លោកដូណាល់ ត្រាំ ភ្លឺភ្នែក ជាមួយនឹងមីស៊ីលអន្តរទ្វីបក្បាលគ្រាប់នុយក្លេអ៊ែរថ្មី របស់កូរ៉េខាងជើង
ចុះផ្សាយនៅថ្ងៃ៖
ស្តាប់ - ០៦:៥១
កាលពីព្រឹកថ្ងៃពុធ ទី២៩ វិច្ឆិកានេះ កូរ៉េខាងជើង ទើបតែបានបាញ់បង្ហោះ នូវមីស៊ីលបាលីស្ទីកអន្តរទ្វីប ដោយមានបំពាក់ក្បាលគ្រាប់នុយក្លេអ៊ែរ ថ្មីមួយគ្រាប់ទៀត ប្រកបដោយជោគជ័យ។ ទីភ្នាក់ងារ ព័ត៌មានផ្លូវការកូរ៉េខាងជើង បានអះអាងថា មីស៊ីលបាលីស្ទីកថ្មីនេះ នឹងអាចហោះទៅកំទេចទីក្រុងធំៗរបស់អាមេរិក បានដោយងាយបំផុត។ គីម ជុងអ៊ុន មេដឹកនាំកូរ៉េខាងជើង បានប្រកាសថា ចាប់ពីពេលនេះទៅ កូរ៉េខាងជើង គឺជាប្រទេសមហាអំណាចនុយក្លេអ៊ែរ ពិតៗ។ ការគំរាមរបស់កូរ៉េខាងជើងនេះ កាន់តែធ្វើឲ្យមានការព្រួយបារម្ភ អំពីលទ្ធភាព ដែលអាចកើតមានសង្រ្គាមនុយក្លេអ៊ែរ ព្រោះលោកដូណាល់ ត្រាំ ធ្លាប់បានប្រកាសថា នឹងកំទេចកូរ៉េខាងជើង ឲ្យឆេះខ្ទេចក្លាយជាផេះ។
ការសាកល្បងមីស៊ីលរបស់កូរ៉េខាងជើង ជាថ្មីម្តងទៀតនៅថ្ងៃទី ២៩ វិច្ឆិកានេះ គឺជារឿងធ្ងន់ធ្ងរណាស់។ តាមពិតទៅ គេមិនភ្ញាក់ផ្អើលប៉ុន្មានទេ ព្រោះកូរ៉េខាងជើងបានផ្អាករយៈពេល២ខែ ដើម្បីសំងំ រៀបចំដំឡើងមីស៊ីលនេះ យ៉ាងសំងាត់បំផុត។ មីស៊ីសថ្មីនេះ ជាប្រភេទមីស៊ីល អន្តរទ្វីប មានបំពាក់ក្បាលគ្រាប់នុយក្លេអ៊ែរ។ បើតាមការប្រកាស របស់ភ្នាក់ងារព័ត៌មានកូរ៉េខាងជើង ថា មីស៊ីល បានហោះឡើងទៅលើ បានកំពស់ ៤៤៧៥គីឡូម៉ែត្រ មុននឹងធ្លាក់មកវិញ នៅក្នុងសមុទ្រជប៉ុន។
មីស៊ីលកូរ៉េខាងជើង អាចហោះទៅកំទេចអាមេរិក គ្រប់ទីកន្លែងទាំងអស់
បើតាមការវិភាគរបស់អ្នកជំនាញជាច្រើន បានអះអាងថា បើមីស៊ីលនេះ រត់ទៅលើបានកំពស់ប៉ុននេះ មានន័យថា បើសិនជាបាញ់តាមខ្សែកោង គឺវាអាចរត់បានចំងាយ ប្រមាណ១៣០០០គីឡូម៉ែត្រឯណោះ។ ដូច្នេះ វាអាចជាការពិតហើយ ដែលថា មីស៊ីលកូរ៉េខាងជើង អាចហោះទៅកំទេចទីក្រុងធំៗ របស់អាមេរិកបានយ៉ាងងាយ។ លោក David Wright អ្នកជំនាញម្នាក់នៅ Union of Concerned scientists បានលើកឡើងថា ការសាកល្បងមីស៊ីលបាលីស្ទីកអន្តរទ្វីបលើកទី៣ របស់កូរ៉េខាងជើងនេះ បានបង្ហាញឲ្យឃើញច្បាស់ថា កូរ៉េខាងជើង អាចបាញ់កំទេចរដ្ឋធានីវ៉ាស៊ីនតោនបាន យ៉ាងស្រួល។
ក៏ប៉ុន្តែយ៉ាងណាក៏ដោយ មិនមែនមានន័យថា សមត្ថភាពនុយក្លេអ៊ែររបស់កូរ៉េខាងជើង បានឡើងដល់ចំណុចកំពូលនោះទេ។ អ្នកជំនាញរូបនេះ បានលើកឡើងថា កូរ៉េខាងជើងនៅមិនទាន់ មានសមត្ថភាពច្បាស់លាស់ ក្នុងការគ្រប់គ្របក្បាលនុយក្លេអ៊ែរ ដែលខ្លួនបំពាក់នឹងមីស៊ីលនេះទេ។ គឺជាបច្ចេកទេស គ្រប់គ្រងសំពាធនៅពេលក្បាលគ្រាប់ ដែលហោះចុះពីលំហរអាកាស មកចូលក្នុងបរិយាកាសផែនដីវិញ។ បើគ្រប់គ្រងមិនបាន គឺមានន័យថាក្បាលគ្រាប់អាចផ្ទុះនៅលើលំហរអាកាស ឬអាចខូចមិនដំណើរការ។
មីស៊ីលដែលកូរ៉េខងជើងបាញ់ថ្ងៃនេះ មានបំពាក់ក្បាលគ្រាប់នុយក្លេអ៊ែរ តែគ្មាននរណាដឹងទេ ថាក្បាលគ្រាប់នោះជាគ្រាប់ទទេរ ឬមានផ្ទុកប្រព័ន្ធបំផ្ទុះនុយក្លេអ៊ែរ ឬក៏អត់ទេ។ ត្រង់នេះក៏ជាចំណោទមួយទៀតដែរ ព្រោះកូរ៉េខាងជើង អាចមិនទាន់មានសមត្ថភាពច្បាស់ទេ។ ប៉ុន្តែសម្រាប់ពេលនេះ អ្វីដែលមិនប្រកែកបាន គឺសមត្ថភាពបាញ់បង្ហោះមីស៊ីលចំងាយឆ្ងាយ របស់កូរ៉េខាងជើង ដែលបានដើរដល់ចំណុចខ្ពស់ គួរឲ្យព្រួយបារម្ភ។
លោកដូណាល់ ត្រាំ ថា ៖ “កុំភ័យ ទុកឲ្យគាត់ចាត់ចែង!”
ជាការពិត យើងគ្រប់គ្នាធ្លាប់បានឮកន្លងមកហើយ នូវសំដីធ្ងន់ៗ ផាំងទៅផាំងមករវាងលោក ដូណាល់ ត្រាំ និងមេដឹកនាំកូរ៉េខាងជើង។ ពេលខ្លះ សម្តីលោកដូណាល់ ត្រាំ ហាក់ដូចជាសំដីកូនក្មេង ដែលឈ្លោះខឹងគ្នា។ ជាក់ស្តែង កាលពីនៅចំពោះមុខ មហាសន្និបាទ អង្គការសហប្រជាជាតិ លោកដូណាល់ ត្រាំ បានស្រែកក្តែងៗថា អាមេរិក នឹងកំទេចកូរ៉េខាងជើង ឲ្យឆេះក្លាយជាផេះ។ គឺសំដីរបៀបនេះហើយ ដែលធ្វើឲ្យគីម ជុនអ៊ុន បានលេសកាន់តែខ្លាំង។ លេសយ៉ាងម៉េច គឺ លេសថា អាមេរិកគំរាមកំទេចគេឲ្យខ្ទេចសល់តែផេះ អញ្ចឹងគេត្រូវតែធ្វើមីស៊ីលនុយក្លេអ៊ែរ ទុកការពារខ្លួនអញ្ចឹងហើយ។
ដោយឡែក ពេលនេះ លោកដូណាល់ ត្រាំ និយាយថា ទុកឲ្យគាត់អ្នកចាត់ចែង។ អាចមានន័យថា គាត់ និងក្រសួងការពារជាតិ នឹងចាត់ចែងធ្វើអ្វីម្យ៉ាង។ តែយ៉ាងណា កុំភ្លេចថា មិនមែនគាត់តែម្នាក់ឯង អាចធ្វើអ្វីបានទេ។ គឺត្រូវតែមានការគាំទ្រ ពីសភាទាំង២អង្គ របស់អាមេរិក។ យ៉ាងណាមិញ នៅថ្ងៃនេះ ក្រោយមកដល់សេតវិមាន លោកដូណាល់ ត្រាំ បានឆ្លៀតនិយាយរិះគន់ថា ពួកសមាជិកសភានិងព្រឹទ្ធសភា មកពីគណបក្សប្រជាធិបតេយ្យ ថាជា ពួកកំសាក។ ដូច្នេះមានន័យថា គាត់តែម្នាក់ឯង មិនអាចសម្រេចធ្វើសង្រ្គាម ជាមួយកូរ៉េខាងជើងបានទេ។
ជំរើសប្រើកំលាំងដែលអាមេរិកមិនហ៊ាន
លោក ដូណាល់ ត្រាំ តែងតែនិយាយថា ជំរើសប្រើកំលាំង វាយកូរ៉េខាងជើង គឺនៅមានជានិច្ច។ តែធាតុពិត បើវិភាគឲ្យមែនទែន អាមេរិកមិនអាចប្រថុយជ្រើសយកជំរើសនេះទេ។ ជំរើសទីមួយ បើសម្លាប់គីម ជុងអ៊ុនបាន ក៏មិនប្រាកដថា អាមេរិកអាចគ្រប់គ្រងស្ថានការនៅកូរ៉េខាងជើងបានដែរ។ ឧទាហរណ៍ នៅអ៊ីរ៉ាក់ និងនៅលីប៊ី មានជាមេរៀនស្រាប់។ សម្លេះ សាដាមហ៊ូសេន និង កាដាហ្វ៊ីបាន តែមិនអាចដោះស្រាយបញ្ហាបានទេ។
ជំរើសមួយទៀត គឺវាយកំទេច ដាច់ដោយឡែក ទៅលើទីតាំងផលិត និងស្តុងអាវុធ របស់កូរ៉េខាងជើង។ ជំរើសនេះ ក៏ពិបាកដែរ។ ពិបាក ព្រោះថាគេមិនអាចដឹងទីតាំងទាំងនោះទេ។ អ្នកវិភាគរបស់កូរ៉េខាងត្បូងម្នាក់ ឈ្មោះ ឈឹង សុងឆាង បានលើកឡើងថា មានរូងក្រោមដីខ្វាត់ខ្វែងច្រើនណាស់។ បើអាចកំទេចបាន ម្លេះរដ្ឋាភិបាលអាមេរិក កាលពីជំនាន់លោកប៊ូស បានសម្រេចធ្វើរួចទៅហើយ។ ទំរាំមកដល់ឥឡូវនេះ សមត្ថភាពលាក់បំពួនរបស់កូរ៉េខាងជើង មានកាន់តែខ្ពស់ ដូច្នេះការប្រើកំលាំងកំទេច ទីតាំងដាច់ដោយឡែកនេះ ជារឿងគ្រោះថ្នាក់ណាស់។ ព្រោះបើហ៊ានតែដាក់ កូរ៉េខាងជើង នឹងបានលេសបាញ់មកវិញមិនខាន។ សួរថាជីវិត ប្រជាជននៅសេអ៊ូល ១០លាននាក់ ដែលនៅក្បែរកូរ៉េខាងជើង តើនរណា ជាអ្នកទទួលខុសត្រូវ?
រឿងគំរាមប្រើកំលាំងនេះទៀតសោត គឺមានតែលោកដូណាល់ ត្រាំ ទេដែលស្រែក។ លោក John Hyten អគ្គមេបញ្ជាការទទួលបន្ទុកយុទ្ធសាស្ត្រ របស់កងទ័ពអាមេរិក បាននិយាយកាលពីថ្ងៃទី ១៧វិច្ឆិកា ថ្មីៗនេះថា៖ បើសិនជាលោកដូណាស់ ត្រាំ សម្រេចថាត្រូវប្រើកំលាំង នោះក្នុងនាមលោកជាមេបញ្ជាការ លោកមិនទៅធ្វើតាម ទាំងងងឹតងងុល ដោយមិនចោទសួរពីផលវិបាកនោះទេ។ លោកអះអាងថា លោកមិនខ្លាចនឹងប្រាប់ទៅលោកដូណាល់ ត្រាំវិញទេ ថា វាជារឿងខុសច្បាប់ ដែលអាមេរិក ប្រកាសសង្រ្គាមនុយក្លេអ៊ែរ ជាមួយកូរ៉េខាងជើង។
កូរ៉េខាងជើង បានទុកផ្លូវចរចា
វាគ្មានអ្វីឲ្យខាតបង់ទេ បើសិនជាចរចា ជាមួយកូរ៉េខាងជើង។ ផលអាក្រក់ដែលកើតចេញពីការប្រើកំលាំងអាវុធនោះ វាធ្ងន់ធ្ងរពេក ដែលមិនអាចឲ្យយើង មិនជ្រើសរើសយកជំរើសចរចាបានទេ។ នៅថ្ងៃពុធទី២៩ វិច្ឆិកានេះ ក្រោយបាញ់មីស៊ីលហើយ កូរ៉េខាងជើង បានចេញលិខិតប្រកាសមួយ សរសេរថា “អាវុធរបស់កូរ៉េខាងជើង មិនបានទៅគំរាមសន្តិសុខប្រទេសណា ឬតំបន់ណាមួយនោះទេ ល្គិកណា ផលប្រយោជន៍ជាតិរបស់កូរ៉េខាងជើង មិនត្រូវបានអ្នកផ្សេងមកបំពាន”។ ក្នុងន័យនេះ កូរ៉េខាងជើង នៅតែបន្ត អនុវត្តគោលការណ៍ធំ ដែលកំណត់ថា មិនត្រូវប្រើគ្រាប់នុយក្លេអ៊ែរមុនទេ ល្គិកណា គេមិនប្រើដាក់ខ្លួន។
លោកស្រី Melissa Hanham អ្នកជំនាញនៅវិទ្យាស្ថាន Middlebury បានលើកឡើងថា ការប្រកាសរបស់កូរ៉េខាងជើងដូច្នេះ មានន័យថា កូរ៉េខាងជើង ចង់បើកផ្លូវចរចាហើយ។ កូរ៉េខាងជើង បានទទួលអ្វីដែលខ្លួនចង់បានហើយ គឺការមានអាវុធបាលីស្ទីកក្បាលនុយក្លេអ៊ែរ ដែលអាចហោះបានឆ្ងាយ។ អាវុធនេះ ជាអាវុធ សម្រាប់គំរាម ដើម្បីចរចា។ ដូច្នេះ ចង់មិនចង់ មហាអំណាចទាំងអស់ ត្រូវតែចរចាជាមួយកូរ៉េខាងជើង។ បើបន្តនៅរឹង មិនព្រមធ្វើសម្បទានឲ្យគីម ជុងអ៊ុនទេនោះ គឺមិនខុសពីទុកពេល ឲ្យកូរ៉េខាងជើង បន្តបង្កើនសមត្ថភាព ឲ្យកាន់តែខ្ពស់ជាងនេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ