លោកស្រីយីងឡាក់ត្រូវគណៈកម្មការប្រឆាំងអំពើពុករលួយថៃចោទប្រកាន់ពីបទធ្វេសប្រហែស
ចុះផ្សាយនៅថ្ងៃ៖
ស្តាប់ - ០៧:៤២
នៅក្រុងបាងកក អំពើហិង្សាបង្ហូរឈាម រវាងប៉ូលិស និងក្រុមបាតុករ នៅថ្ងៃអង្គារទី ១៨ កុម្ភៈ បានសម្លាប់មនុស្សបួននាក់ ក្នុងនោះមានម្នាក់ជាប៉ូលិស។ តាមអាជ្ញាធរថៃ មានមនុស្សជាង៦០នាក់រងរបួស ចំណែកមនុស្សជាងមួយរយនាក់ត្រូវបានចាប់ខ្លួន នៅក្នុងប្រតិបត្តិការបង្រ្កាបរបស់ប៉ូលិស។ នេះជាលើកទីមួយ ដែលរដ្ឋាភិបាលរបស់លោកស្រីយីងឡាក់ប្រើកម្លាំងបាយ ដើម្បីបំបែកក្រុមបាតុករ ដែលបានធ្វើបាតុកម្មអស់បីខែមកហើយដើម្បីទាមទារឲ្យលោកស្រីយីងឡាក់ ស៊ីណាវ៉ាតចុះចេញពីតំណែង។ គណៈកម្មការប្រឆាំងអំពើពុករលួយបានប្រកាសចោទប្រកាន់លោកស្រីយីងឡាក់ ជាផ្លូវការ នៅថ្ងៃអង្គារនេះ និងកោះហៅលោកស្រីយីងឡាក់ ទៅស្តាប់បទប្រកាន់ នៅថ្ងៃទី ២៧កុម្ភៈខាងមុខ។
ចាប់តាំងពីបាតុកម្មប្រឆាំងនឹងរដ្ឋាភិបាល កើតឡើង កាលពីខែវិច្ឆិកា រដ្ឋាភិបាលរបស់លោកស្រីយីងឡាក់បានព្យាយាមអត់ធ្មត់ មិនប្រើកម្លាំងប៉ូលិស ដើម្បី ជៀសវាងការប្រឈមមុខហិង្សា ដាក់គ្នា ជាមួយបាតុករ។ ប៉ុន្តែ កាលពីថ្ងៃសុក្រ សប្តាហ៍មុន រដ្ឋាភិបាលបានប្តូរយុទ្ធសាស្រ្ត ដោយបានបញ្ជូនប៉ូលិសប្រឆាំងកុប្បកម្មឲ្យទៅបំបែកសំបុកក្រុមបាតុករដែលកាន់កាប់វិមានរដ្ឋាភិបាល។ ប្រតិបត្តិការរបស់ប៉ូលិស កាលពីថ្ងៃសុក្របានប្រព្រឹត្តទៅដោយមិនមានអំពើហិង្សាអ្វីទេ។
ការបំបែករបស់អាជ្ញាធរមិនបានផ្តល់លទ្ធផលផ្លែផ្កា ព្រោះ នៅភ្លាមៗ គឺនៅចុងសប្តាហ៍មុននេះ ក្រុមបាតុករបានត្រលប់ចូលទៅលុកលុយវិមានរដ្ឋាភិបាល រដ្ឋាភិបាលជាថ្មី។ នៅថ្ងៃអង្គារនេះទៀត ក្រុមបាតុករ ដែលដឹកនាំដោយគណបក្សប្រឆាំង ថែមទាំងបានចាក់ជញ្ជាំងស៊ីម៉ង់ នៅមុខទ្វាររបងវិមានរដ្ឋាភិបាល។ បំណងគឺរារាំងមិនឲ្យរដ្ឋាភិបាលរបស់លោកស្រីយីងឡាក់អាចចូលធ្វើការបាន។ ចលនាប្រឆាំងរបស់បាតុករជាងបីខែ នៅបាងកក បានធ្វើឲ្យរដ្ឋាភិបាលរបស់លោកស្រីយីងឡាក់ ជាប់គាំង មិនអាចធ្វើការដឹកនាំប្រទេសបានដោយស្រួល។ ទីតាំងស្ថាប័នសំខាន់ៗរបស់រដ្ឋ ត្រូវបាតុករចូលកាន់កាប់ មិនឲ្យមន្រ្តីរាជការធ្វើការបាន។ រដ្ឋាភិបាលរបស់លោកស្រី ក៏មានអំណាចមិនពេញលេញ ចាប់តាំងពីមានការរំលាយសភា កាលពីខែធ្នូ។
►សូមអាន៖វិបត្តិនយោបាយថៃ ៖ ការបោះឆ្នោតមិនមែនជាការបញ្ចប់បញ្ហា?
ការបោះឆ្នោតដើម្បីបង្កើតសភាថ្មី កាលពីថ្ងៃទី ២កុម្ភៈ ក៏ត្រូវក្រុមប្រឆាំងរារាំងមិនឲ្យយកទៅប្រើជាការបាន។ គណៈកម្មាធិការរៀបចំការបោះឆ្នោតថៃបានប្រកាសការបោះឆ្នោត នៅកន្លែងដែលក្រុមបាតុកររារាំង នៅខែមេសា ក្នុងពេលរដ្ឋាភិបាលចាំផ្ទះទាមទារឲ្យមានការបោះឆ្នោត នៅខែកុម្ភៈ ដើម្បី អាចបង្កើតចេញរដ្ឋាភិបាលឲ្យបានឆាប់។
សកម្មភាពញុះញង់របស់ក្រុមប្រឆាំង និងស្ថានភាពទឹកដល់ច្រមុះនេះហើយ ដែលអាចធ្វើឲ្យលោកស្រីនាយករដ្ឋមន្រ្តីថៃចេញបញ្ជាឲ្យអាជ្ញាធរបើកប្រតិបត្តិការគាស់រំលើងទីតាំងកាន់កាប់របស់ក្រុមប្រឆាំង នៅថ្ងៃអង្គារនេះ នៅក្រោមឈ្មោះថា ប្រតិបត្តិការដើម្បីសន្តិភាព នៅទីក្រុងបាងកក។ ទិសដៅរបស់ប្រតិបត្តិការនេះ គឺដើម្បីដោះលែងទីតាំងស្ថាប័នរដ្ឋសំខាន់ៗ ចេញពីការកាន់កាប់ដោយខុសច្បាប់របស់បាតុករ។
យោងទៅតាមអាជ្ញាធរថៃ អំពើហិង្សាសម្លាប់មនុស្សបានកើតឡើងពីភាគីបាតុករមុន ដែលបានបាញ់គ្រាប់កាំភ្លើងពិត ទៅលើប៉ូលិស ដែលបានបាញ់គ្រាប់កាំភ្លើងជ័រ ទៅលើបាតុករណា ដែលមានលក្ខណៈជ្រុលនិយមជាងគេ។ តាមអ្នកយកព័ត៌មាននៅកន្លែងកើតហេតុ គេលឺសំឡេងគ្រាប់បែកផ្ទុះមួយគ្រាប់ និងក្រោយមក មានសេចក្តីរាយការណ៍ថា ប៉ូលិសជាង១៧នាក់រងរបួស និងក្រុមបាតុករផ្សេងទៀត។ អាជ្ញាធរបានប្រកាសផងដែរ នៅថ្ងៃអង្គារនេះថា បានបំបែកក្រុមបាតុករ នៅក្រសួងថាមពល និងចាប់បានជនសង្ស័យ រាប់រយនាក់ នៅក្នុងចំណោមក្រុមបាតុករ និងរឹបអូសបានអាវុធ និងគ្រាប់បែកច្នៃជាច្រើនគ្រាប់។
គណៈកម្មការប្រឆាំងអំពើពុករលួយ៖លោកស្រីយីងឡាក់ធ្វេសប្រហែលក្នុងកម្មវិធីឧបត្ថម្ភដល់កសិករ
ព័ត៌មានដែលថា លោកស្រីនាយករដ្ឋមន្រ្តីថៃ រងការស៊ើបអង្កេតរបស់គណៈកម្មការប្រឆាំងអំពើពុករលួយ បានលេចលឺតាំងពីយូរមកហើយ។ គណៈកម្មការប្រឆាំងអំពើពុករលួយថៃ ជាស្ថាប័នឯករាជ្យ ប៉ុន្តែ ត្រូវបានគេមើលឃើញថា មាននិន្នាការទៅរកក្រុមប្រឆាំង គឺក្រុមដែលគាំទ្រដោយក្រុមបញ្ញវន្តថៃ និងគ្រួសាររាជវង្ស។
យោងតាមសេចក្តីប្រកាសព័ត៌មានរបស់គណៈកម្មការ លោកស្រីយីងឡាក់ត្រូវចោទប្រកាន់ពីបទធ្វេសប្រហែស នៅក្នុងកម្មវិធីផ្តល់ជំនួយឧបត្ថម្ភដល់ប្រជាកសិករ។ គណៈកម្មការបានបញ្ជាក់លម្អិតថា គេបានរំលឹកជាញឹកញយដល់លោកស្រីយីងឡាក់ពីការកើនឡើងនៃអំពើពុករលួយ និងការខាតបង់ថវិកាដោយសារតែកម្មវិធីនយោបាយស្រូវអង្កររបស់លោកស្រី ប៉ុន្តែ លោកស្រីយីងឡាក់មិនបានអើពើនឹងការក្រើនរំលឹកនេះ។
គួរបញ្ជាក់ថា ការសន្យាប្រើនយោបាយជួយកសិករ តាមរយៈរដ្ឋាភិបាលជួយទិញអង្ករពីប្រជាជនក្នុងតម្លៃថ្លៃ ជាង៥០ភាគរយនៃតម្លៃទីផ្សារ បានជួយឲ្យលោកស្រីយីងឡាក់ ប្អូនរបស់លោកថាក់ស៊ីនឈ្នះឆ្នោតផ្តាច់មុខ កាលពីឆ្នាំ ២០១១។ ប៉ុន្តែ ពីរឆ្នាំក្រោយ នយោបាយឧបត្ថម្ភកសិករទទួលរងការរិះគន់ពីគ្រប់ទិសទី ដោយរួមទាំងកសិករថៃផ្ទាល់ផងដែលទើបចេញមុខធ្វើបាតុកម្មដែរ បន្ទាប់ពីគេមិនបានទទួលការបង់ប្រាក់ទៅតាមការសន្យារបស់លោកស្រី យីងឡាក់។ រដ្ឋាភិបាលរបស់លោកស្រីយីងឡាក់ បានចោទប្រកាន់ក្រុមបក្សប្រឆាំងថា បានធ្វើបាតុកម្ម រារាំងមិនឲ្យមានការបោះឆ្នោត បង្កើតសភាថ្មី ដែលជាឧបសគ្គ មិនអាចឲ្យរដ្ឋាភិបាល មានសិទ្ធិ ទៅខ្ចីលុយគេដើម្បីយកទៅសងបន្ត ថ្លៃស្រូវអង្កររបស់ប្រជាកសិករ។
ក្រុមប្រឆាំងបានចោទរដ្ឋាភិបាលរបស់លោកស្រីយីងឡាក់ ដោយថា នយោបាយទិញអង្ករពីកសិករបានជំរុញឲ្យអំពើពុករលួយមានកាន់តែច្រើន ធ្វើឲ្យរដ្ឋខាតបង់ថវិការាប់ពាន់លានដុល្លារ និងធ្វើឲ្យប្រទេសថៃបាត់បង់ឈ្មោះជាប្រទេសទីមួយ នាំចេញអង្ករនៅក្នុងពិភពលោក។ លើសពីនោះទៀត អង្ករដែលរដ្ឋាភិបាលបានទិញយកមកស្តុក ដែលមានចំនួន ជាង១៨លានតោន ត្រូវស្តុកទុកចោល ដោយមិនមិនអាចលក់ចេញបាន ដោយសារតែតម្លៃថ្លៃខ្ពស់ពេក។
គណៈកម្មការប្រឆាំងអំពើពុករលួយបានបញ្ជាក់ថា គេនឹងកោះហៅលោកស្រីយីងឡាក់ ទៅស្តាប់បទប្រកាន់ នៅថ្ងៃទី ២៧កុម្ភៈខាងមុខ។ ដំណើរការតាមច្បាប់នេះអាចធ្វើឲ្យព្រឹទ្ធសភាដកលោកស្រីយីងឡាក់ចេញពីតំណែងនាយករដ្ឋមន្រ្តី គឺដើម្បីបើកផ្លូវឲ្យមានការចោទប្រកាន់តាមផ្លូវតុលាការ។ ប៉ុន្តែ យ៉ាងណាក៏ដោយ មន្រ្តីរដ្ឋាភិបាលរបស់លោកស្រីយីងឡាក់បានបញ្ជាក់ហើយថា ការដកតំណែងរបស់លោកស្រីនាយករដ្ឋមន្រ្តីនឹងមិនធ្វើឲ្យប៉ះពាល់ដល់រចនាសម្ព័ន្ធរបស់រដ្ឋាភិបាលទេ គឺមិនអាចរារាំង មិនឲ្យរដ្ឋាភិបាលគ្រប់គ្រងប្រទេសនោះទេ។
រឿងចោទប្រកាន់នាយករដ្ឋមន្រ្តីទាក់ទងនឹងអំពើពុករលួយ ធ្លាប់បានកើតម្តងហើយ កាលពីឆ្នាំ ២០០៨។ ក្រោយពីគណបក្សអំណាចប្រជាជនដែលជាបក្សពួករបស់ថាក់ស៊ីន ឈ្នះឆ្នោត តុលាការធម្មនុញ្ញថៃបានជំរុញឲ្យនាយករដ្ឋមន្រ្តីសាម៉ាក់ ស៊ុនដារ៉ាវេច ចុះចេញពីតំណែង ដោយសារតែរឿងពុករលួយនេះដែរ។
លើកនេះ រដ្ឋាភិបាលរបស់បក្សភឿថៃអាចរងគ្រោះម្តងទៀត ដោយនយោបាយរបស់ក្រុមកាន់អំណាចពិតនៅថៃ ដូចជាយោធា និងតុលាការថៃ ដែលនៅឯករាជ្យពីអំណាចរដ្ឋាភិបាល។ ក្រុមនេះតែងតែរករឿងទម្លាក់រដ្ឋាភិបាលមកពីក្រុមលោកថាក់ស៊ីន នោះបើទោះបីជារដ្ឋាភិបាលតែងតែចេញមកពីការបោះឆ្នោតទុកចិត្តរបស់ប្រជាជនថៃក្តី ជាពិសេស គឺប្រជាជនកសិករនៅតាមជនបទ។ តាមបទពិសោធន៍កន្លងមក រដ្ឋប្រហារតែងកើតឡើង នៅពេលរដ្ឋាភិបាលបាត់បង់ថ្នាក់ដឹកនាំ ឬនៅពេលមានចលនាបន្តប្រឆាំងខ្លាំងនឹងរដ្ឋាភិបាល។
បើទោះបីជាយោធាបដិសេធមិនលូកដៃអន្តរាគមន៍ ប៉ុន្តែ ការទម្លាក់នាយករដ្ឋមន្រ្តី ដោយសារអំពើពុករលួយ និងការបន្តសកម្មភាពរបស់បាតុករ ប្រឆាំងនឹងរដ្ឋាភិបាល អាចធ្វើឲ្យរដ្ឋប្រហារទម្លាក់រដ្ឋាភិបាលមួយកើតឡើង។ អាចជារដ្ឋប្រហារយោធា ឬរដ្ឋប្រហារតុលាការ ដូចដែលប្រទេសថៃបានជួបកាលពីឆ្នាំ ២០០៨។ វិបត្តិនយោបាយថៃ ជៀសមិនផុតពីរ៉ាំរ៉ៃ ស៊ីរូងផ្ទៃក្នុងនៅក្នុងប្រទេសថៃ។ វិបត្តនយោបាយរ៉ាំរ៉ៃបានធ្វើឲ្យប្រជាជន និងបក្សនយោបាយបានបាត់បង់អស់ជំនឿទុកចិត្តលើគ្នា និងបាត់ជំនឿលើលទ្ធិប្រជាធិបតេយ្យតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ