ឥណ្ឌា តោងដៃជប៉ុនដើម្បីអភិវឌ្ឍន៍នុយក្លេអ៊ែរស៊ីវិលនិងរថភ្លើងល្បឿនលឿន
នៅក្នុងរយៈពេលពីរបីឆ្នាំទៀត គេអាចធ្វើដំណើរឆ្លងកាត់ឥណ្ឌាពីជើងទៅត្បូង ពីលិចទៅកើត ដោយរថភ្លើងល្បឿនលឿនបានហើយ។ ជប៉ុនគឺជាអ្នកផលិតរថភ្លើងទំនើបថ្មីលឿនថ្លេវនេះ នៅក្នុងប្រទេសឥណ្ឌាតែម្តង។ នេះជាសេចក្តីប្រកាសរបស់លោកនាយករដ្ឋមន្ត្រីឥណ្ឌា ណារិនដ្រា ម៉ូឌី បន្ទាប់ពីបានជួបពិភាក្សាជាមួយសមភាគីជប៉ុន លោក ស៊ីនហ្សូ អាបេ រួចភ្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
“នេះជាគម្រោងដែលផ្តល់សន្ទុះអភិវឌ្ឍន៍ថ្មីដល់វិស័យអយស្ម័យយានឥណ្ឌា និងពន្លឿនឥណ្ឌាទៅថ្ងៃអនាគត។ ព្រោះវិស័យនេះនឹងក្លាយទៅជាម៉ាស៊ីនប្តូរផ្លាស់មុខមាត់សេដ្ឋកិច្ចឥណ្ឌា” ! នេះជាប្រសាសន៍របស់លោក ម៉ូឌី នាយករដ្ឋមន្ត្រីឥណ្ឌា ក្រោយជំនួបជាមួយសមភាគីជប៉ុន លោក ស៊ីនហ្សូ អាបេរួច។ ប្រព័ន្ធផ្លូវដែកឥណ្ឌា ដែលមានវ័យចំណាស់ និងទ្រុឌទ្រោម ខ្វះការវិនិយោគខ្លាំងណាស់ ហេតុដូច្នេះហើយបានជាលោកម៉ូឌី បានឆ្លៀតឱកាសសន្យា ធ្វើទំនើបកម្មហេដ្ឋារចនាសម្ព័ន្ធផ្លូវដែក តាមរយៈកិច្ចព្រមព្រៀងជាមួយជប៉ុន។
មិនតែប៉ុណ្ណោះ ប្រមុខដឹកនាំរដ្ឋាភិបាលទាំងពីរ ក៏បានព្រមព្រៀងគ្នាចុះហត្ថលេខាលើពិធីសារ ស្តីពីអំពីកិច្ចសហប្រតិបត្តិការឥណ្ឌា-ជប៉ុន ក្នុងវិស័យនុយក្លេអ៊ែរស៊ីវិល។ ប៉ុន្តែពុំទាន់ឈានដល់ការចុះហត្ថលេខានៅឡើយទេ ព្រោះភាគីទាំងពីរ ត្រូវសម្អិតសម្អាង លើចំណុចលម្អិតមួយចំនួនទៀតសិន។ នេះបើតាមការគូសបញ្ជាក់របស់អ្នកនាំពាក្យក្រសួងការបរទេសឥណ្ឌា លើទំព័រប្រព័ន្ធសង្គមTwitter។
តាមការពិតជប៉ុន ធ្លាប់បានបដិសេធមិនព្រមសហការជាមួយឥណ្ឌា ក្នុងវិស័យនុយក្លេអ៊ែរនេះ ជាយូរមកហើយ ព្រោះតែក្រុងញូវដាលី មិនបានផ្តល់សច្ចាប័នលើសន្ធិសញ្ញាមិនរីករាយសាយភាយនុយក្លេអ៊ែរ។ ប៉ុន្តែនៅពេលនេះ ថ្ងៃនេះ ជប៉ុនមានទំនោរបន្ទន់ជំហរដាក់ឥណ្ឌា ប្រទេសមហានុយក្លេអ៊ែរដ៏ធំមួយប្រចាំតំបន់ ក៏ទំនងដោយហេតុតែតូក្យូ បាននិងកំពុងមើលឃើញឥទ្ធិពលរបស់ចិនស្ទុះឡើងខ្លាំង។ នេះបើតាមទស្សនៈអ្នកវិភាគមួយចំនួនធំ។
សូមបញ្ជាក់ថា លោក ម៉ូឌី និងលោក អាបេ មានទំនាក់ទំនងល្អូកល្អើននឹងគ្នាណាស់។ ភាពស្និទ្ធស្នាលនេះ បានកើតមានឡើង តាំងពីមុនការឡើងកាន់អំណាចរបស់លោកម៉ូឌី កាលពីខែឧសភា ឆ្នាំ២០១៤ទៅទៀត។ ប្រមុខដឹកនាំទាំងពីររូបនេះ គឺជាអ្នកអភិរក្សនិយម និងមាននិន្នាការជាតិនិយមខ្លាំងដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ