ពួកអាវក្រហមផ្គើនរដ្ឋាភិបាលជាថ្មី
សំឡេងអាវុធបានលាន់ឮ ជាថ្មីនៅថ្ងៃពុធនេះ នៅខាងជើងក្រុងបាងកក ប៉ុន្តែជាការបាញ់ឡើងលើបង្អើល បង្ក្រាបពួកបាតុករអាវក្រហម ដែលបានដង្ហែក្បួនឡានកាមីញ៉ុង និងម៉ូតូ ចេញពីសង្កាត់Ratchaprasong នៅថ្ងៃពុធនេះ។ ជាការដង្ហែក្បួនបាតុកម្មដែលធ្វើឡើង ដើម្បីផ្តល់កម្លាំងចិត្តដល់បណ្តាជនជាយក្រុងបាងកក។
ចុះផ្សាយនៅថ្ងៃ៖ កែប្រែថ្ងៃទី៖
សំឡេងរបស់ អៀង សុខម៉ិញ
ទាហាន និងប៉ូលិស ចំនួន ៤៥០ នាក់ កាន់ដំបង ខែល និង កាំភ្លើងស្ទើរគ្រប់ដៃ បានរៀបប្រទាក់គ្នាធ្វើរនាំងបាំងផ្លូវឆ្ពោះទៅអាកាសយានដ្ឋានអន្តរជាតិចាស់ ដែលឋិតនៅភាគខាងជើងក្រុងបាងកក។ ចំណែកទាហានខ្លះទៀតប្រដាប់ដោយអាវុធស្វ័យប្រវត្តិ បានបាញ់កាំភ្លើងឡើងលើ ដើម្បីបង្អាក់ក្បួនបាតុកម្មរបស់ពួកអាវក្រហម។ បើយោងតាមសាក្សីខ្លះ ទាហានរដ្ឋាភិបាលបានទាំងបាញ់គ្រាប់កាំភ្លើងជ័រទៅលើបាតុករទៀតផង។
ពួកអាវក្រហម បានសម្រេចប្តូរយុទ្ធសាស្ត្រ ដោយព្រឹកមិញ ពួកគេបានសម្រេចបញ្ជូនបាតុករ ប្រមាណជិតពីរពាន់នាក់ ជិះឡានទ្រុងចំនួន២០០គ្រឿង និងម៉ូតូប្រមាណ៥០០គ្រឿង ទម្លាយចេញពីទីតាំងសង្កាត់Ratchaprasong ដែលឡោមព័ទ្ធទៅដោយទាហានរដ្ឋាភិបាល ឆ្ពោះទៅទិសខាងជើងបាងកក។ ជាការដង្ហែក្បួនថ្មីប្រកបដោយសន្តិភាព និងអហិង្សា ដើម្បីលើកទឹកចិត្តដល់ប្រជាជនដែលរស់នៅជាយក្រុងបាងកក។ នេះបើតាមការអះអាងរបស់មេដឹកនាំចលនាអាវក្រហមម្នាក់។
សេចក្តីសង្ឃឹមថានឹងរកឃើញច្រកចេញពីវិបត្តិ តាមរយៈការចរចា ត្រូវរលាយបាត់ដូចផ្សែង បន្ទាប់ពីនាយករដ្ឋមន្ត្រីថៃ លោក អាភិស៊ីត បានច្រានចោលសំណើរបស់ពួកអាវក្រហមសុំឲ្យមានការបោះឆ្នោតមុនកាលកំណត់ កាលពីចុងសប្តាហ៍មុន។
ប៉ុន្តែនៅយប់មិញ តាមរយៈកញ្ចក់ទូរទស្សន៍ BBC លោកអាភិស៊ីត ហាក់បន្ទន់សំឡេងបន្តិច ដោយបង្ហាញចេតនាចង់ឲ្យមានដំណោះស្រាយនយោបាយ។ ឆ្លើយនឹងសំណួររបស់អ្នកកាសែតបរទេស ទាក់ទងនឹងការលាលែងចេញពីតំណែង លោកអាភិស៊ីតបានបញ្ជាក់ថា “លោកអាចនឹងលាលែងចេញពីតំណែង ប្រសិនបើគាត់ជាឧបសគ្គនៃស្ថិរភាពនយោបាយរបស់ប្រទេស។ ប៉ុន្តែស្ថានភាពនៅប្រទេសថៃពេលនេះ មានបញ្ហាភេរវនិយមមកលាយឡំ មិនមែនជាបញ្ហានយោបាយសុទ្ធសាធទេ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ