ជប៉ុន៖អធិរាជអាគីហ៊ីតូទម្លាយជាសាធារណៈពីបំណងចង់ដាក់រាជ្យសម្បត្តិ
ចុះផ្សាយនៅថ្ងៃ៖
ស្តាប់ - ០៧:១៧
នៅក្នុងប្រទេសជប៉ុន អធិរាជអាគីហ៊ីតូដែលមានព្រះជន្ម ៨២ព្រះវស្សាបានទម្លាយឲ្យដឹងជាសាធារណៈក្នុងថ្ងៃចន្ទ ទី៨សីហាពីបំណងចង់ដាក់រាជ្យ ដោយប្រគល់រាជ្យបល្ល័ង្កទៅឲ្យបុត្រាព្រះអង្គណារូហ៊ីតូ។ ព្រះចៅអាគីហ៊ីតូបានលើកឡើងពីបញ្ហាសុខភាព ភាពចាស់ជរា និងកាយសម្បទាទ្រុឌទ្រោម។ ប្រតិកម្មភ្លាមៗក្នុងថ្ងៃនេះ លោកនាយករដ្ឋមន្រ្តីស្ហ៊ីនហ្សូ អាបេបានបញ្ជាក់ថា លោកយល់ពីបន្ទូលរបស់ព្រះចៅអាគីហ៊ីតូ និងសន្យាយកបន្ទូលរបស់ព្រះអង្គទៅពិភាក្សាយ៉ាងយកចិត្តទុកដាក់ជាទីបំផុត។ តែយ៉ាងណាក៏ដោយ ការដាក់រាជ្យរបស់អធិរាជនៅជប៉ុនតម្រូវឲ្យមានការប្រែលើមាត្រាច្បាប់មួយចំនួន។
ព័ត៌មានស្តីពីបំណងចង់ដាក់រាជ្យរបស់អធិរាជជប៉ុនអាគីហ៊ីតូធា្លប់បានលេចឮម្តងហើយកាលពីជាង ៣សប្តាហ៍មុន។ តែគេអាចនិយាយបានថា នៅលើកនេះ គឺជាព័ត៌មានផ្លូវការ ព្រោះជាដំណឹងដែលព្រះចៅអាគីហ៊ីតូបានមានបន្ទូលផ្ទាល់មាត់ព្រះអង្គនៅក្នុងសង្គថាជាវីដេអូរយៈពេល ១៥នាទីក្នុងថ្ងៃចន្ទ ទី៨ សីហា។ គួររម្លឹកជូនថាកាលពីជិត ១ខែមុន ពោលក្នុងថ្ងៃទី១៣ កក្កដា ព័ត៌មានស្តីពីបំណងចង់ដាក់រាជ្យរបស់អធិរាជអាគីហ៊ីតូត្រូវបានផ្សព្វផ្សាយដោយសារព័ត៌មានក្នុងស្រុក តែត្រូវបានវិមានអធិរាជចេញសេចក្តីថ្លែងការណ៍បដិសេធភ្លាមៗក្នុងថ្ងៃដដែលនោះ។
តែនៅក្នុងសារវីដេអូផ្សាយជាសាធារណៈនាថ្ងៃចន្ទ ទី៨ សីហានេះ ព្រះចៅអាគីហ៊ីតូបានមានបន្ទូលផ្ទាល់ដោយសម្តែងក្តីបារម្ភពីសមត្ថភាពរបស់ព្រះអង្គក្នុងការបន្តសោយរាជ្យរហូតដល់ដង្ហើមជីវិតចុងក្រោយ។ ព្រះចៅអាគីហ៊ីតូបានបញ្ជាក់ច្បាស់ៗថាសព្វថ្ងៃនេះ ព្រះអង្គនៅមានសុខភាពល្អ តែព្រះអង្គបានសម្គាល់ឃើញពីស្ថានភាពសុខភាពថមថយ ភាពជរា និងកាយសម្បទាកាន់តែទ្រុឌទ្រោមទៅៗ។ គឺស្ថានភាពសុខភាពថមថយ ភាពជរា និងកាយសម្បទាកាន់តែទ្រុឌទ្រោមទៅៗនេះហើយដែលព្រះចៅអាគីហ៊ីតូយល់ឃើញថា ព្រះអង្គអាចនឹងគ្មានសមត្ថភាពក្នុងការបំពេញតួនាទីឲ្យបាន ១០០% ក្នុងនាមជានិមិត្តរូបនៃរដ្ឋ និងឯកភាពនៃប្រជារាស្រ្ត។
នៅក្នុងព្រះរាជ្យសង្កថាជាវីដេអូដដែល ព្រះចៅអាគីហ៊ីតូក៏បានលើកឡើងពីអាយុ ៨២ឆ្នាំរបស់ព្រះអង្គដែលជាអាយុមានការភ្លេចភ្លាំងច្រើន និងអាចឲ្យមានការប្រព្រឹត្តកំហុសឆ្គងធ្ងន់ធ្ងរដោយអចេតនា។ សូមបញ្ជាក់ជូនថា ព្រះចៅអាគីហ៊ីតូមិនបានប្រើពាក្យ « ដាក់រាជ្យ » នៅក្នុងសាររបស់ព្រះអង្គទេ ព្រោះច្បាប់រដ្ឋធម្មនុញបានហាម។ តែពាក្យពេចន៍ដែលព្រះអង្គបានមានបន្ទូលនាំឲ្យគេយល់បានថា ព្រះអង្គមិនចង់បន្តសោយរាជ្យជាអធិរាជទៀតទេ ពោលចង់ផ្ទេររាជ្យបល្ល័ង្កទៅឲ្យបុត្រាព្រះអង្គម្ចាស់ណារូហ៊ីតូដែលមានអាយុ ៥៦ឆ្នាំ។
អធិរាជអាគីហ៊ីតូមិនចង់បានស្ថានភាពដូចបិតាអធិរាជហ៊ីរ៉ូហ៊ីតូ
ព្រះចៅអាគីហ៊ីតូបានឡើងសោយរាជ្យតាំងពីឆ្នាំ ១៩៨៩ ពោលក្រោយការចូលទីវង្គតរបស់បិតាហ៊ីរ៉ូហ៊ីតូក្នុងឆ្នាំ ១៩៨៩។ អធិរាជហ៊ីរ៉ូហ៊ីតូបានសោយរាជ្យរបស់ដល់ដង្ហើមជីវិតចុងក្រោយរបស់ព្រះអង្គ។ តែព្រះចៅអាគីហ៊ីតូមិនចង់សោយរាជ្យរហូតដល់ជីវិតចុងក្រោយដូចព្រះបិតាទេ។ បើគេសម្លឹងមើលរាងកាយព្រះចៅអាគីហ៊ីតូពីខាងក្រៅ ព្រះអង្គហាក់បីដូចមានសុខភាពល្អ និងនៅមាំទាំ។ តែគេមិនត្រូវភ្លេចនិយាយទេថា ព្រះអង្គធ្លាប់មានបញ្ហាសុខភាពជាច្រើនករណីនារយៈពេលចុងក្រោយនេះ រួមមាន ការវះកាត់បេះដូង ព្យាបាលជម្ងឺមហារីកក្រពេញប្រូស្តាត និងជម្ងឺសួតជាដើម។ គឺជាជម្ងឺប្រចាំកាយដែលបានបង្ខំព្រះអង្គឲ្យកាត់បន្ថយការងារផ្លូវការមួយចំនួនក្នុងនាមជាអធិរាជ។
កន្លងមក ព្រះអង្គក៏ធ្លាប់បានបញ្ជាក់ប្រាប់មិត្តភក្តិ និងមនុស្សជិតដិតជាច្រើននាក់ពីបញ្ហាសុខភាព រួមទាំងក្តីបារម្ភរបស់ព្រះអង្គក្នុងការបំពេញកាតព្វកិច្ចជាអធិរាជឲ្យបាន ១០០%។ ក្នុងខែធ្នូ ឆ្នាំ ២០១៥ ព្រះចៅអាគីហ៊ីតូធ្លាប់បានបញ្ជាក់ពីការប្រព្រឹត្តិកំហុសឆ្គងមួយចំនួននៅក្នុងពិធីមួយដោយសារតែជម្ងឺចាស់ជរាភ្លេចភ្លាំង។ ព្រះចៅអាគីហ៊ីតូអាចនឹងបន្តសោយរាជ្យរហូតដល់ដង្ហើមចុងក្រោយដូចព្រះបិតារបស់ព្រះអង្គព្រះចៅហ៊ីរ៉ូហ៊ីតូបាន តែមកពីព្រះអង្គមិនចង់បានស្ថានការណ៍ដូចព្រះបិតា។ ព្រះចៅអាគីហ៊ីតូយល់ឃើញថា ការផ្ទេររាជ្យបល្ល័ង្ករវាងមនុស្សមានជីវិតដូចគ្នា វាល្អជាងរវាងមនុស្សចូលទីវង្គត និងមនុស្សមានជីវិត។ អ្វីដែលព្រះចៅអាគីហ៊ីតូចង់បាន និងឃើញនៅចំពោះមុខ គឺការផ្ទេររាជ្យបល្ល័ង្កពីព្រះអង្គទៅឲ្យព្រះអង្គណារូហ៊ីតូដែលជាបុត្រា។
ទន្ទឹមគ្នានេះ មានការលើកឡើងថា ព្រះចៅអាគីហ៊ីតូចង់យកគំរូតាមប្រមុខសង្ឃកាតូលិកសម្តេចប៉ាប Benoît ទី១៦ ដែលយល់ព្រមបោះបង់តំណែងក្នុងឆ្នាំ ២០១៣ ឬមួយក៏យកគំរូតាមមហាក្សត្រីប្រទេសហូឡង់ Béatrice ដែលបានដាក់រាជ្យកាលពីឆ្នាំ ២០១៣ ក្នុងព្រះជន្ម ៧៥ព្រះវស្សា។
ត្រូវការកែប្រែច្បាប់រដ្ឋធម្មនុញ្ញដើម្បីអាចដាក់រាជ្យបាន
ប្រតិកម្មភ្លាមៗនៅក្រោយព្រះរាជ្យសង្កថារបស់អធិរាជអាគីហ៊ីតូ លោកនាយករដ្ឋមន្រ្តីស្ហ៊ីនហ្សូ អាបេបានបញ្ជាក់ថា លោកសន្យានឹងយកបន្ទូលរបស់ព្រះអង្គទៅពិភាក្សាយ៉ាងយកចិត្តទុកដាក់ជាទីបំផុត។ តាមរយៈពាក្យសម្តីរបស់លោកអាបេនាំឲ្យគេនិយាយបានថា ដំណើរការដាក់រាជ្យរបស់អធិរាជអាគីហ៊ីតូអាចចាប់ផ្តើមបាន។ ក៏ប៉ុន្តែ អ្វីៗមិនមែនងាយស្រួលដូចការនិយាយទេ។ នៅប្រទេសជប៉ុន ច្បាប់មិនបានចែងពីការដាក់រាជ្យរបស់អធិរាជទេ ហើយអធិរាជអង្គឯងក៏គ្មានសិទ្ធិនឹងប្រើពាក្យចង់ដាក់រាជ្យដែរ។
ដើម្បីអាចឲ្យអធិរាជប្រកាសដាក់រាជ្យបាន គេត្រូវការកែប្រែច្បាប់មួយស្តីពីការសោយរាជ្យដែលបានអនុម័តតាំងពីឆ្នាំ ១៩៤៦។ ម្យ៉ាងទៀត ដើម្បីអាចកែប្រែច្បាប់បាន ព្រះចៅអាគីហ៊ីតូក៏ត្រូវការសុំយោបល់ពីប្រជារាស្រ្តជាមុនដែលមិនមែនជារឿងងាយស្រួលឡើយ។ ព្រះចៅអាគីហ៊ីតូជាអធិរាជដែលកំពុងមានប្រជាប្រិយភាពខ្លាំងនៅក្នុងចំណោមមហាជនជប៉ុន ព្រោះប្រជារាស្រ្តជប៉ុនចាត់ទុកជាអធិរាជដែលស្ថិតក្បែររាស្រ្ត និងយកចិត្តទុកដាក់ខ្លាំងចំពោះរាស្រ្ត។ ប្រជារាស្រ្តជប៉ុន ៩០% បានចាត់ទុកកិច្ចការរបស់អធិរាជថាមានសារៈសំខាន់ តែចង់ឲ្យមានការកាត់បន្ថយខ្លះ។
សូមជម្រាបជូនថា ច្បាប់ជប៉ុនបានហាមអធិរាជមិនឲ្យលូកលាន់ក្នុងរឿងនយោបាយទេ ពោលបានដើរតួនាទីត្រឹមជានិមិត្តរូបនៃរដ្ឋ និងឯកភាពនៃប្រជារាស្រ្ត។ តួនាទីសំខាន់របស់អធិរាជ គឺចុះហត្ថលេខាលើអត្ថបទច្បាប់ សន្ធិសញ្ញា និងឯកសារផ្សេងៗដែលរដ្ឋាភិបាលបានបញ្ជូនឲ្យ ចូលរួមនៅក្នុងពិធីធំៗ សំខាន់ៗជាផ្លូវការ និងទទួលជួបបដិសណ្ធារកិច្ចអ្នកតំណាងថ្នាក់ដឹកនាំបរទេសជាដើម។
ប្រតិកម្មរបស់លោកនាយករដ្ឋមន្រ្តីស្ហ៊ីនហ្សូ អាបេចំពោះព្រះរាជសង្គថារបស់អធិរាជអាគីហ៊ីតូអាចជាការបើកផ្លូវឆ្ពោះទៅធ្វើវិសោនកម្មច្បាប់រដ្ឋធម្មនុញ្ញស្តីពីវិមានអធិរាជ។ តែផ្លូវដែលត្រូវដើរនៅវែងឆ្ងាយ ព្រោះសូម្បីតែរវាងលោកអាបេ និងអធិរាជអាគីហ៊ីតូក៏មិនសូវចុះសម្រុងគ្នាលើបញ្ហាមួយរបស់ប្រទេសដែរ ពិសេសទាក់ទងនឹងគម្រោងកំណែទម្រង់ច្បាប់រដ្ឋធម្មនុញ្ញសន្តិភាពរបស់ជប៉ុន។ លោកអាបេចង់ធ្វើការកែប្រែ តែព្រះចៅអាគីហ៊ីតូចង់រក្សាទុកក្នុងគោលដៅសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ