មានស្លាប់យ៉ាងតិច៣នាក់ និងរបួសជាង២០នាក់ ក្នុងចំណោមអ្នករបួសមានអ្នកកាសែតបរទេស២នាក់ផង នៅក្នុងការប៉ះទង្គិចគ្នារវាងកងទ័ព និងពួកអាវក្រហម។ ការប្រយុទ្ធគ្នាប្រព្រឹត្តទៅពេញមួយថ្ងៃរសៀល និងបន្តមកទល់យប់ថ្ងៃសុក្រទី១៤ឧសភានេះ។ មេដឹកនាំពួកអាវក្រហមចោទរដ្ឋាភិបាលថាបានផ្តើមបង្កសង្គ្រាមស៊ីវិល និងទាមទារឲ្យកងទ័ពដកខ្លួន ថយចេញពីសង្កាត់Ratchaprasong។
អំពើហិង្សាកើតឡើង នៅលើផ្លូវថ្នល់និងតាមច្រកផ្សេងៗដែលនាំទៅកាន់សង្កាត់ Ratchaprasong ពីព្រោះពួកអាវក្រហមបានពួតគ្នាមកខ្ទប់ផ្លូវកុំឲ្យកងទ័ពចូលទៅដល់ជំរំពួកគេបាន។
យ៉ាងណាក៏ដោយនៅថ្ងៃសុក្រទី១៤ឧសភានេះ ទីក្រុងបាងកកកំពុងផុងខ្លួនក្នុងអំពើហិង្សាដោយហេតុថា កងទ័ពបានបាញ់រះទៅលើពួកបាតុករដែលមិនខ្លាចនឹងតដៃវិញ។
តាមពិតមានសញ្ញាមិនស្រួលតាំងពីយប់ថ្ងៃព្រហស្បតិ៍ទី១៣ឧសភាម្សិលមិញម៉្លេះ ដ្បិតកងទ័ពមានបំណងចូលទៅឡោមព័ទ្ធទីតាំងរបស់ពួកអាវក្រហមបានកាត់ទឹក និងកាត់ភ្លើងនៅទីនោះ រីឯស្ថានទូតបរទេសនៅក្នុងសង្កាត់Ratchaprasong បានបិទទ្វារ។ ក្រោយមកឧត្តមសេនីយ៍ម្នាក់ដែលស្និទ្ធនឹងពួកបាតុករអាវក្រហមត្រូវបានគេបាញ់ចំកណ្តាលក្បាល។ គាត់មិនទាន់ស្លាប់ទេ គាត់កំពុងទទួលការព្យាបាលនៅមន្ទីរពេទ្យ តែគ្មានសង្ឃឹមនឹងអាចរស់បានឡើយ។
អំពើហិង្សានៅថ្ងៃសុក្រទី១៤ឧសភានេះវិញ បានផ្តើមឡើង នៅពេលដែលកងទ័ពដើរសម្រុក ទៅកាន់ទីតាំងរបស់ពួកអាវក្រហម។ ដើមដំបូង កងទ័ពបានបាញ់ផ្សែងបង្ហូរទឹកភ្នែក និងក្រោយមកគ្រាប់កាំភ្លើងមែនទែន រីឯពួកបាតុករវិញ បាននាំគ្នាដុតឡានទាហាន កង់ឡាន និងម៉ូតូជាច្រើនគ្រឿង។ ការប៉ះទង្គិចគ្នាប្រព្រឹត្តទៅពេញមួយថ្ងៃរសៀល និងបន្តមកទល់យប់នេះ។
{{ scope.legend }}
© {{ scope.credits }}មិនមែនជាប្រតិបត្តិការរវាយបង្ក្រាបទេ
ចំពោះលោករដ្ឋមន្ត្រីក្រសួងការពារជាតិថៃ ប្រតិបត្តិការនេះ មិនមែនជាការបោសសម្អាត ទីលានដែលពួកអាវក្រហមកាន់កាប់នោះទេ តែជាការប្រើធម៌ក្តៅ ដើម្បីបង្ខំពួកអាវក្រហម ឲ្យវិលមកចរចាជាមួយរដ្ឋាភិបាលអាភីស៊ីតវិញ។
យ៉ាងណាមិញ ការប្រើធម៌ក្តៅនេះ អាចជាដំណាក់កាលទីមួយនៃប្រតិបត្តិការវាយបង្ក្រាប។
កងទ័ពប្រហែលជាចង់ច្របាច់កចលនាពួកអាវក្រហមជាមុនសិន តាមរយៈការឡោមព័ទ្ធ ការកាត់ភ្លើង និងកាត់ទឹក ការបិទច្រកមិនឲ្យមានការនាំស្បៀងអាហារទៅដល់ទីតាំងប្រមូលផ្តុំរបស់ពួកអាវក្រហម នៅសង្កាត់Ratchaprasong។ ធ្វើបែបនេះ កងទ័ពប្រហែល ជាចង់ជម្រុញឲ្យពួកអាវក្រហមខ្លះចាកចេញបណ្តើរៗពីទីនោះ មុននឹងធ្វើការវាយបង្ក្រាប នៅពេលក្រោយ។
គួរគូសបញ្ជាក់ថា ពួកអាវក្រហមដែលចេញមុខមកប្រយុទ្ធនឹងកងទ័ព អត់ពាក់អាវក្រហមទេ តែពាក់អាវពណ៌ចម្រុះ ជាហេតុធ្វើឲ្យប្រតិបត្តិការរបស់កងទ័ពរឹងរឹតតែពិបាក ដ្បិតមើលពីចម្ងាយ មិនដឹងអ្នកណាជាបាតុករ អ្នកណាជាប្រជាជនធម្មតា និងអ្នកណាជាអ្នកសារព័ត៌មាន។
ពួកអាវក្រហមរឹងរូសពេក ទើបកងទ័ពធ្វើអន្តរាគមន៍
កាលពីថ្ងៃទី១៣ឧសភាមុននេះសោះ នៅមានក្តីសង្ឃឹមច្រើនក្នុងការចេញរួចពីភាពទ័លច្រក ដោយសន្តិវិធី ក្រោយពីលោកនាយករដ្ឋមន្ត្រីអាភីស៊ីត បានដាក់ជូនពួកអាវក្រហមនូវផែនទីចង្អុលផ្លូវមួយ។ ផែនទីចង្អុលផ្លូវនោះមានចំណុចសំខាន់ៗមួយចំនួន ដែលឆ្លើយតបទៅនឹងការទាមទាររបស់ពួកអាវក្រហម ក្នុងនោះរួមមានជាអាទិ៍ ការសម្រេចរៀបចំបោះឆ្នោតសភានៅថ្ងៃទី១៤វិច្ឆិកាខាងមុខ ក្រោយពីធ្វើកំណែទម្រង់ទៅលើរដ្ឋធម្មនុញ្ញរួច។ មិនតែប៉ុណ្ណោះ អាភីស៊ីតថែមទាំងបានសន្យាថា ចាប់ពីពេលនេះតទៅ រដ្ឋាភិបាលថៃនឹងយកចិត្តទុកដាក់ខ្លាំងទៅលើយុត្តិធម៌សង្គម និងចាត់ចែងបង្កើតគណៈកម្មាការឯករាជ្យមួយ ដើម្បីស៊ើបអង្កេត ទៅលើអំពើហិង្សាថ្ងៃទី១០មេសា ដែលកាលណោះ បានបណ្តាលឲ្យមានស្លាប់២៥នាក់ និងរបួស៨០០នាក់។
ពួកអាវក្រហមបានយល់ព្រមទទួលដំណោះស្រាយនេះ តែមិនព្រមបំបែកចលនាបាតុកម្មរបស់ពួកគេ ដ្បិតពួកគេនៅមិនទាន់ទុកចិត្តរដ្ឋាភិបាល។ មិនតែប៉ុណ្ណោះ ពួកគេបានទាមទារឲ្យអាភីស៊ីតប្រកាសជាផ្លូវការថ្ងៃរំលាយសភា។ អាភីស៊ីតក៏បានយល់ព្រមទៀត ដោយបានកំណត់រំលាយសភានៅដើមខែកញ្ញា និងបានទាមទារឲ្យពួកអាវក្រហមបំបែកជួរ និងចាកចេញពីសង្កាត់Ratchaprasong។ ក៏ប៉ុន្តែ ពួកអាវក្រហមនៅតែមិនព្រម ហើយបានទាំងដាក់លក្ខខណ្ឌឲ្យតុលាការធ្វើការចោទប្រកាន់ទៅលើលោកឧបនាយករដ្ឋមន្ត្រី ស៊ូថេប (Suthep) ដែលពួកគេចោទថាជា អ្នកទទួលខុសត្រូវចំពោះអំពើហិង្សាថ្ងៃទី១០មេសា។
ជំហររឹងរូសបែបនេះរបស់ពួកអាវក្រហម បានធ្វើឲ្យស្ថានភាពតានតឹងឡើងវិញ តាំងពីថ្ងៃ ព្រហស្បតិ៍ទី១៣ឧសភាម្សិលមិញមក។ អាភីស៊ីតបានប្រកាសឈប់រៀបចំបោះឆ្នោតវិញ ហើយកងទ័ពបានចាប់ផ្តើមឡោមព័ទ្ធសង្កាត់Ratchaprasong បានកាត់ភ្លើង និងកាត់ទឹក នៅទីនោះ។ រីឯស្ថានទូត ដូចជាស្ថានទូតអាមេរិក និងអង់គ្លេស ត្រូវបានបិទទ្វារ។
ទន្ទឹមគ្នានឹង«សង្គ្រាម»នៅតាមដងផ្លូវ សង្គ្រាមពាក្យសំដីក៏បានផ្តើមឡើងដែរ នៅយប់ថ្ងៃ សុក្រទី១៤ឧសភានេះ។
មេដឹកនាំពួកអាវក្រហម ចោទអាភីស៊ីតថាបានផ្តើមសង្គ្រាមស៊ីវិលនៅប្រទេសថៃ។ រីឯ ថាក់ស៊ីន ពីបរទេសវិញ បានទាមទារឲ្យអាភីស៊ីតដកទ័ពចេញពីទីកន្លែងកើតហេតុ និង ផ្តើមកិច្ចចរចាឡើងវិញជាមួយពួកអាវក្រហម។
តើកងទ័ពហ៊ានវាយបង្ក្រាបក្នុងថ្លុកឈាមពួកអាវក្រហមដែរឬទេ? តើពួកអាវក្រហមភាគច្រើនហ៊ានពលីជីវិត ដើម្បីប្រយុទ្ធនឹងកងទ័ពដែរឬទេ?
អំពើហិង្សានៅក្នុងទីក្រុងបាងកកលើកនេះ អាចនឹងកំណត់ជោគវាសនាអនាគតរបស់រដ្ឋាភិបាលថៃ ពីព្រោះការវិវឌ្ឍន៍ទៅនៃស្ថានការណ៍ អាចនាំមកនូវបរាជ័យ ឬជ័យជំនះ នយោបាយសម្រាប់អាភីស៊ីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ