បេសកកម្មរក្សាសន្តិភាពរបស់អ.ស.ប.នៅទីម័រខាងកើតត្រូវបានបិទបញ្ចប់ជាផ្លូវការ
បេសកកម្មរក្សាសន្តិភាពរបស់អ.ស.ប. ប្រចាំនៅក្នុងប្រទេសទីម័រខាងកើត ត្រូវបានបិទបញ្ចប់ជាផ្លូវការ នៅថ្ងៃចន្ទ ៣១ធ្នូនេះ ក្រោយពីមានវត្តមាន អស់រយៈពេល ១៣ឆ្នាំ ចាប់តាំងពីពេលទីម័រខាងកើតទទួលឯករាជ្យពីឥណ្ឌូណេស៊ី កាលពីឆ្នាំ១៩៩៩។ ក្រោយពីបានឆ្លងកាត់សម័យអន្តរកាលប្រកបដោយកាលបង្ហូរឈាម ទីម័រខាងកើត ដែលជារដ្ឋក្មេងខ្ចីជាងគេបំផុត នៅអាស៊ី កំពុងរស់នៅក្នុងយុគសម័យសន្តិភាព ក៏ប៉ុន្តែ ត្រូវប្រឈមមុខនឹងបញ្ហាដ៏ធំមួយ គឺភាពក្រីក្រ។
ចុះផ្សាយនៅថ្ងៃ៖
ស្តាប់ - ០២:០១
កងកម្លាំងរក្សាសន្តិភាពរបស់អ.ស.ប. ដែលនាំមុខដោយអូស្រ្តាលី បានចាប់ផ្តើមដកចេញពីទីម័រខាងកើត តាំងពីខែតុលាមកម៉្លេះ ដោយចាប់ផ្តើមផ្ទេរកិច្ចការរក្សាសន្តិសុខទៅឲ្យកងកម្លាំងទីម័រខាងកើត។ នៅថ្ងៃចន្ទនេះ គឺជាថ្ងៃបិទបញ្ចប់បេសកកម្មជាផ្លូវការ។
គួររំឭកឡើងវិញថា កងកម្លាំងរក្សាសន្តិភាពរបស់អ.ស.ប.បានចាប់ផ្តើមបេសកកម្មនៅទីម័រខាងកើត កាលពីឆ្នាំ១៩៩៩ ដើម្បីត្រួតពិនិត្យមើលការបោះឆ្នោតប្រជាមតិ ស្តីពីការទាមទារឯករាជ្យពីប្រទេសឥណ្ឌូណេស៊ី។ នៅក្នុងការបោះឆ្នោតប្រជាមតិនេះ ប្រជាជនទីម័រខាងកើតយ៉ាងច្រើនលើសលុប បានបដិសេធមិនសុខចិត្តនៅជាខេត្តស្វយ័តរបស់ឥណ្ឌូណេស៊ី ហើយទាមទារចង់បង្កើតជារដ្ឋឯករាជ្យ។
នៅក្រោយការប្រកាសលទ្ធផលបោះឆ្នោតនេះ ក្រុមប្រដាប់អាវុធប្រឆាំងនឹងការបង្កើតរដ្ឋទីម័រឯករាជ្យ ដែលទទួលបាននូវការគាំទ្រពីឥណ្ឌូណេស៊ី ក៏បានចាប់ផ្តើមធ្វើការវាយប្រហារលើសកម្មជនគាំទ្រឯករាជ្យ ហើយទីម័រខាងកើតបានឆ្លងកាត់សម័យអន្តរកាល ដែលពោរពេញទៅដោយអំពើហិង្សា និងការបង្ហូរឈាម។
ទីម័រខាងកើតត្រូវបានប្រកាសបង្កើតជារដ្ឋឯករាជ្យជាផ្លូវការ នៅថ្ងៃទី២០ ខែឧសភា ឆ្នាំ២០០២ ហើយបានក្លាយទៅជាប្រទេសសមាជិកទី១៩១ របស់អ.ស.ប. នៅថ្ងៃទី២៧ កញ្ញាឆ្នាំដដែល។
កងកម្លាំងរក្សាសន្តិភាពរបស់អ.ស.ប. ត្រូវបានដកចេញពីទីម័រខាងកើតម្តងរួចមកហើយ ប៉ុន្តែ បានត្រឡប់មកវិញ នៅពេលមានការប៉ុនប៉ងធ្វើរដ្ឋប្រហារយោធា នៅឆ្នាំ២០០៦។
នៅក្នុងសេចក្តីថ្លែងការណ៍ ពេលបិទបញ្ចប់បេសកកម្មជាផ្លូវការថ្ងៃនេះ ប្រមុខកងកម្លាំងអ.ស.ប.ប្រចាំទីម័រខាងកើតបានលើកឡើងថា ការបិទបញ្ចប់បេសកកម្មនេះមិនមែនមានន័យថា ជាការបិទបញ្ចប់ភាពជាដៃគូរវាងអ.ស.ប. និងទីម័រខាងកើតនោះទេ ដោយសារតែទីម័រខាងកើត នៅមានបញ្ហាប្រឈមធំៗជាច្រើនទៀត។
បើទោះជាមានសន្តិភាពហើយក៏ដោយ ក៏ទីម័រខាងកើត នៅតែជាប្រទេសដ៏ក្រីក្របំផុតមួយ នៅក្នុងតំបន់អាស៊ី។ ទីម័រខាងកើតនឹងត្រូវពឹងលើជំនួយពីបរទេស ក្នុងរយៈពេលជាច្រើនឆ្នាំទៀត ដើម្បីអភិវឌ្ឍប្រទេស និងកាត់បន្ថយភាពក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ