លោកអាបេ ទទួលគំនាប ក្នុងរឿងទាសករផ្លូវភេទក្នុងសម័យត្រួតត្រារបស់ជប៉ុននៅអាស៊ី
នៅក្នុងស្រុក ប្រមុខរដ្ឋាភិបាលជប៉ុនកំពុងរងគំនាបឲ្យទទួលស្គាល់អតីតកាលប្រវត្តិសាស្រ្ត។ បន្ទាប់ពីក្រុមសាស្រា្តចារ្យ និងអ្នកប្រវត្តិសាស្រ្ត ដល់វេន អតីតមេដឹកនាំជប៉ុន ដែលបញ្ចេញសំលេងខ្លាំងៗ អំពាវនាវ កាលពីថ្ងៃអង្គារទី ៩មិថុនា ឲ្យលោកនាយករដ្ឋមន្រ្តី ស៊ីនហ្សូ អាបេ យល់ព្រមទទួលស្គាល់ កំហុសឆ្គងរបស់ជប៉ុន ជាពិសេស ទៅលើស្រ្តីទាសករផ្លូវភេទ ដែលទាហានជប៉ុនចាប់បង្ខំ ឲ្យមកបម្រើផ្លូវភេទ នៅសម័យសង្រ្គាមលោកលើកទី ២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ថ្ងៃប្រារព្ធខួប៧០ឆ្នាំ នៃបរាជ័យរបស់ជប៉ុន ក្នុងសង្រ្គាម លោកលើកទី ២ កាន់តែខិតចូលមកដល់ សម្ពាធមានកាន់តែខ្លាំងទៅលើលោកនាយករដ្ឋមន្រ្តីជប៉ុន ស៊ីនហ្សូ អាបេ។ នៅថ្ងៃ អង្គារម្សិលមិញ ពោលគឺនៅ ២សប្តាហ៍ក្រោយសំបុត្រអំពាវនាវរបស់សាស្រ្តាចារ្យ និងអ្នកប្រវត្តិសាស្រ្ត ដល់វេន អតីតមន្រ្តីជាន់ខ្ពស់របស់ជប៉ុន ដែលចេញមុខ ក្រើនរំលឹករដ្ឋាភិបាលជប៉ុន កុំខ្មាស់ និងគេចយករួចខ្លួន ពីការទទួលខុសត្រូវ។ សម្រាប់ Yohei Kono ជប៉ុន ត្រូវហ៊ានចេញមុខទទួលស្គាល់ការពិតប្រវត្តិសាស្រ្តយោធា ជាពិសេស នៅក្នុងរឿងស្រ្តីទាសករផ្លូវភេទអាស៊ី ដែលទាហានជប៉ុនបានបង្កើតឡើង នៅក្នុងអំឡុង សង្រ្គាមលោកលើកទី២។
នៅក្នុងសន្និសីទកាសែត កាលពីថ្ងៃអង្គារ លោក Yohei Kono អតីតប្រធានខុទ្ធការល័យនាយករដ្ឋមន្រ្តី និងធ្លាប់ជាឧបនាយករដ្ឋមន្រ្តីជប៉ុន ក្នុងឆ្នាំ ១៩៩៤ បាននិយាយថា នៅក្នុងដើម្បីបង្កើតទំនាក់ទំនងជាមួយ ចិន និងកូរ៉េខាងត្បូង ជប៉ុនត្រូវតែហ៊ានប្រឈមនឹងការពិត។ ដោយមិនទទួលស្គាល់ការពិត និងបដិសេធអ្វី ដែលបានកើតឡើង នោះ គេកំពុងធ្វើឲ្យកិត្តិយស របស់ប្រទេស និងប្រជាជនជប៉ុនត្រូវប្រលាក់ប្រលូស អាប់អោន។
កាលនៅជាឧបនាយករដ្ឋមន្រ្តីជប៉ុន លោកYohei Kono ជាមនុស្សទី ១ ដែលបានប្រកាសទទួលស្គាល់ នៅឆ្នាំ ១៩៩៣ ពីពិរុទ្ធភាពរបស់ទាហានជប៉ុន នៅក្នុងការចាប់យកស្រ្តីអាស៊ី ជាពិសេស កូរ៉េខាងត្បូង និងចិន មកធ្វើជាទាសករផ្លូវភេទ។
សេចក្តីអំពាវនាវឲ្យលោកអតីតមន្រ្តីរដ្ឋាភិបាលធ្វើឡើង នៅក្នុងពេល ដែលនាយករដ្ឋមន្រ្តីជប៉ុន លោកស៊ីនហ្សូ អាបេ កំពុងត្រៀមសរសេរសុន្ទរកថា សម្រាប់ខួប ៧០ឆ្នាំ នៃបរាជ័យរបស់ជប៉ុន ក្នុងសង្រ្គាមលោកលើកទី ២ ដែលត្រូវរៀបចំនៅថ្ងៃទី ១៥សីហាខាងមុខ។ លោកស៊ីនហ្សូ អាបេ ធ្លាប់បានថ្លែង សោកស្តាយ ចំពោះ ទង្វើយោធានិយមរបស់ជប៉ុន គឺដូចដែលនាយករដ្ឋមន្រ្តីជប៉ុនមុនៗធ្លាប់ធ្វើកន្លងមក។ ប៉ុន្តែ លោកអាបេមិនដែលនិយាយពាក្យសុំទោស ដែលចិន និងកូរ៉េខាងត្បូង ទន្ទឹងរង់ចាំ ចង់បាននោះទេ។
សម្ពាធទៅលើនាយករដ្ឋមន្រ្តីជប៉ុន កើតឡើងនៅចំពេលដែលការស្ទង់មតិមួយ បានបង្ហាញ កាលពីថ្ងៃអង្គារ ពីការធ្លាក់ចុះដុនដាប កាន់តែខ្លាំង នៃទំនាក់ទំនងជប៉ុន ជាមួយកូរ៉េខាងត្បូង។ តាមការស្ទង់មតិ រៀបចំឡើងដោយកាសែតជប៉ុន និងកូរ៉េខាងត្បូង ជនជាតិជប៉ុន៧៣ភាគរយ មិនជឿទុកចិត្តលើប្រទេសជិតខាងរបស់ខ្លួន ចំណែកប្រជាជនកូរ៉េខាងត្បូង ៨៥ភាគរយ ក៏មិនទុកចិត្តលើជប៉ុនវិញដែរ។ ៩៤ភាគរយនៃប្រជាជនកូរ៉េខាងត្បូង នៅតែគិតថា មេដឹកនាំជប៉ុន មិនដែលសុំទោស ឲ្យស្មោះ អស់ពីចិត្ត ក្នុងរឿងដែលទាហានជប៉ុនចាប់យកស្រ្តីកូរ៉េទៅធ្វើជាទាសករផ្លូវភេទ។ ៦០ភាគរយ នៃប្រជាជនកូរ៉េខាងត្បូង នៅបានគិតថា ទាហានជប៉ុននៅតែជាគ្រោះថ្នាក់ គំរាមកំហែង សម្រាប់កូរ៉េខាងត្បូង បន្ទាប់ពីកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ