ប៉េកាំងនឹងដំឡើងថ្លៃប្រាក់យ័ន៥%នៅឆ្នាំ២០១១
ចុះផ្សាយនៅថ្ងៃ៖
ស្តាប់ - ០៣:២០
ប្រទេសចិនដែលត្រូវការមានរូបិយប័ណ្ណខ្លាំងដើម្បីធ្វើការប្រយុទ្ធទប់ទល់នឹងបញ្ហាអតិផរណា ហើយនិងដើម្បីបញ្ចៀសកុំឲ្យកើតមានbulleបំប៉ោងទិញលក់កេងយកចំណេញដែលជាប្រភពនៃវិបត្តិហិរញ្ញវត្ថុ នឹងប្រហែលជាអាចធ្វើការដំឡើងថ្លៃប្រាក់យ័នចិនប្រមាណ៥%នៅចំពោះមុខប្រាក់ដុលា្លរអាមេរិកនៅឆ្នាំ២០១១នេះ។
បើយោងតាមប្រភពសារព័ត៌មានចិនបានឲ្យដឹងថា នៅត្រីមាសទីមួយឆ្នាំ២០១១នេះ ទីក្រុងប៉េកាំងប្រហែលជាអាចធ្វើការដំឡើងថ្លៃប្រាក់យ័នចិនប្រមាណ៥%នៅចំពោះមុខប្រាក់ដុលា្លរអាមេរិក។ តើមានមូលហេតុអ្វីមកជំរុញឲ្យប្រទេសចិនធ្វើការដំឡើងថ្លៃប្រាក់យ័នរបស់ខ្លួនខ្លាំងបែបនេះ? តើទីក្រុងប៉េកាំងទាញយកផលចំណេញអ្វីខ្លះពីការដំឡើងថ្លៃប្រាក់យ័ននេះ?
យើងបានដឹងហើយថា បើប្រាក់យ័នចិនមានតម្លៃខ្ពស់ វាអាចជាកត្តាមួយដ៏ប្រពៃសម្រាប់ជួយកាត់បន្ថយការចំណាយទៅលើការនាំទំនិញឬវត្ថុធាតុដើមចូលពីបរទេស។ ការនាំទំនិញឬវត្ថុធាតុដើមពីបរទេសដែលមានតម្លៃថ្លៃពេកនេះហើយដែលជាប្រភពនៃការបង្កឲ្យកើតមានបញ្ហាអតិផរណាឬបញ្ហាទំនិញឡើងថ្លៃនៅប្រទេសចិន។ គួរបញ្ជាក់ថា ប្រទេសចិនដែលជារោងចក្រសម្រាប់ពិភពលោកទាំងមូលតែងត្រូវការនាំចូលយ៉ាងច្រើនសន្ធឹកសន្ធាប់នូវវត្ថុធាតុដើមសព្វបែបយ៉ាងនិងប្រេងឥន្ធនៈសម្រាប់ចិញ្ចឹមបំប៉នឧស្សាហកម្មរបស់ខ្លួនដែលកំពុងស្រេកឃ្លានត្រូវការយកមកបង្កើនផលិតផលកម្មន្តសាលសម្រាប់នាំចេញទៅលក់ទូទាំងពិភពលោក។
បើយោងតាមប្រភពវិនិយោគិនខ្លះថា រូបិយប័ណ្ណចិនអាចឡើងថ្លៃដល់ទៅ៣%នៅឆ្នាំ២០១១នេះ។ រីឯអ្នកឯកទេសខ្លះទៀតយល់ថា ប្រាក់យ័នចិនអាចឡើងថ្លៃប្រមាណ២%នៅត្រីមាសទីមួយឆ្នាំ២០១១ ដោយសារតែមានទស្សនកិច្ចរបស់លោកប្រធានាធិបតីចិនហ៊ូជិនតាវនៅសហរដ្ឋអាមេរិកនៅថ្ងៃទី១៩មករាខាងមុខនេះ។
ក៏ប៉ុន្តែលោកJiang Yaoping អនុរដ្ឋមន្ត្រីក្រសួងពាណិជ្ជកម្មចិនបានថ្លែងគូសបញ្ជាក់ថា ការដំឡើងថ្លៃប្រាក់យ័នដែលធ្លាប់មានកាលពីពេលមុនៗពុំសូវមានឥទ្ធិពលអ្វីមកជួយកាត់បន្ថយការសល់ផលពាណិជ្ជកម្មរបស់ប្រទេសចិនក្នុងការដោះដូរជាមួយសហរដ្ឋអាមេរិកឡើយ។ ឧនភាពពាណិជ្ជកម្មរបស់សហរដ្ឋអាមេរិកក្នុងការដោះដូរជាមួយប្រទេសចិននេះហើយដែលជាប្រភពនៃភាពតានតឹងរវាងប្រទេសមហាអំណាចសេដ្ឋកិច្ចពិភពលោកទីមួយនិង ប្រទេសមហាអំណាចសេដ្ឋកិច្ចពិភពលោកទីពីរ។ គួរកត់សម្គាល់ថា ទោះបីជាមានការដំឡើងថ្លៃប្រាក់យ័នចិននៅឆ្នាំ២០០៥រួចហើយក្តី ក៏សហរដ្ឋអាមេរិកនៅតែបន្តមានឧនភាពពាណិជ្ជកម្មជានិច្ចក្នុងការដោះដូរជាមួយទីក្រុងប៉េកាំង។
ហេតុដូច្នេះហើយ បានជាសេតវិមានបានដាក់សម្ពាធទៅលើរដ្ឋមន្ត្រីក្រសួងការបរទេសចិននៅពេលថ្មីៗនេះថា ត្រូវតែធ្វើយ៉ាងណាឲ្យមានការកាត់បន្ថយទៅលើឧនភាពពាណិជ្ជកម្មអាមេរិកាំងក្នុងការដោះដូរជាមួយប្រទេសចិន។ ហើយលោកប្រធានាធិបតីអាមេរិកបារ៉ាក់អូបាម៉ាក៏សម្តែងឲ្យឃើញនូវសុឆន្ទៈអាមេរិកាំងក្នុងកិច្ចសហប្រតិបត្តិការជាមួយទីក្រុងប៉េកាំង។ ទាំងនេះមុនមានទស្សនកិច្ចរបស់លោកប្រធានាធិបតីចិនហ៊ូ ជិនតាវដែលគ្រោងធ្វើនៅថ្ងៃទី១៩មករាខាងមុខនេះ។
សូមបញ្ជាក់ថា នារយៈពេល១០ខែពោលគឺពីខែមករាដល់ខែតុលាឆ្នាំ២០១០ ក្នុងការដោះដូរពាណិជ្ជកម្មរវាងសហរដ្ឋអាមេរិកនិងប្រទេសចិន ឧនភាពពាណិជ្ជកម្មអាមេរិកាំងបានកើនឡើងដល់ទៅ២០%ពោលគឺបានកើនឡើងដល់២៧០ពាន់លានដុល្លារអាមេរិកឬត្រូវជា២០០ពាន់លានអឺរ៉ួ។
ចំណែកឯអ្នកនាំពាក្យនៃសេតវិមានលោកRobert Gibbsបានថ្លែងបញ្ជាក់ថា ទីក្រុងវ៉ាស៊ីនតោននឹងបន្តដាក់សម្ពាធទៅលើទីក្រុងប៉េកាំងដើម្បីឲ្យភាគីចិនធ្វើការដំឡើងថ្លៃប្រាក់យ័នរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ