អាស៊ានខ្វល់ខ្វាយនឹងបញ្ហាលិចនាវាកូរ៉េខាងត្បូង និងវិបត្តិនៅហ្កាហ្សា
សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន គ្រោងនឹងចេញសេចក្តីថ្លែងការណ៍មួយ សម្តែងនូវការខ្វល់ខ្វាយចំពោះភាពតានតឹងជុំវិញការលិចនាវាចម្បាំង កូរ៉េខាងត្បូង និងវិបត្តិនៅតំបន់ហ្កាហ្សា ដែនដីប៉ាឡេស្ទីន។ អាស៊ានគ្រោងចេញសេចក្តីថ្លែងការណ៍នេះ នៅក្នុងកិច្ចប្រជុំថ្នាក់រដ្ឋមន្រ្តីការបរទេស ដែលនឹងបើកធ្វើនៅថ្ងៃចន្ទស្អែក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សេង ឌីណា
បើតាមគម្រោងសេចក្តីថ្លែងការណ៍នេះ រដ្ឋមន្រ្តីការបរទេសអាស៊ានសម្តែងនូវការខ្វល់ខ្វាយយ៉ាងខ្លាំងចំពោះការលិចនាវាចម្បាំងរបស់កូរ៉េខាងត្បូង ដែលបង្កឲ្យមានភាពតានតឹងកាន់តែខ្លាំងឡើងៗ នៅឧបទ្វីបកូរ៉េ។ ក៏ប៉ុន្តែ អាស៊ាននឹងមិនធ្វើការថ្កោលទោសកូរ៉េខាងជើង ក្នុងរឿងលិចនាវានេះឡើយ។
កិច្ចប្រជុំប្រចាំឆ្នាំថ្នាក់រដ្ឋមន្រ្តីការបរទេសអាស៊ាន នឹងចាប់បើកធ្វើពីថ្ងៃចន្ទស្អែក រហូតដល់ថ្ងៃសុក្រ នៅទីក្រុងហាណូយ ប្រទេសវៀតណាម។ ក្នុងពេលជាមួយគ្នា អាស៊ានក៏នឹងរៀបចំបើកធ្វើវេទិកាប្រចាំឆ្នាំ ស្តីពីសន្តិសុខតំបន់ផងដែរ ដោយមានការចូលរួមពី រដ្ឋមន្រ្តីការបរទេសនៃប្រទេសជាសមាជិកទាំង ២៧ប្រទេស ដែលក្នុងនោះក៏មាន រដ្ឋមន្រ្តីការបរទេសអាមេរិក ចិន កូរ៉េខាងត្បូង កូរ៉េខាងជើង ជប៉ុន និងរុស្ស៊ី ផងដែរ។
កូរ៉េខាងត្បូងបានស្នើសុំឲ្យវេទិកាសន្តិសុខអាស៊ានចេញសេចក្តីថ្លែងការណ៍ថ្កោលទោសកូរ៉េខាងជើងចំពោះការបាញ់ពន្លិចនាវាចម្បាំងរបស់ខ្លួន។ ក៏ប៉ុន្តែ អ្នកវិភាគជាច្រើនយល់ថា វេទិកាអាស៊ាននឹងមិនធ្វើការថ្កោលទោសកូរ៉េខាងជើង តាមការចង់បានរបស់កូរ៉េខាងត្បូងនេះទេ។ នៅក្នុងគម្រោងសេចក្តីថ្លែងការណ៍របស់ខ្លួន រដ្ឋមន្រ្តីក្រសួងការបរទេសអាស៊ានបានអំពាវនាវផងដែរឲ្យគ្រប់ភាគីជម្លោះមានភាពអត់ធ្មត់ ដើម្បីចៀសវាងកុំឲ្យស្ថានភាពកាន់តែតានតឹងឡើងថែមទៀត។
ទាក់ទងនឹងបញ្ហានៅតំបន់ហ្កាហ្សាវិញ រដ្ឋមន្រ្តីការបរទេសអាស៊ានគ្រោងធ្វើការថ្កោលទោសយ៉ាងខ្លាំងក្លា ចំពោះប្រតិបត្តិការកងទ័ពអ៊ីស្រាអែល ដែលបានធ្វើការវាយប្រហារទៅលើនាវាដឹកជំនួយទៅហ្កាហ្សា កាលពីថ្ងៃទី៣១ ឧសភា។ ក្នុងពេលជាមួយគ្នា អាស៊ាន ក៏នឹងអំពាវនាវផងដែរឲ្យអ៊ីស្រាអែលបញ្ឈប់ការរារាំងការដឹកជំនួយមនុស្សធម៌ចូលទៅតំបន់ហ្កាហ្សា ហើយឲ្យអ៊ីស្រាអែល និងប៉ាឡេស្ទីនចាប់បើកឡើងវិញនូវកិច្ចចរចា ដើម្បីស្វែងរកដំណោះស្រាយសមស្របមួយ ឈានទៅបង្កើតរដ្ឋប៉ាឡេស្ទីនឯករាជ្យ និងបញ្ចប់ជម្លោះជាមួយអ៊ីស្រាអែល។
គួរបញ្ជាក់ថា នៅក្នុងចំណោមប្រទេសជាសមាជិកអាស៊ាន ឥណ្ឌូនេស៊ី គឺជាប្រទេសកាន់សាសនាអ៊ីស្លាមធំជាងគេបំផុត នៅលើពិភពលោក។ ក្រៅពីនេះ ម៉ាឡេស៊ី និងប៊្រុយណេ ក៏ជាប្រទេស ដែលមានប្រជាជនភាគច្រើនកាន់សាសនាអ៊ីស្លាមផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ