បន្ទាប់ពីវ៉េតូរុស្ស៊ីនិងចិន សំណុំរឿងស៊ីរីវិលត្រឡប់ទៅដល់អ.ស.ប.សាជាថ្មី
សេចក្តីព្រាងស្នើឡើងដោយអារ៉ាប៊ីសាអ៊ូឌីតត្រូវបានបញ្ជូនទៅដល់មហាសន្និបាតអ.ស.ប. កាលពីថ្ងៃសុក្រ ១០កុម្ភៈ ម្សិលមិញ។ សេចក្តីព្រាងនេះមានខ្លឹមសារដូចគ្នាស្ទើរតែទាំងស្រុងនឹងសេចក្តីព្រាង នៅក្រុមប្រឹក្សាសន្តិសុខ ដែលរុស្ស៊ី និងចិនវ៉េតូ កាលពីសប្តាហ៍មុន។ ក្នុងពេលជាមួយគ្នា តួកគីក៏គ្រោងស្នើសុំផងដែរឲ្យអ.ស.ប.ចាត់វិធានការបន្ទាន់ ដើម្បីបញ្ជូនជំនួយមនុស្សធម៌ទៅស៊ីរី។
ចុះផ្សាយនៅថ្ងៃ៖
ស្តាប់ - ០៣:៤២
សេចក្តីព្រាងស្នើឡើងដោយអារ៉ាប៊ីសាអ៊ូឌីត នៅពេលនេះ ចែងអំពីការគាំទ្រទាំងស្រុងចំពោះផែនការរបស់សម្ព័ន្ធអារ៉ាប់ ដើម្បីដោះស្រាយវិបត្តិនៅស៊ីរី។ យោងតាមផែនការរបស់សម្ព័ន្ធអារ៉ាប់ លោកបាស្ហា អាល់អាសាដ ត្រូវចុះចេញពីតំណែង ហើយផ្ទេរអំណាចទៅឲ្យអនុប្រធានាធិបតីស៊ីរី ដើម្បីបង្កើតជារដ្ឋាភិបាលរួបរួមជាតិ ដែលរួមបញ្ចូលក្រុមប្រឆាំង។
នៅក្នុងសេចក្តីព្រាងសេចក្តីសម្រេចរបស់ក្រុមប្រឹក្សាសន្តិសុខ កាលពីសប្តាហ៍មុន ក៏មានចែងអំពីផែនការនេះដែរ ដែលជាហេតុធ្វើឲ្យរុស្ស៊ី និងចិនជំទាស់។ ក៏ប៉ុន្តែ នៅមហាសន្និបាតអ.ស.ប. (មានប្រទេសជាសមាជិកចំនួន ១៩៣) គ្មានប្រទេសណាមួយមានសិទ្ធិវ៉េតូ ដូចជា នៅក្រុមប្រឹក្សាសន្តិសុខនោះទេ។ ប៉ុន្តែ សេចក្តីសម្រេចរបស់មហាសន្និបាតក៏មិនមានអំណាចច្បាប់ ដូចជាសេចក្តីសម្រេចរបស់ក្រុមប្រឹក្សាសន្តិសុខដែរ។
មហាសន្និបាតអ.ស.ប. គ្រោងនឹងលើកសំណើរបស់អារ៉ាប៊ីសាអ៊ូឌីតមកប្រជុំពិភាក្សា នៅថ្ងៃចន្ទ សប្តាហ៍ក្រោយ ហើយគេរំពឹងថា ការបោះឆ្នោតអនុម័តអាចនឹងប្រព្រឹត្តទៅ នៅចុងសប្តាហ៍។
នៅថ្ងៃសៅរ៍នេះ រដ្ឋមន្រ្តីក្រសួងការបរទេសតួកគីបានប្រកាសថា តួកគីក៏គ្រោងនឹងដាក់សំណើមួយទៅអ.ស.ប.ដែរ ដើម្បីស្នើឲ្យចាត់វិធានការបន្ទាន់ ក្នុងការបញ្ជូនជំនួយមនុស្សធម៌ទៅជួយជនស៊ីវិលស៊ីរី ដែលកំពុងទទួលរងនូវការវាយប្រហារពីសំណាក់កងទ័ពស៊ីរី។
គួរបញ្ជាក់ថា តួកគីជាប្រទេសមានព្រំប្រទល់ជាប់នឹងប្រទេសស៊ីរី និងជាអតីតសម្ព័ន្ធមិត្តរបស់ស៊ីរី។ ក៏ប៉ុន្តែ រដ្ឋាភិបាលតួកគីបានសម្រេចកាត់ផ្តាច់សម្ព័ន្ធភាពជាមួយរបបដឹកនាំលោកអាសាដ ក្រោយពីអាជ្ញាធរស៊ីរីបានប្រើកម្លាំងបង្រ្កាបបាតុករប្រឆាំង។
បណ្តាប្រទេសអារ៉ាប់ នៅក្នុងតំបន់ឈូងសមុទ្រពែរស៍ កំពុងប្រជុំគ្នា នៅថ្ងៃសៅរ៍នេះ ដើម្បីជជែកអំពីវិបត្តិស៊ីរី។ នៅថ្ងៃអាទិត្យស្អែក សម្ព័ន្ធអារ៉ាប់ក៏នឹងបើកកិច្ចប្រជុំមួយដែរ នៅទីស្នាក់ការ ក្នុងប្រទេសអេហ្ស៊ីប។
កន្លងមក នាយករដ្ឋមន្រ្តីប្រទេសកាតារធ្លាប់បានថ្លែងថា រដ្ឋាភិបាលរបស់លោកចង់ឲ្យប្រទេសអារ៉ាប់បញ្ជូនកងទ័ពទៅស៊ីរី ដើម្បីបញ្ឈប់ការបង្ហូរឈាមជនស៊ីវិល។ ក៏ប៉ុន្តែ សំណើនេះហាក់ដូចជាមិនទទួលបានការគាំទ្រពីប្រទេសផ្សេងទៀតនោះទេ។ នៅពេលនេះ ដោយសារតែដំណោះស្រាយតាមរយៈក្រុមប្រឹក្សាសន្តិសុខត្រូវជាប់គាំង ដោយសារតែវ៉េតូរបស់រុស្ស៊ី និងចិន រដ្ឋាភិបាលកាតារអាចនឹងសម្រេចផ្តល់ជំនួយជាលុយ និងសព្វាវុធដល់ក្រុមឧទ្ទាមស៊ីរី ដូចដែលកាតារធ្លាប់ធ្វើចំពោះក្រុមឧទ្ទាមលីប៊ី កន្លងមក។
កាលពីថ្ងៃសុក្រ រដ្ឋមន្រ្តីក្រសួងការបរទេសរុស្ស៊ី បានចោទដោយមិនបញ្ចេញចំឈ្មោះថា ប្រទេសលោកខាងលិចខ្លះ កំពុងផ្តល់សព្វាវុធ និងអ្នកជំនាញខាងយោធា ទៅឲ្យក្រុមប្រឆាំងស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ