អង់គ្លេសបញ្ជោរយកចិត្តនាយករដ្ឋមន្ត្រីឥណ្ឌា ក្នុងពេលទស្សនកិច្ច
លោក ណារិន្រ្ទ ម៉ូឌី ដែលកំពុងតែបំពេញទស្សនកិច្ច នៅទីក្រុងឡុងដ៍ រដ្ឋធានីអង់គ្លេស ត្រូវបានគេទទួលយ៉ាងអធិកអធម្ម ពីគ្រប់ស្ថាប័នរដ្ឋអង់គ្លេស។ ក្រៅពីមានការជួបជុំដ៏សម្បើម ជាមួយប្រជាជនអង់គ្លេស ដើមកំណើតឥណ្ឌា ប្រមាណ៦ម៉ឺននាក់ លោក នាយករដ្ឋមន្ត្រីឥណ្ឌា ក៏នឹងត្រូវទទួលឲ្យចូលទៅបង្គំគាល់ ព្រះមហាក្សត្រអង់គ្លេស ម្ចាស់ក្សត្រី អេលីហ្សាប៊ែត ទី២ ផងដែរ។ ការរៀបចំទទួលដ៏គគ្រឹកគគ្រេងបែបនេះ ត្រូវបានគេមើលឃើញថា ជាចេត្តនាពេញមុខ របស់អង់គ្លេស ដែលចង់ ក្រេបយកផលពីយកទីផ្សារសេដ្ឋកិច្ចនៅឥណ្ឌា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
លោក ណារិន្ទ្រ ម៉ូឌី នាយករដ្ឋមន្ត្រីឥណ្ឌា កំពុងតែបំពេញទស្សនកិច្ច រយៈពេល៣ថ្ងៃ នៅប្រទេសអង់គ្លេស។ ទស្សនកិច្ច ដែលមានគោលដៅសំខាន់ គឺដើម្បីចុះហត្ថលេខា លើកិច្ចសន្យាពាណិជ្ជកម្មធំៗមួយចំនួន ហើយទស្សនកិច្ចនេះ ក៏ជានិម្មិតរូបផងដែរ សំរាប់ឥណ្ឌា ដែលកំពុងតែអណ្តែតខ្លួន ក្លាយជាមហាអំណាចសេដ្ឋកិច្ចពិភពលោក។ ឥណ្ឌាជាមហាអំណាចសេដ្ឋកិច្ច ដ៏ធំមួយនៅអាស៊ី ដែលកំពុងតែទាក់ទាញមហាអំណាចផ្សេងៗ ឲ្យចូលទៅវិនិយោគ រកស៊ីជាមួយ។
ជាការពិត អង់គ្លេស បានបញ្ចេញគ្រប់មធ្យោបាយ ដើម្បីយកចិត្តលោកនាយករដ្ឋមន្ត្រីឥណ្ឌា ក្នុងពេលទស្សនកិច្ចនេះ ដោយបានរៀបចំទទួលយ៉ាងអធិកអធម្ម។ បន្ទាប់ពីត្រូវបានស្វាគមន៍ដោយ កងរាជសេនាអង់គ្លេស ពិធីព្យុហយាត្រាយោធាអាកាស ត្រូវបានរៀបចំឡើង ដើម្បីបង្ហាញភ្ញៀវពិសេសរូបនេះ។ បន្ថែមពីនេះ លោកណារិន្ទ្រ ម៉ូឌី បានទទួលទានអាហារ ក្រោមពន្លឺភ្លើងទៀន ជាមួយនឹងលោក នាយករដ្ឋមន្ត្រីអង់គ្លេស ដាវីដ ខាមឺរ៉ុន ទៀតផង។
លោកនាយករដ្ឋមន្រី្តឥណ្ឌា ត្រូវបានអញ្ជើញឲ្យធ្វើសន្ទរកថា នៅចំពោះមុខតំណាងរាស្ត្ររបស់អង់គ្លេស ហើយមិនត្រឹមតែប៉ុណ្ណោះ លោកនឹងត្រូវអនុញ្ញាត ឲ្យចូលគាល់ព្រះមហាក្សត្រីអេលីហ្សាប៊ែត ទី២ទៀតផង។ ប៉ុន្តែព្រឹត្តិការណ៍មួយទៀត ដ៏អស្ចារ្យ ដែលរដ្ឋាភិបាលអង់គ្លេស បានរៀបចំជូនលោក ណារិន្រ្ទ ម៉ូឌី គឺពិធីជួបជុំ ជាមួយប្រជាជនអង់គ្លេសដើមកំណើតឥណ្ឌា ប្រមាណជា៦ម៉ឺននាក់ នៅក្នុងពហុកីឡាដ្ឋាន Wembley។
ពេលនេះ សំណើចកំពុងតែចំអកឲ្យព្រហ្មលិខិត បើយើងក្រលេកមើលទៅប្រវតិ្តសាស្ត្រ រវាងចក្រភពអង់គ្លេស និងឥណ្ឌា។ ឥណ្ឌា ដែលធ្លាប់ស្ថិតក្រោមនឹមអាណានិគម ដ៏ជូរចត់របស់ចក្រភពអង់គ្លេស ពេលនេះ កំពុងតែត្រូវបានអតីតចៅហ្វាយខ្លួន ប្រឹងយកចិត្តយកថ្លើម នោះក៏ដោយសារតែពេលនេះ ឥណ្ឌាមិនមែនជាកូនចៀមទន់ខ្សោយទៀតទេ តែឥណ្ឌា ជាមហាអំណាចសេដ្ឋកិច្ចទី៩ និងជាខ្លាដែលកំពុងតែគ្រហឹម ក្នុងទ្វីបអាស៊ី។ ជាមួយនិងចំនួនប្រជាជនដ៏ច្រើនលើសលប់ ព្រមទាំងធនធានមនុស្សផ្នែកបច្ចេកវិទ្យាទំនើប ឥណ្ឌាជាទីផ្សារដ៏សំខាន់ មិនថាសម្រាប់អង់គ្លេស រឺមហាអំណាចផ្សេងទៀតទេ។ កិច្ចសន្យាពាណិជ្ជកម្ម ក្នុងទឹកប្រាក់ ១២ពាន់លានដុល្លារ ទើបតែត្រូវបានចុះហត្ថលេខា ក្នុងពេលទស្សនកិច្ចនេះ រវាងឥណ្ឌា និងអង់គ្លេស។
តែយ៉ាងណាក៏ដោយ ទស្សនកិច្ចជាកិត្តិយស ដ៏សម្បើមរបស់លោកណារិន្រ្ទ ម៉ូឌី មិនបានប្រព្រឹត្តិទៅ ដោយគ្មានការរិះគន់តវ៉ានោះទេ។ សមាគម និងសហគមប្រជាជនឥណ្ឌា នៅអង់គ្លេសជាច្រើន បានរៀបចំធ្វើបាតុកម្ម ប្រឆាំង ដោយបានបរិហារ អំពីនយោបាយ ដឹកនាំ ដែលកាន់តែផ្តាច់ការទៅៗ របស់លោកនាយករដ្ឋមន្ត្រីឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ