បន្ទាប់ពីផ្តាច់ទំនាក់ទំនងជាមួយរដ្ឋាភិបាលស៊ីរី ប្រទេសអារ៉ាប់គ្រោងទទួលស្គាល់ក្រុមប្រឆាំង
បណ្តាប្រទេសអារ៉ាប់នឹងប្រកាសទទួលស្គាល់ “ក្រុមប្រឹក្សាជាតិស៊ីរី” ដែលជាក្រុមប្រឆាំង នៅក្នុងពេលឆាប់ៗខាងមុខនេះហើយ។ នេះបើយោងតាមសមាជិកម្នាក់របស់ “ក្រុមប្រឹក្សាជាតិស៊ីរី” ដែលបានទៅចូលរួមក្នុងកិច្ចប្រជុំរបស់ប្រទេសអារ៉ាប់ក្នុងតំបន់ឈូងសមុទ្រពែរស៍ កាលពីថ្ងៃសៅរ៍ម្សិលមិញ។ នៅថ្ងៃអាទិត្យនេះ សម្ព័ន្ធអារ៉ាប់នឹងប្រជុំគ្នា នៅប្រទេសអេហ្ស៊ីប ដើម្បីជជែកអំពីវិបត្តិស៊ីរី។ ក្នុងពេលជាមួយគ្នា មន្រ្តីរដ្ឋាភិបាលអារ៉ាប៊ីសាអ៊ូឌីតបានប្រកាសបដិសេធព័ត៌មាន ដែលថា អារ៉ាប៊ីសាអ៊ូឌីតបានស្នើឲ្យមហាសន្និបាតអ.ស.ប. អនុម័តសេចក្តីសម្រេចជុំវិញវិបត្តិស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ក្រោយពីមានវ៉េតូរបស់រុស្ស៊ី និងចិន នៅក្រុមប្រឹក្សាសន្តិសុខ កាលពីចុងសប្តាហ៍មុន ប្រទេសអារ៉ាប់ចំនួន ៦ នៅក្នុងតំបន់ឈូងសមុទ្រពែរស៍ រួមមាន អារ៉ាប៊ីសាអ៊ូឌីត កាតារ បារ៉ែន កូវ៉ែត អូម៉ង់ និងអារ៉ាប់រួម ព្រមទាំងប្រទេសអារ៉ាប់ពីរទៀត នៅតំបន់អាហ្វ្រិកខាងជើង គឺទុយនីស៊ី និងលីប៊ី បានប្រកាសផ្តាច់រាល់ទំនាក់ទំនងការទូតជាមួយរបបដឹកនាំស៊ីរី។ ក៏ប៉ុន្តែ រហូតមកទល់ពេលនេះ មានតែលីប៊ីមួយប៉ុណ្ណោះ ដែលប្រកាសទទួលស្គាល់ជាផ្លូវការក្រុមប្រឆាំង គឺ “ក្រុមប្រឹក្សាជាតិស៊ីរី”។
គួរបញ្ជាក់ថា នៅក្នុងក្រុមប្រឹក្សាជាតិស៊ីរី គឺមានក្រុមប្រឆាំងមកពីគ្រប់និន្នាការទាំងអស់ ក្នុងនោះក៏មានក្រុមអ៊ីស្លាមជ្រុលនិយមផងដែរ។
កាលពីថ្ងៃសៅរ៍ម្សិលមិញ នៅក្រោយការប្រជុំជាមួយប្រទេសនៅឈូងសមុទ្រពែរស៍ (Gulf Cooperation Council) សមាជិកម្នាក់នៃក្រុមប្រឹក្សាជាតិស៊ីរីបានប្រាប់ទីភ្នាក់ងារព័ត៌មានបារាំង (AFP) ថា ប្រទេសអារ៉ាប់នឹងប្រកាសទទួលស្គាល់ក្រុមប្រឹក្សាជាតិស៊ីរី នៅក្នុងពេលឆាប់ៗខាងមុខនេះ។ ក៏ប៉ុន្តែ ការប្រកាសទទួលស្គាល់នេះ មិនប្រាកដថានឹងអាចធ្វើឡើង នៅក្នុងកិច្ចប្រជុំរបស់សម្ព័ន្ធអារ៉ាប់ នៅអេហ្ស៊ីប នៅថ្ងៃអាទិត្យនេះទេ។
នៅពេលនេះ តំណាងក្រុមប្រឹក្សាជាតិស៊ីរីចំនួន ៤រូប កំពុងស្ថិតក្នុងប្រទេសអេហ្ស៊ីប ដើម្បីជួបជជែកជាមួយមន្រ្តីសម្ព័ន្ធអារ៉ាប់ ជុំវិញសំណើរបស់បារាំង ដែលចង់បង្កើន “ក្រុមប្រទេសជាមិត្តរបស់ស៊ីរី” ដូចដែលធ្លាប់បានធ្វើ កាលពីនៅលីប៊ី។ លោកនីកូឡា សាកូហ្ស៊ី ប្រធានាធិបតីបារាំង បានស្នើឲ្យបង្កើត “ក្រុមប្រទេសជាមិត្តរបស់ស៊ីរី” នេះ ក្រោយពីមើលឃើញថា ដំណោះស្រាយតាមរយៈក្រុមប្រឹក្សាសន្តិសុខអ.ស.ប.ត្រូវជាប់គាំង ដោយវ៉េតូរបស់រុស្ស៊ី និងចិន។
កាលពីថ្ងៃសុក្រ ព្រះចៅអាប់ឌុឡា របស់អារ៉ាប៊ីសាអ៊ូឌីតបានថ្លែងថា វ៉េតូរបស់រុស្ស៊ី និងចិន នៅក្រុមប្រឹក្សាសន្តិសុខ កាលពីថ្ងៃទី៤កុម្ភៈ កន្លងទៅនេះ កំពុងតែធ្វើឲ្យពិភពលោកបាត់បង់ជំនឿលើអ.ស.ប.។ នៅថ្ងៃសៅរ៍ម្សិលមិញ ប្រភពពីមន្រ្តីការទូតអ.ស.ប.បានឲ្យដឹងថា អារ៉ាប៊ីសាអ៊ូឌីត បានដាក់សំណើឲ្យមហាសន្និបាតអ.ស.ប. អនុម័តសេចក្តីសម្រេចគាំទ្រផែនការរបស់សម្ព័ន្ធអារ៉ាប់ ដើម្បីដោះស្រាយវិបត្តិស៊ីរី។ ក៏ប៉ុន្តែ នៅថ្ងៃនេះ រដ្ឋមន្រ្តីការបរទេសអារ៉ាប៊ីសាអ៊ូឌីតបានបដិសេធថា អារ៉ាប៊ីសាអ៊ូឌីតមិនបានធ្វើសំណើនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ