ប៉ូលីសចាប់ខ្លួនជន៦នាក់ពីបទគំរាមសម្លាប់សមាជិកសភាថ្មីដែលគាំទ្រស្វ័យភាពនៅហុងកុង
នៅហុងកុង ជនចំនួន៦នាក់ ត្រូវបានប៉ូលីសចាប់ខ្លួននៅថ្ងៃពុធ២១កញ្ញានេះ ពីបទធ្វើការគំរាមសម្លាប់សមាជិកសភាហុងកុងថ្មីមួយរូបដែលទើបជាប់ឆ្នោតកាលពីដើមខែកញ្ញា។ លោក Eddie CHUE គឺជាក្រុមអ្នកតំណាងរាស្រ្តថ្មី ដែលជាអ្នកគាំទ្រការទាមទារស្វ័យភាពនៅហុងកុង។ ប្រព័ន្ធផ្សព្វផ្សាយហុងកុង បានអះអាងថា ក្នុងចំណោមជនសង្ស័យចំនួន៦នាក់ខ្លះ ជាសមាជិកនៃអង្គការ Mafia ចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
លោក Eddie CHUE ជាអ្នកតំណាងរាស្ត្រមួយរូបក្នុងចំណោមក្រុមអ្នកតំណាងរាស្រ្តថ្មីមួយក្តាប់តូចដែលមានជំហររឹងរូសទាមទារស្វ័យភាពឲ្យហុងកុងនិងដែលទើបនឹងជាប់ឆ្នោតកាលពីដើមខែកញ្ញា។ ក្រុមអ្នកតំណាងរាស្ត្រហុងកុងនេះ ជាពួកអ្នកទាមទារចង់ឲ្យហុងកុងដកខ្លួនឆ្ងាយពីទីក្រុងប៉េកាំង និយាយម្យ៉ាងទៀត គឺចង់ទាមទារឯករាជ្យទាំងស្រុងនៅហុងកុងតែម្តង។
ដោយហេតុមានការគំរាមសម្លាប់ពីអង្គការMafia ចិន ទើបប៉ូលីសហុងកុង ចាត់វិធានការសន្តិសុខយ៉ាងម័តធ្យ័តបំផុតដើម្បីការពាររូប លោក Eddie CHUE និងក្គ្រួសាររបស់គាត់។ ទន្ទឹមនេះ ប៉ូលីសហុងកុង បានប្រកាសប្រាប់ពីការចាប់ខ្លួនជនសង្ស័យ ៦នាក់នៅព្រឹកព្រលឹមថ្ងៃចន្ទនេះ ពីបទគំរាមសម្លាប់អ្នកតំណាងរាស្រ្តតែដោយពុំបានបញ្ជាក់អ្វីទៀតឡើយ។
ក៏ប៉ុន្តែបើយោងតាមសាព័ត៌មាន South China Post ដែលបានពីប្រភពប៉ូលីស បានឲ្យដឹងថា” ក្នុងចំណោមជនសង្ស័យទាំង៦នាក់នោះ មានខ្លះជាសមាជិកអង្គការ Mafia ចិន។
គួរបញ្ចាក់ថា លោក Eddie CHUE គឺ ជាអ្នកតំណាងរាស្ត្រខាងការពារបរិស្ថានដ៏ស្វិតស្វាញមួយរូបដែល បានធ្វើយុទ្ធនាការយ៉ាងផុសផុលប្រឆាំងទល់នឹងការបំផ្លិចបំផ្លាញកេរ្ត៍ដំណែលនៅហុងកុង ដើម្បីជាផលប្រយោជន៍ឲ្យដល់ក្រុមហ៊ុនសាង់សង់លំនៅស្ថាន។ គាត់ក៏មិនរេរាឡើយក្នុងការតវ៉ាប្រឆាំងទល់នឹងក្រុមហ៊ុនសាងសង់លំនៅ ដើម្បីជួយការពារផលប្រយោជន៍របស់ប្រជាជនក្រីក្រនៅតាមជនបទ ដោយសន្យាថា លោកនឹងប្រយុទ្ធកំចាត់ទល់នឹងពួកអ្នកមានអំណាចនៅតាមតំបន់ជនបទដែលជាប់ចោទពីបទប្រព្រឹត្តអំពើឧក្រឹដ្ឋកម្ម។
តាំងពីជាយូរអង្វែងមក អង្គការ Mafia ចិនតែងតែរកស៊ីខាងរត់ពន្ធគ្រឿងញាន ខាងពេស្យាចារ ឬក៏បើកទីតាំងលេងល្បែងស៊ីសងនឹងធ្វើការជំរិតទារលុយជាដើម ក៏ប៉ុន្តែបច្ចុប្បន្ននេ ពួកបនទុច្ចរិតចិន បានលាក់មុខយ៉ាងរំភើយក្រោមមុខរបរផ្សេងៗទៀត ដូចជានៅលើវិនិយោគទុននៅហុងកុងដែលកាន់តែកើនច្រើនឡើងៗជាអាទិ៍នៅក្នុងសកម្មភាពស្របច្បាប់ដូចជានៅលើវិស័យអចលនវត្ថុឬក៏នៅលើវិស័យហិរញ្ញវត្ថុជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ