កំណើនសេដ្ឋកិច្ចជប៉ុននៅឆ្នាំ២០១១ត្រូវបាត់បង់អស់៥០%ដោយហេតុតែគ្រោះមហន្តរាយនុយក្លេអ៊ែរនិងរលកយក្សស៊ូណាមី
ចុះផ្សាយនៅថ្ងៃ៖
ស្តាប់ - ០៤:២៥
អង្គការសហប្រតិបត្តិការអភិវឌ្ឍន៍សេដ្ឋកិច្ចOCDE បានប្រមាណថា អត្រានៃកំណើនសេដ្ឋកិច្ចជប៉ុននៅឆ្នាំ២០១១ត្រូវបាត់បង់អស់៥០% ដោយត្រូវធ្លាក់មកនៅត្រឹម០,៨%នៅឆ្នាំ២០១១ ដោយហេតុតែមានគ្រោះមហន្តរាយរញ្ជួយដី រលកយក្សស៊ូណាមី និងនុយក្លេអ៊ែរ។ចំណែកឯ អត្រានៃកំណើនសេដ្ឋកិច្ចជប៉ុននៅឆ្នាំ២០១២វិញអាចមានដល់ទៅ២,៣%ទល់ នឹងការគ្រោងទុកថាមានតែ១,៣%ប៉ុណ្ណោះ។ ទាំងនេះ ក៏ដោយសារតែមានសកម្មភាពស្ថាបនាសាងសង់ប្រទេសជប៉ុនឡើងវិញ។
បើយោងតាម អង្គការសហប្រតិបត្តិការអភិវឌ្ឍន៍សេដ្ឋកិច្ចOCDE កំណើនសេដ្ឋកិច្ចជប៉ុននៅឆ្នាំ២០១២អាចមានសន្ទុះលឿនខ្លាំងជាងការគ្រោងទុក ដោយសារតែមានសកម្មភាពស្ថាបនាសាងសង់ប្រទេសជប៉ុនឡើងវិញ។
គួរកត់សម្គាល់ថា គ្រោះមហន្តរាយរញ្ជួយដី រលកយក្សស៊ូណាមី និងនុយក្លេអ៊ែរបានកើតមាននៅចំពេលដែលប្រទេសជប៉ុនចាប់មានសន្ទុះកំណើនសេដ្ឋកិច្ចឡើងវិញក្រោយពីបានស្គាល់សកម្មភាពសេដ្ឋកិច្ចទន់ខ្សោយនៅចុងឆ្នាំ២០១០។ ហើយផលវិបាកដែលកើតមាននៅតំបន់ប៉ែកឦសាននៃប្រទេសជប៉ុនដែលទទួលរងគ្រោះរញ្ជួយដី រលកយក្សស៊ូណាមីនិងនុយក្លេអ៊ែរគឺពិតជាមានលក្ខណៈធ្ងន់ធ្ងរក្រៃលែង។
ហេតុដូច្នេះហើយ បានជាអង្គការសហប្រតិបត្តិការអភិវឌ្ឍន៍សេដ្ឋកិច្ចOCDEយល់ថា អត្រានៃកំណើនសេដ្ឋកិច្ចជប៉ុននៅឆ្នាំ២០១១អាចមានត្រឹមតែ០,៨%ទល់នឹង១,៧%ដែលបានគ្រោងទុក។ ចំណែកឯ អត្រានៃកំណើនសេដ្ឋកិច្ចជប៉ុននៅឆ្នាំ២០១២វិញអាចមានដល់ទៅ២,៣%ទល់នឹងការគ្រោងទុកថាមានតែ១,៣%ប៉ុណ្ណោះ។ ទាំងនេះ ក៏ដោយសារតែមានសកម្មភាពស្ថាបនាសាងសង់ប្រទេសជប៉ុនឡើងវិញ។
អង្គការសហប្រតិបត្តិការអភិវឌ្ឍន៍សេដ្ឋកិច្ចOCDEបានរំលឹកឲ្យដឹងទៀតថា ហេដ្ឋារចនាសម្ព័ន្ធនិងអគារទាំងឡាយរបស់ជប៉ុនបានស្គាល់ការខូចខាតដល់ទៅ២០៨ពាន់លានអឺរ៉ូ។
ក៏ប៉ុន្តែ ទាំងនេះគេពុំទាន់គិតដល់ករណីពុំជាក់ច្បាស់ជាច្រើនទៀត មានដូចជា “រយៈពេលនៃកង្វះចរន្តអគ្គិសនីសម្រាប់ប្រើប្រាស់” “បញ្ហាបង្កឡើងដោយមជ្ឈមណ្ឌលនុយក្លេអ៊ែរហ្វ៊ូគូស្ហ៊ីម៉ា” ហើយនិង “ប្រក្រតិទិននិងទំហំនៃប្រាក់ចំណាយសាធារណៈសម្រាប់ការស្ថាបនាសាងសង់ប្រទេសជប៉ុនឡើងវិញ”។
សូមបញ្ជាក់ថា ការបញ្ឈប់សកម្មភាពនៃម៉ាស៊ីនប្រតិកម្មនុយក្លេអ៊ែរជប៉ុនមួយចំនួនបានបណ្តាលឲ្យកើតមានបញ្ហាកង្វះខាតថាមពលអគ្គិសនីសម្រាប់ប្រើប្រាស់នៅក្នុងតំបន់ទីក្រុងតូក្យូដែលមានប្រជាជនប្រមាណ៣៥លាននាក់រស់នៅ ហើយក៏ជាតំបន់មួយប្រៀបផ្ទឹមបានទៅនឹង “បេះដូង”នៃម៉ាស៊ីនសេដ្ឋកិច្ចជប៉ុន។
នៅទីបំផុត ផលិតផលដុលក្នុងប្រទេសជប៉ុននៅឆ្នាំ២០១១នេះអាចស្គាល់ការធ្លាក់ស្រុតចុះខ្លាំងនៅត្រីមាសទីពីរ ក៏ប៉ុន្តែពុំមានលក្ខណៈធ្ងន់ធ្ងរពេកឡើយ។
ហើយនៅត្រីមាសទីបីឆ្នាំ២០១១ ផលិតផលដុលក្នុងប្រទេសជប៉ុនអាចមានសន្ទុះខ្លាំងក្លាឡើងវិញ។ ទាំងនេះ ក៏ដោយសារតែ៖
ទី១-មានការចំណាយប្រាក់សាធារណៈយ៉ាងច្រើនសន្ធឹកសន្ធាប់សម្រាប់ធ្វើការស្ថាបនាសាងសង់ឡើងវិញ។
ទី២-ការធ្វើវិនិយោគរបស់សហគ្រាសទាំងបង្ខំដើម្បីទិញដាក់ជំនួសវិញនូវម៉ាស៊ីនឧបករណ៍មួយចំនួនដែលបានខូចខាតដោយគ្រោះមហន្តរាយ។
ទី៣-ការសាងសង់យ៉ាងសកម្មនូវលំនៅដ្ឋានសម្រាប់ជនរងគ្រោះដែលបានបាត់បង់ផ្ទះសម្បែងរបស់ខ្លួន។
ហើយ អង្គការសហប្រតិបត្តិការអភិវឌ្ឍន៍សេដ្ឋកិច្ចOCDE បានព្រមានប្រាប់ថា “បញ្ហាបរិត្តផរណាdéflation នៅតែកើតមានជាបន្ត” “ការទិញដូរហូបចុកអាចធ្លាក់ចុះទាបជាងការបង្កើតផលិតផលរហូតដល់ចុងឆ្នាំ២០១២”។
សូមបញ្ជាក់ថា ក្រោយពីបានស្គាល់សកម្មភាពសេដ្ឋកិច្ចដើរថយក្រោយប្រមាណ៦,៣%នៅឆ្នាំ២០០៩ ដោយហេតុតែវិបត្តិសេដ្ឋកិច្ចពិភពលោករួចមក នៅឆ្នាំ២០១០ អត្រានៃកំណើនសេដ្ឋកិច្ចជប៉ុនបានស្ទុះកើនឡើងខ្លាំងដល់ទៅ៣,៩%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ