ប្រជាជនទីម័រខាងកើតជ្រើសរើសលោក Guterress ដែលជាអតីតទ័ពព្រៃ អោយធ្វើជាប្រធានាធិបតី
ចុះផ្សាយនៅថ្ងៃ៖
ស្តាប់ - ០៣:២៥
ទីម័រខាងកើតដែលជាប្រទេសលទ្ធិប្រជាធិបតេយ្យ មានវ័យក្មេងជាងគេក្នុងពិភពលោក បានរៀបចំការបោះឆ្នោតប្រធានាធិបតី កាលពីថ្ងៃចន្ទ២១មីនា។ លោក ហ្វ្រង់ស៊ីសស្កូ ហ្គុតទែររេស ដែលធ្លាប់ធ្វើជាអតីតទ័ពព្រៃមួយរូបនោះ បានទទួលជោគជ័យជាមួយសម្លេង៥៧ភាគរយ ឈ្នះលើបេក្ខជន៧នាក់ផ្សេងទៀត ដែលឈរឈ្មោះ។ លោកហ្គុតទែររេស ត្រូវឡើងកាន់កាប់ប្រទេសបន្តពីលោក តូវ ម៉ាតាំង រូអាកេ Taur Matan Ruak។
ទីម័រខាងកើតមិនចាំបាច់រៀបចុះការបោះឆ្នោតប្រធានាធីបតី ជុំទី២ នៅខែមេសាខាងមុខទេ ព្រោះតាំងតែពីជុំទី១ កាលពីថ្ងៃចន្ទ២១មីនា ប្រជាជនបាននាំគ្នាបោះឆ្នោតអោយលោក ហ្វ្រង់ស៊ីសស្កូ ហ្គុតទែររេស ដែលជាអតីតទ័ពព្រៃមួយរូបនោះ បានធ្វើជាប្រធានាធិបតីថ្មីទៅហើយ។
លោកហ្គុតទែររេស អាយុ៦៣ឆ្នាំ ទទួលបានសម្លេងឆ្នោត៥៧ភាគរយ ឈ្នះលើបេក្ខជន Antonio de Conceicao អង់តូញោ ដឺកុងសេកាវ ជាអតីតរដ្ឋមន្ត្រីក្រសួងអប់រំ ដែលទទួលបានសម្លេងឆ្នោត៣៣ភាគរយ។ លោកហ្គុតទែររេស គឺជាអ្នកឯករាជ្យនិយម ជាអតីតទ័ពព្រៃមួយរូប ដែលគេអោយរហ័សនាមថា លូ អូឡូ។
ក្នុងការបោះឆ្នោតនេះ គេសម្គាល់ឃើញថា បក្សនយោបាយសំខាន់ៗចំនួន២ គឺបក្សរណសិរ្សបដិវត្តន៍ដើម្បីឯករាជ្យទីម័រខាងកើត ហៅកាត់ថា Fretilinហ្វ្រេទីលីន និងបក្សកសាង ហៅកាត់ថា បក្សCNRT បានរួបរួមគ្នា ផ្តល់ការគាំទ្រដល់អតីតទ័ពព្រៃ ហ្គុតទែររេស។ គួរកត់សម្គាល់ដែរនោះ គឺ លោក សាណាណា ហ្គូសស្មាវ ដែលជាវីរជនដ៏ល្បីឈ្មោះ ក្នុងតស៊ូទាមទារឯករាជ្យនៅទីម័រខាងកើត ក៏បានគាំទ្របេក្ខភាព លោកហ្គុតទែររេសដែរ។
ការបោះឆ្នោតផ្តល់ជោគជ័យតាំងពីជុំទី១ទៅហើយ អោយលោកហ្គុតទែររេស ធ្វើជាប្រធានាធិបតីទីម័រថ្មី។ ការបោះឆ្នោតនេះ ជាការបោះឆ្នោតដំបូង គិតតាំងពីកងកម្លាំងរក្សាសន្តិភាពរបស់អង្គការសហប្រជាជាតិ បានចាកចេញពីទីម័រខាងកើត នៅឆ្នាំ២០១២មក។ កាលពីឆ្នាំ១៩៩៩ កងកម្លាំងអង្គការសហប្រជាជាតិបានចូលទៅទីម័រ ដើម្បីត្រួតពិនិត្យការបោះឆ្នោតប្រជាមតិ ស្តីពីការទាមទារឯករាជ្យពីឥណ្ឌូណេស៊ី។
ការបោះឆ្នោតប្រធានាធិបតី ខែមីនាឆ្នាំ២០១៧នេះ បង្ហាញថា ទីម័រដែលជាប្រទេសប្រជាធិបតេយ្យវ័យក្មេងខ្ចីជាងគេ កំពុងចាប់ផ្តើមបោះជើងសន្សឺមៗ ទៅរកការអភិវឌ្ឈន៍ហើយ។ ការរួបរួមគ្នារវាងបក្សសំខាន់ៗទាំង២ ដើម្បីសម្រេចបានការបោះឆ្នោត និងគាំទ្រដល់បេក្ខជនហ្គុតទែររេស ដែលជាអតីតទ័ពព្រៃនោះ ជាការចូលរួមដល់ស្ថិរភាពនយោបាយរបស់ទីម័រ។ លោកហ្គុតទែររេស ដែលទើបជាប់ឆ្នោតពេលនេះ ធ្លាប់ប្រកាសចង់អោយប្រព័ន្ធសុខាភិបាល អប់រំ និងកសិកម្ម មានលក្ខណៈប្រសើរជាងមុន ដើម្បីភាពសុខសាន្តរបស់ប្រជាជន។ ដូច្នេះ សម្រាប់ពេលតទៅមុខនេះ លោកហ្គុតទែររេស មានកាតព្វកិច្ចធំណាស់ ដើម្បីអាចសម្រេចពាក្យសន្យារបស់លោក។
សូមរំលឺកថា ទីម័រទទួលបានឯករាជ្យ នៅឆ្នាំ២០០២ ក្រោយមានសង្គ្រាមប្រឆាំងការឈ្លានពានរបស់ឥណ្ឌូណេស៊ី ដែលសម្លាប់មនុស្សរាប់សែននាក់។ ទីម័រមានប្រជាជនជាងមួយលាននាក់។ ក្រោយទីម័រទទួលបានឯករាជ្យ ហិង្សាក៏នៅតែកើតមាន។ ទីម័រខាងកើតនៅក្មេងខ្ចីណាស់ ហើយក៏ក្រីក្រជាងគេនៅអាស៊ីដែរ។ ប្រជាជន៤១ភាគរយ រស់ក្រោមបន្ទាត់នៃភាពក្រីក្រ។ ទីម័រនៅខ្វះហេដ្ឋារចនាសម្ព័ន្ធ ខណៈប្រជាជនគ្មានការងារធ្វើ មានច្រើនសន្ធឹកសន្ធាប់។
ប្រឈមនឹងបញ្ហាដែលត្រូវដោះស្រាយទាំងនេះ ធនធានប្រេងក្នុងស្រុកក៏ជិតហួតអស់ទៅហើយដែរ។ លោកហ្វ្រង់ស៊ីសស្កូ ហ្គុតទែររេស ដែលត្រូវឡើងធ្វើជាប្រធានាធិបតីក្នុងពេលខាងមុខ មានកាតព្វកិច្ចធំធេងណាស់ ព្រោះលោកត្រូវរកអោយបានកិច្ចព្រមព្រៀងជាមួយអូស្ត្រាលី ទាក់ទងនឹងកម្រៃចំណូលបានពីប្រេងនិងឧស្ម័ននៅសមុទ្រទីម័រ ដើម្បីបន្តដង្ហើមសេដ្ឋកិច្ចទីម័របានទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ