ប៉េកាំងរៀបចំបើកកិច្ចចរចាជាន់ខ្ពស់ជាមួយតូក្យូ
នៅថ្ងៃព្រហស្បតិ៍ទី ១៦ កក្កដានេះ ក្នុងខណៈដែលសភាជប៉ុនបានអនុម័តគម្រោងច្បាប់សន្តិសុខជាតិ ពង្រីកសកម្មភាពយោធាជប៉ុននៅបរទេស ក្រុងប៉េកាំងបានប្រកាសកំពុងត្រៀមបើកកិច្ចចរចានយោបាយជាន់ខ្ពស់ជាមួយជប៉ុន។ សេចក្តីជូនដំណឹងដែលធ្វើឡើងដោយអតីតរដ្ឋមន្ត្រីការបរទេសចិន យ៉ាង ជៀជី បច្ចុប្បន្នជាសមាជិកក្រុមប្រឹក្សារដ្ឋ នៅចំពោះមុខប្រធានក្រុមប្រឹក្សាសន្តិសុខជាតិជប៉ុន លោក ស្ហូតារ៉ូ យ៉ាស្ហ៊ី ដែលកំពុងបំពេញទស្សនកិច្ចនៅក្រុងប៉េកាំង។
ចុះផ្សាយនៅថ្ងៃ៖
ចិនផ្តល់តម្លៃ និងត្រៀមជាស្រេចនឹងបើកជំនួបចរចាជាន់ខ្ពស់ចិន-ជប៉ុន ! ប្រធានាធិបតីចិនលោក ស៊ីជីនពីង និងនាយករដ្ឋមន្ត្រីជប៉ុន លោក ស្ហ៊ីនហ្សូ អាបេ ទំនងជានឹងអាចត្រូវជួបគ្នាក្នុងជំនួបកំពូលនាខែកញ្ញាខាងមុខតែម្តង ដូចអ្វីដែលមានលាន់ឮក្នុងពាក្យចចាមអារាមប៉ុន្មានថ្ងៃមកនេះ។
កាលពីសប្តាហ៍មុន សារព័ត៌មានចិន បានបង្ហើបថា លោក ស៊ីជីនពីង បានចេញលិខិតអញ្ជើញនាយករដ្ឋមន្ត្រីជប៉ុនរួចរាល់ហើយ ដើម្បីឱ្យមកចូលរួមអបអរពិធីបុណ្យឧទ្ទិសដល់ការបិទបញ្ចប់សង្គ្រាមលោកលើកទីពីរ នៅប្រទេសចិន។
បុរសរដ្ឋចិនជប៉ុនទាំងពីរ ធ្លាប់បានជួបសន្ទនាគ្នាដោយផ្ទាល់ ចំនួនពីរដងរួចមកហើយ។ លើកទីមួយនៅក្រោក្របខណ្ឌជំនួបកំពូលអាស៊ីប៉ាស៊ីហ្វិក កាលពីខែវិច្ឆិកា ២០១៤ និងម្តងទៀតនៅទីក្រុងហ្សាការតា ក្នុងជំនួបប្រជុំថ្នាក់ដឹកនាំអាស៊ី-អាហ្វ្រិក។
ទំនាក់ទំនងចិន-ជប៉ុន ហាក់បានប្រសើរឡើងបន្តិច ! នេះបើគេជឿតាមប្រសាសន៍របស់លោក យ៉ាស្ហ៊ី ដោយមានដំណើរទស្សនកិច្ចរបស់នៅទីក្រុងប៉េកាំងពេលនេះជាភស្តុតាងបញ្ជាក់។ ចំណែកខាងចិន ក៏បានស្វាគមន៍ចង់មានការផ្តោះប្តូរជាមួយជប៉ុនលើគ្រប់វិស័យ ពង្រឹងទំនុកចិត្តគ្នាទៅវិញទៅមក ជាពិសេសចេះទាញយកប្រវត្តិសាស្ត្រអតីតកាលមកធ្វើជាមេរៀន ដើម្បីកសាងអនាគតប្រសើរឡើង។ នេះការបញ្ជាក់បន្ថែមរបស់លោក យ៉ាងជៀជី អតីតរដ្ឋមន្ត្រីការបរទេសចិន និងបច្ចុប្បន្នជាសមាជិកក្រុមប្រឹក្សារដ្ឋ។
កាលពីខែចុងខែមេសា ពីទីក្រុងហ្សាការតា លោក អាបេ បានសម្តែងការសោកស្តាយចំពោះទង្វើជប៉ុនក្នុងសម័យសង្គ្រាម និងបានសន្យាប្រកាន់យកគោលការណ៍ គ្មានការឈ្លានពាន និងដោះស្រាយវិបត្តិអន្តរជាតិ ដោយសន្តិវិធី។ ប៉ុន្តែនៅថ្ងៃព្រហស្បតិ៍នេះដដែល សភាជប៉ុនបានអនុម័តគម្រោងច្បាប់សន្តិសុខដែលផ្តល់លទ្ធភាពឱ្យទាហានជប៉ុនអាចចេញធ្វើប្រតិបត្តិការនៅក្រៅប្រទេសបាន និងដែលចិនបានបញ្ចេញប្រតិកម្មភ្លាមដាស់តឿនឱ្យតូក្យូកុំភ្លេចអតីតកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ