នាយករដ្ឋមន្ត្រីចិនពុំព្រមដំឡើងថ្លៃប្រាក់យ័នចិន
គ្មានមូលហេតុអ្វីដែលគួរឲ្យធ្វើការដំឡើងថ្លៃប្រាក់យ័នចិនយ៉ាងគំហុកឡើយ។ នេះជាសេចក្តីប្រកាសរបស់លោកនាយករដ្ឋមន្ត្រីចិនWen jiabaoកាលពីថ្ងៃពុធម្សិលមិញនៅទីក្រុងញូយ៉ក ក្នុងការឆ្លើយតបទៅនឹងការទាមទារយ៉ាងរន្ថាន់ពីសំណាក់សហរដ្ឋអាមេរិកដែលបានចោទទីក្រុងប៉េកាំងថា បានរក្សាប្រាក់យ័នចិនឲ្យឋិតនៅក្នុងតម្លៃមួយយ៉ាងទាបបែបសិប្បនិម្មិត។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
នៅក្នុងសុន្ទរកថាមួយធ្វើនៅមុខគណៈកម្មាធិការទទួលបន្ទុកកិច្ចការពាណិជ្ជកម្មចិន-អាមេរិក ដោយមានការចូលរួមពីសំណាក់ពាណិជ្ជករសំខាន់ៗទាំងពីរប្រទេស លោក នាយករដ្ឋមន្ត្រីចិនWen jiabaoបានថ្លែងថា “គ្មានមូលហេតុអ្វីដែលគួរឲ្យធ្វើការដំឡើងថ្លៃប្រាក់យ័នចិនយ៉ាងគំហុកឡើយ”។
“បើប្រសិនជាតម្លៃប្រាក់យ័នចិនត្រូវដំឡើងថ្លៃពី២០%ទៅ៤០%ដូចការទាមទាររបស់រដ្ឋាភិបាលអាមេរិកមែននោះ គេពុំដឹងជាសហគ្រាសចិនប៉ុន្មានទេដែលនឹងត្រូវបិទទ្វារដោយហេតុតែធនក្ស័យ។ កម្មករចិនប៉ុន្មានលាននាក់ទៅដែលត្រូវវិលត្រឡប់ទៅស្រុកកំណើតរបស់ខ្លួនវិញដោយហេតុតែគ្មានការងារធ្វើ។ ហើយវិបត្តិសង្គមមួយដ៏ធំមួយនឹងអាចកើតមាននៅក្នុងប្រទេសចិន”។ នេះជាការគូសបញ្ជាក់របស់ លោកនាយករដ្ឋមន្ត្រីចិនWen jiabaoកាលពីថ្ងៃពុធម្សិលមិញនៅទីក្រុងញូយ៉ក។
ចំណែកឯលោកប្រធានាធិបតីអាមេរិកបារ៉ាក់អូបាម៉ាវិញ បានថ្លែងសន្យាកាលពីថ្ងៃចន្ទម្សិលមិញថា នឹងបន្តដាក់សម្ពាធទៅលើប្រទេសចិន ដើម្បីជំរុញឲ្យទីក្រុងប៉េកាំងយល់ព្រមដំឡើងថ្លៃប្រាក់យ័នរបស់ខ្លួន។
រីឯលោករដ្ឋមន្ត្រីក្រសួងហិរញ្ញវត្ថុអាមេរិកឯណោះក៏ធ្លាប់បានដំឡើងសំឡេងតឹងដាក់ប្រទេសចិនកាលពីថ្ងៃព្រហស្បតិ៍កន្លងទៅថា ប្រទេសចិនពុំអាចបន្តរក្សាប្រាក់យ័នឲ្យឋិតនៅទាបបែបនេះទៀតឡើយ។ ទីក្រុងប៉េកាំងត្រូវតែប្តូរគំរូសេដ្ឋកិច្ចរបស់ខ្លួន។
គួរកត់សម្គាល់ថា ទីក្រុងប៉េកាំងបានបន្ធូរសម្រួលវិធានការក្នុងការប្តូរប្រាក់យ័នចិនជាមួយប្រាក់ដុល្លារអាមេរិកកាលពីខែមិថុនាកន្លងទៅ។ ប៉ុន្តែចាប់ពីពេលនោះមក ប្រាក់យ័នចិនបានឡើងថ្លៃតែ១,៦%ប៉ុណ្ណោះនៅមុខប្រាក់ដុល្លារអាមេរិក។
សមាជិកសភាអាមេរិកខ្លះយល់ថា ប្រាក់យ័នចិនបានបញ្ចុះតម្លៃបែបសិប្បនិម្មិតប្រមាណពី២៥%ទៅ៤០%។ ហេតុដូច្នេះហើយបានជាពួកគេទាមទារឲ្យមានការដាក់ពន្ធបន្ថែមជាទណ្ឌកម្មទៅលើផលិតផលចិនដែលនាំចូលទីផ្សារអាមេរិកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ