង។
គួររម្លឹកថា មូលដ្ឋានសូហេស្ថិតនៅឆ្នេរសមុទ្រប៉ែកពាយព្យកូរ៉េខាងជើង និងដែលគេស្គាល់ឈ្មោះមួយទៀតហៅតុងឆាង-រី។ តាមធម្មតា សូហេ ឬតុងឆាង-រីជាមជ្ឈមណ្ឌលអវកាសមួយដែលក្រុងព្យុងយ៉ាងប្រើដើម្បីបាញ់បញ្ជូនផ្កាយរណបទៅដាក់ក្នុងតារាវិថី។ តែគេបានសង្កេតឃើញថា កូរ៉េខាងជើងបានឆ្លៀតប្រើទីតាំងមួយនេះដើម្បីបាញ់សាកល្បងគ្រាប់មីស៊ីលបាលីស្ទិក។ ទីតាំងសូហេ ឬតុងឆាង-រីនេះជាប្រធានបទស្នូលនៃជំនួបការទូតត្រីភាគីរវាងកូរ៉េខាងជើង កូរ៉េខាងត្បូង និងអាមេរិកតាំងពីជាង ១ឆ្នាំ។ នៅក្នុងជំនួបកំពូលក្នុងទីក្រុងសេអ៊ូលកាលពីខែកញ្ញា ឆ្នាំ ២០១៨ មេដឹកនាំកូរ៉េខាងជើងលោកគីម ជុងអ៊ុនបានសន្យាបិទទីតាំងសូហេ ឬតុងឆាង-រីនេះ។
កូរ៉េខាងជើងបន្តយុទ្ធសាស្រ្តច្រំដែលដើម្បីដាក់គំនាប
តែខុសពីការសន្យា ទីតាំងសូហេ ឬតុងឆាង-រីនេះមិនត្រូវបានបិទទេ ហើយរបបក្រុងព្យុងយ៉ាងក៏មិនបានបញ្ជាក់ពីមូលហេតុដែរ។ តែបើតាមមើលទៅ ប្រហែលមកពីលោកគីម ជុងអ៊ុនខកចិត្ត ឬមិនសប្បាយចិត្តនឹងការចរចាស្តីពីការរំសាយនុយក្លេអ៊ែររវាងកូរ៉េខាងជើង និងអាមេរិកដែលបន្តអូសបន្លាយ និងជាប់គាំង។ បើផ្អែកតាមទិន្នន័យផ្តល់ដោយផ្កាយរណប ការរៀបចំជួសជុលទីតាំងសូហេ ឬតុងឆាង-រីដើម្បីដាក់ឲ្យដំណើរឆាប់រហ័សត្រូវបានកូរ៉េខាងជើងចាប់ផ្តើមក្នុងខែមីនា។ នៅថ្ងៃព្រហស្បតិ៍ ទី ៥ ធ្នូ ពោល៣ថ្ងៃមុនការប្រកាសសាកល្បងរបស់កូរ៉េខាងជើង រូបភាពជាច្រើនផ្តល់ដោយផ្កាយរណបបានបង្ហាញរូបធុងធំបញ្ឈរមួយដែលបញ្ជាក់ពីត្រៀមបាញ់បញ្ជូនអ្វីមួយ នេះបើតាមលោក Jeffrey Lewis អ្នកជំនាញអាវុធនុយក្លេអ៊ែរប្រចាំអាស៊ីខាងកើត។
ថ្លែងបន្ថែមនៅមុនការប្រកាសរបស់កូរ៉េខាងជើង អ្នកជំនាញរូបនេះដដែលបានមើលឃើញពីសញ្ញាដែលរបបក្រុងព្យុងយ៉ាងហាក់កំពុងបង្កើនសកម្មភាពគ្រាប់មីស៊ីលកាន់តែខ្លាំងឡើងៗដើម្បីជាការគំនាបដាក់លើសហគមន៍អន្តរជាតិ ពិសេសលើអាមេរិក។ ស្របពេលគ្នានេះ ការសាកល្បងរបស់កូរ៉េខាងជើងពេលនេះបានធ្វើឡើង ក្នុងពេលដែលថ្ងៃឳសានវាទរបស់ក្រុងព្យុងយ៉ាងសម្រាប់ក្រុងវ៉ាស៊ីនតោនខិតចូលកាន់តែជិត។ ថ្ងៃឳសានវាទនោះ គឺថ្ងៃទី៣១ ធ្នូដែលកូរ៉េខាងជើងតម្រូវឲ្យអាមេរិករៀបចំសំណើថ្មីមួយជាមួយនឹងលក្ខខណ្ឌមួយចំនួនរបស់ខ្លួនដើម្បីផ្តល់សន្ទុះកិច្ចចរចាឡើងវិញ។ លក្ខខណ្ឌដែលក្រុងព្យុងយ៉ាងទាមទារចង់បាន គឺសុំឲ្យអាមេរិកឈប់ប្រើនយោបាយប្រឆាំងខ្លួន និងសុំឲ្យអាមេរិកលើកទណ្ឌកម្មសេដ្ឋកិច្ចចេញវិញ។
លោកត្រាំ និងលោកគីមបន្តប្រើធម៌ក្តៅ និងធម៌ត្រជាក់
ក្តីសង្ឃឹមរបស់លោកគីម ជុងអ៊ុននៅក្នុងជម្រើសយុទ្ធសាស្រ្តមួយនេះ គឺបង្ខំលោកដូណាល់ ត្រាំឲ្យពិនិត្យមើលឡើងវិញនូវនយោបាយអាមេរិកចំពោះកូរ៉េខាងជើង។ តែនេះមិនមែនជាលើកទី១ ហើយក៏ប្រហែលជាមិនមែនលើកចុងក្រោយទេដែលក្រុងព្យុងយ៉ាងបានប្រើវិធីសាស្រ្តច្រំដែលមួយនេះ។ កន្លងមក ទោះក្នុងពេលមានកិច្ចចរចាជាមួយអាមេរិក ឬក៏គ្មានក៏ដោយ ក៏ក្រុងព្យុងយ៉ាងតែងធ្វើការសាកល្បងនុយក្លេអ៊ែរ ឬគ្រាប់មីស៊ីលចម្ងាយជិត ឬឆ្ងាយ។ រហូតមកទល់ពេលនេះ ប្រធានាធិបតីអាមេរិកលោកដូណាល់ ត្រាំដែលបានជួបសន្ទនាជាមួយលោកគីម ជុងអ៊ុនដល់ទៅ ៣ដងតាំងពីខែមិថុនា ឆ្នាំ ២០១៨ តែងទប់ចិត្តនឹងការបង្ករឿងរបស់លោកគីម ជុងអ៊ុន។
លើកនេះ លោកត្រាំហាក់មិនទាន់បានបញ្ចេញប្រតិកម្មអ្វីចំពោះការសាកល្បងរបស់កូរ៉េខាងជើងពេលនេះទេ។ តែនៅក្នុងកិច្ចសន្ទនាតាមទូរស័ព្ទជាមួយសមភាគីកូរ៉េខាងត្បូងលោកមូន ចៃអ៊ីននាថ្ងៃសៅរ៍ ទី៧ ធ្នូ លោកត្រាំ និងលោកចៃអ៊ីនបានទទួលស្គាល់ដូចគ្នាពីស្ថានភាពធ្ងន់ធ្ងរនៅឧបទ្វីបកូរ៉េ។ ក៏ប៉ុន្តែ មេដឹកនាំទាំងពីរបានព្រមព្រៀងគ្នាពីការបន្តទុកផ្លូវចរចា និងកិច្ចសន្ទនាស្តីពីការរំសាយនុយក្លេអ៊ែរ។ ដោយឡែកក្នុងថ្ងៃសៅរ៍ ទី៧ ធ្នូដដែល ឯកអគ្គរដ្ឋទូតកូរ៉េខាងជើងប្រចាំអង្គការសហប្រជាជាតិលោកគីម សុងបែរជាបានថ្លែងថា កូរ៉េខាងជើងមិនត្រូវការមានការចរចាយូរអង្វែងជាមួយអាមេរិកទេ និងថា ការរំសាយនុយក្លេអ៊ែរក៏ត្រូវបានដកចេញពីតុចរចាហើយដែរ។
គួររម្លឹកថា កិច្ចចរចារវាងកូរ៉េខាងជើង និងអាមេរិកបានជាប់គាំងតាំងពីជំនួបគ្មានលទ្ធផលរវាងលោកត្រាំ និងលោកគីមលើកទី២ កាលពីខែកុម្ភៈក្នុងប្រទេសវៀតណាម។ គេនៅមិនទាន់ដឹងថា តើយុទ្ធសាស្រ្តរបស់គីម ជុងអ៊ុនពេលនេះនឹងអាចបង្ខំលោកដូណាល់ ត្រាំឲ្យពិចារណាឡើងវិញនូវជំហរអាមេរិកចំពោះកូរ៉េខាងជើងដែរ ឬទេ។ អ្វីដែលគេអាចនិយាយបានពេលនេះ លោកត្រាំ និងលោកគីមកំពុងបន្តលេងល្បែងធម៌ក្តៅ និងធម៌ត្រជាក់ដាក់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ