ជប៉ុនអាមេរិកព្រួតគ្នាគំរាមចិនឱ្យបញ្ឈប់សកម្មភាពក្នុងសមុទ្ទចិនខាងត្បូង
រដ្ឋមន្ត្រីការពារជាតិជប៉ុន បានប្រកាសព្រមានចិននៅថ្ងៃសៅរ៍នេះ ថាគម្រោងសាងសង់កូនកោះសម្បនិម្មិតនៅសមុទ្ទចិនខាងត្បូងជាប់ជម្លោះជាមួយប្រទេសជិតខាង នឹងបង្កឱ្យហានិភ័យយ៉ាងធ្ងន់ធ្ងរនៅក្នុងតំបន់។ ក្នុងពេលជាមួយគ្នានេះ អាមេរិកក៏បានអំពាវនាវជាថ្មី ឱ្យចិនបញ្ឈប់ជាបន្ទាន់ និងជារហូតទៅ ព្រោះសកម្មភាពនេះ មិនស៊ីគ្នានឹងច្បាប់អន្តរជាតិទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ក្នុងវេទិកាប្រចាំឆ្នាំនៅទីក្រុងសិង្ហបុរី “Sangri-la” ដែលមានថ្នាក់ដឹកនាំជាន់ខ្ពស់ការពារជាតិ នៃតំបន់អាស៊ីប៉ាស៊ីហ្វិកជាច្រើននាក់ចូលរួមរាប់ទាំងចិនផង រដ្ឋមន្ត្រីក្រសួងការពារជាតិអាមេរិក បានរំលឹកអំពីដំណោះស្រាយដោយសន្តិវិធី និងបង្ហាញឆន្ទៈប្រឆាំងនឹងការបំពាក់អាវុធបន្ថែមនៅតំបន់ជាប់ជម្លោះ ! និងបានជំរុញឱ្យចិន ត្រូវតែបញ្ឈប់ជាបន្ទាន់សកម្មភាពសាងសង់កូនកោះសម្បនិម្មិត ដែលជាឥរិយាបថ មិនស្របទៅច្បាប់អន្តរជាតិ។ បើតាមលោកកាទ័រ អាមេរិកដែលនៅតែបន្តបញ្ជូនទាហាន និងបំប៉ោងកម្លាំងយោធានៅសមុទ្ទខាងត្បូងជានិច្ច ព្រោះរាល់ប្រតិបត្តិការផ្លូវអាកាស ឬផ្លូវទឹក គ្រប់ទិសទីលើភពផែនដី តែងតែធ្វើឡើងដោយគោរពច្បាប់អន្តរជាតិ និងតាមដែលច្បាប់អន្តរជាតិអនុញ្ញាត។
ចំណែកឯរដ្ឋមន្ត្រីការពារជប៉ុនក៏បានអំពាវនាវដូចគ្នា! សម្រាប់លោកGen Nakatani ប្រសិនបើគេមិនធ្វើអ្វីនៅពេលឃើញស្ថានការណ៍ផ្ទុយនឹងច្បាប់ នោះសណ្តាប់ធ្នាប់នឹងលែងមាន សន្តិភាពនិងស្ថិរភាពត្រូវរលាយ។ ហេតុដូច្នេះហើយបានជាជប៉ុន ចង់ឃើញគ្រប់ប្រទេស រាប់ទាំងចិនដែរ ត្រូវធ្វើខ្លួនជាមហាអំណាចមានទំនួលខុសត្រូវ។
សូមបញ្ជាក់ថា ភាពតានតឹងក្នុងសមុទ្ទចិនខាងត្បូង មានកាន់តែខ្លាំងនារយៈពេលប៉ុន្មានខែចុងក្រោយនេះ បន្ទាប់ពីចិន បានបង្កើនល្បឿនសាងសង់កោះសម្បនិម្មិតនៅជិតប្រជុំកោះស្ព្រាតលី ដែលជាប់ជម្លោះ និងដែលមានយុទ្ធសាស្ត្រយោធាបំផុត ចំណេញផ្ទៃដី ប្រមាណជាង ៨០០ហិចតារ ក្នុងរយៈពេលតែប្រមាណ១៨ខែ មិនធ្លាប់មានក្នុងប្រវត្តិសាស្ត្រ និងគ្មានក្រុមប្រទេសណាអាចរត់តាមទាន់បានឡើយ។ ហើយកាលពីថ្មីៗនេះ ចិនថែមទាំងបានបំពាក់អាវុធ ធុនកាំភ្លើងធំ ពីរគ្រឿង មុនដកចេញទៅវិញ។ ប្រទេសនៅជិតខាង ក្នុងតំបន់ សង្ស័យថាចិនប្រើកម្លាំងជាមហាយក្ស ដណ្តើមគ្រប់គ្រងតំបន់ប្រជុំកោះម្នាក់ឯង មិនខ្វល់នឹងការទាមទាររបស់វៀតណាម ហ្វីលីពីន ព្រុយណេ តៃវ៉ាន់ និងម៉ាឡេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ