សម្ព័ន្ធអារ៉ាប់ស្នើឲ្យអ.ស.ប.បញ្ជូនកងទ័ពមួកខៀវទៅស៊ីរី
កាលពីថ្ងៃអាទិត្យ ១២កុម្ភៈ ម្សិលមិញនេះ សម្ព័ន្ធអារ៉ាប់បានចេញសម្រេចផ្តល់ការគាំទ្រទាំងផ្នែកនយោបាយ និងហិរញ្ញវត្ថុដល់ក្រុមប្រឆាំង ព្រមទាំងបើកផ្លូវឲ្យមានការប្រាស្រ័យទាក់ទងជាមួយ “ក្រុមប្រឹក្សាជាតិស៊ីរី" ដែលតំណាងឲ្យក្រុមប្រឆាំងស៊ីរី។ ក្នុងពេលជាមួយគ្នា សម្ព័ន្ធអារ៉ាប់ក៏បានសម្រេចផងដែរថានឹងបញ្ឈប់ជាស្ថាពរនូវបេសកកម្មសង្កេតការណ៍នៅស៊ីរី ប៉ុន្តែ បានស្នើឲ្យអ.ស.ប.បញ្ជូនកងរក្សាសន្តិភាពទៅស៊ីរី។
ចុះផ្សាយនៅថ្ងៃ៖
ស្តាប់ - ០៦:៣៨
យោងតាមសំណើរបស់សម្ព័ន្ធអារ៉ាប់ (មានប្រទេស ដែលនិយាយភាសាអារ៉ាប់ ចំនួន ២២ ជាសមាជិក) កងរក្សាសន្តិភាព ដែលត្រូវបញ្ជូនទៅស៊ីរី គឺជាកងកម្លាំងរួម អ.ស.ប.-សម្ព័ន្ធអារ៉ាប់។ បេសកកម្មរួមគ្នាបែបនេះ ក៏ធ្លាប់បានធ្វើដែរ នៅប្រទេសស៊ូដង់ (កងមួកខៀវរួមអ.ស.ប.-សហភាពអាហ្រ្វិក)។
សំណើរបស់សម្ព័ន្ធអារ៉ាប់បានទទួលនូវការគាំទ្រពីសំណាក់សហភាពអឺរ៉ុប ក៏ប៉ុន្តែ ត្រូវរដ្ឋាភិបាលស៊ីរីប្រកាសច្រានចោលភ្លាមៗ ដោយចោទថា វាជាការរំលោភលើអធិបតេយ្យ និងជ្រៀតជ្រែកចូលក្នុងកិច្ចការផ្ទៃក្នុងរបស់ស៊ីរី។
គួរបញ្ជាក់ថា ស្ថាប័នដែលមានសមត្ថកិច្ចសម្រេចបញ្ជូនកងរក្សាសន្តិភាពអ.ស.ប. (កងមួកខៀវ) គឺក្រុមប្រឹក្សាសន្តិសុខ។ ដូច្នេះ រាល់សំណើឲ្យបញ្ជូនកងទ័ពមួកខៀវទៅស៊ីរី គឺប្រាកដជាត្រូវប្រឈមមុខនឹងវ៉េតូរបស់រុស្ស៊ី ដែលជាសម្ព័ន្ធមិត្តរបស់រដ្ឋាភិបាលស៊ីរី។
កាលពីថ្ងៃសុក្រ ៤កុម្ភៈ ២០១២កន្លងទៅនេះ រុស្ស៊ី រួមជាមួយចិន ទើបនឹងបានប្រើសិទ្ធិវ៉េតូ រារាំងមិនឲ្យក្រុមប្រឹក្សាសន្តិសុខអនុម័តសេចក្តីសម្រេចគាំទ្រផែនការរបស់សម្ព័ន្ធអារ៉ាប់ ដើម្បីដោះស្រាយវិបត្តិស៊ីរី។
នៅថ្ងៃចន្ទនេះ រដ្ឋមន្រ្តីក្រសួងការបរទេសរុស្ស៊ីបានឲ្យដឹងថា រុស្ស៊ីកំពុងធ្វើការសិក្សាលម្អិតទៅលើសំណើរបស់សម្ព័ន្ធអារ៉ាប់ ក៏ប៉ុន្តែ ក្នុងពេលជាមួយគ្នាក៏បានបញ្ជាក់ផងដែរថា ការដាក់ពង្រាយកងកម្លាំងរក្សាសន្តិភាពទៅស៊ីរីនឹងមិនអាចធ្វើទៅបានទេ ប្រសិនបើគ្មានបទឈប់បាញ់ជាមុនទេនោះ។
ការទាមទារឲ្យមានបទឈប់បាញ់មុននឹងបញ្ជូនកងរក្សាសន្តិភាព គឺជាគោលការណ៍ ដែលអ.ស.ប.ប្រកាន់យកតាំងពីដើមមក។ ជាទូទៅ មុននឹងសម្រេចបញ្ជូនកងទ័ពមួកខៀវ ក្រុមប្រឹក្សាសន្តិសុខតែងតែទាមទារឲ្យមានការព្រមព្រៀងពីគ្រប់ភាគីជម្លោះ ដើម្បីធានាថា គ្រប់ភាគីជម្លោះពិតជាមានសុឆន្ទៈ ក្នុងការបញ្ចប់ជម្លោះពិតមែន។ ម្យ៉ាងទៀត កងទ័ពមួកខៀវ មិនមែនជាកងទ័ពប្រយុទ្ធនោះទេ។ ដូច្នេះ គេមិនចង់ដាក់ពង្រាយកងទ័ពមួកខៀវ ទៅកាន់សមរភូមិប្រយុទ្ធនោះទេ។
កន្លងមក គេក៏ធ្លាប់ឃើញអ.ស.ប. អនុញ្ញាតឲ្យមានបេសកកម្មរក្សាសន្តិភាព នៅមុនមានបទឈប់បាញ់ដែរ (ប្រតិបត្តិការរបស់អង្គការ NATO នៅអតីតយូហ្គោស្លាវី) ក៏ប៉ុន្តែ ប្រតិបត្តិការនេះ គេគួរហៅថាជាប្រតិបត្តិការ “បង្កើតសន្តិភាព” ជាជាង “រក្សាសន្តិភាព”។ ប្រសិនបើគេចង់ដាក់ពង្រាយកងទ័ពទៅស៊ីរី ដោយគ្មានបទឈប់បាញ់ ដូចដែលអង្គការ NATO ធ្លាប់ធ្វើនៅអតីតយូហ្គៅស្លាវីមែន គឺមានន័យថា គេត្រូវធ្វើសង្រ្គាមជាមួយកងទ័ពស៊ីរី។ រហូតមកទល់ពេលនេះ គេហាក់ដូចជាមិនទាន់ឃើញមានប្រទេសណាមួយចង់បញ្ជូនកងទ័ពទៅធ្វើសង្រ្គាមនៅស៊ីរីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ