អាមេរិក៖ហេតុអ្វីបានជាលោកបារ៉ាក់ អូបាម៉ាព្យាយាមការពារ Obamacare ខ្លាំងម្ល៉េះ?
ចុះផ្សាយនៅថ្ងៃ៖
ស្តាប់ - ០៧:០៤
នៅសហរដ្ឋអាមេរិក លោកប្រធានាធិបតីផុតអាណត្តិបារ៉ាក់ អូបាម៉ាបានអញ្ជើញទៅចូលរួមប្រជុំបិទទ្វារជាមួយក្រុមអ្នកតំណាងរាស្រ្ត និងក្រុមសមាជិកព្រឹទ្ធសភានៃគណបក្សប្រជាធិបតេយ្យដែលមានសំឡេងភាគតិចនាថ្ងៃពុធ ទី៤ មករា។ កម្មវត្ថុរបស់លោកអូបាម៉ា គឺដើម្បីរៀបចំយុទ្ធសាស្រ្តទប់ទល់នឹងគណបក្សសាធារណរដ្ឋរបស់លោកប្រធានាធិបតីជាប់ឆ្នោតថ្មីដូណាល់ ត្រាំដែលគ្រោងនឹងលប់ចោលច្បាប់មួយចំនួនអនុម័តក្នុងជំនាន់លោក ពិសេសច្បាប់ធានារ៉ាប់រងសុខភាពដែលហៅថា « Obamacare »។
លោកបារ៉ាក់ អូបាម៉ាមិនចង់ឲ្យលោកដូណាល់ ត្រាំប៉ះពាល់ដល់ច្បាប់ធានារ៉ាប់រងសុខភាព« Obamacare »ទាល់តែសោះ។ ការមិនចង់ឲ្យកែប្រែ ឬលុបចោល « Obamacare » មិនមែនដោយសារតែច្បាប់មួយនេះកំពុងផ្តល់ផលប្រយោជន៍ឲ្យក្រុមគ្រួសារលោកអូបាម៉ាទេ តែវាកំពុងជួយឲ្យពលរដ្ឋអាមរិកទទួលបានសេវាធានារ៉ាប់រងសុខភាពដោយមានជំនួយពីរដ្ឋ។ គេអាចនិយាយបានថា « Obamacare » ជាកេរដំណែលតែមួយគត់របស់លោកអូបាម៉ានៅក្នុងរយៈពេល ១០ឆ្នាំនៃការកាន់អំណាចរបស់លោក។
ការហ៊ាននិយាយដូចនេះ ព្រោះ « Obamacare » គឺជាប្រធានបទអាទិភាពស្លាប់រស់ដែលលោកអូបាម៉ាបានសន្យាសម្រេចឲ្យបានតាំងពីនៅក្នុងយុទ្ធនាការឃោសនាបោះឆ្នោតក៏ដូចជាការកាន់តំណែងរយៈពេល ២អាណត្តិ។ កំណត់សម្គាល់មួយទៀត « Obamacare » គឺជាច្បាប់ដ៏ប្រទាញប្រទង់គ្នាយ៉ាងខ្លាំងនៅក្នុងសភាក៏ដូចជានៅក្នុងព្រឹទ្ធសភា។ « Obamacare » ត្រូវបានសភាបោះឆ្នោតអនុម័តក្នុងពីឆ្នំា ២០១០ តែគេត្រូវរង់ចាំដល់ថ្ងៃទី១ មករា ឆ្នាំ ២០១៤ ទើប« Obamacare » ចូលធរមានពេញលេញ។
នៅសល់តែ ២សប្តាហ៍ទៀតប៉ុណ្ណោះ ពោលនៅថ្ងៃទី២០ មករា អាណត្តិរបស់លោកអូបាម៉ានឹងត្រូវបញ្ចប់ តែលោកអូបាម៉ាមិនចង់ឃើញ « Obamacare » ចប់អាណត្តិដូចលោកទេ។
អ្វីទៅជាយុទ្ធសាស្រ្តរបស់លោកអូបាម៉ាដើម្បីការពារ« Obamacare »?
សមរភូមិដែលត្រូវតទល់គ្នារវាងគណបក្សសាធារណរដ្ឋ និងគណបក្សប្រជាធិបតេយ្យ គឺនៅសភា និងព្រឹទ្ធសភាដូចដែលគណបក្សសាធារណរដ្ឋធ្លាប់បានប្រើដើម្បីប្រឆាំងនឹងសំណើលោកអូបាម៉ា។ នៅក្នុងកិច្ចប្រជុំបិទទ្វារជាមួយក្រុមអ្នកតំណាងរាស្រ្ត និងក្រុមសមាជិកព្រឹទ្ធសភានៃគណបក្សប្រជាធិបតេយ្យក្នុងថ្ងៃពុធ ទី៤ មករា លោកអូបាម៉ាបានអំពាវនាវ និងលើកទឹកចិត្តដល់ក្រុមប្រជាធិបតេយ្យទាំងអស់ឲ្យត្រៀមខ្លួនប្រឆាំងរាល់ទង្វើរបស់ក្រុមសាធារណរដ្ឋដែលមានគម្រោងបោះឆ្នោតកែប្រែ ឬលុបច្បាប់មួយចំនួនរបស់លោក ពិសេសច្បាប់ « Obamacare »។
គឺអាចនិយាយបានថា លោកអូបាម៉ាបានប្រើយុទ្ធសាស្រ្តឧទ្ទាម ដោយស្នើក្រុមសមាជិកព្រឹទ្ធសភាប្រជាធិបតេយ្យដែលមានសំឡេងតិចមែន តែអាចបន្តប្រើសំឡេងប្រឆាំងដើម្បីធ្វើឲ្យមានការជាប់គាំងនៅសភាក្នុងការបោះឆ្នោតកែប្រែ ឬលុបចោលច្បាប់ណាមួយដែលបានអនុម័តក្នុងជំនាន់លោកនាពេលកន្លងមក។ យុទ្ធសាស្រ្តឧទ្ទាមរបៀបនេះក៏ធ្លាប់បានប្រើដោយក្រុមសាធារណរដ្ឋដែលបានជំទាស់នឹងសំណើរបស់លោកអូបាម៉ា។ ក្រៅពីប្រើយុទ្ធសាស្រ្តឧទ្ទាមនៅសភា លោកអូបាម៉ាក៏អាចប្រើចលនាមហាជនឲ្យជួយបន្តគាំទ្រ « Obamacare » ដែរ។
លទ្ធផលស្ទង់មតិថ្មីៗនេះឲ្យដឹងថា មានពលរដ្ឋអាមេរិកដល់ទៅ ៧៥% បានសម្តែងមតិចង់ឲ្យមានការរក្សាទុកច្បាប់ធានារ៉ាប់រងសុខភាព « Obamacare » របស់លោកអូបាម៉ា។ គិតមកទល់ពេលនេះ មានពលរដ្ឋអាមេរិកជាង ២០លាននាក់បានទទួលសេវាធានារ៉ាប់រង « Obamacare » ដោយមានជំនួយពីរដ្ឋជាលើកទី១ នៅក្នុងជីវិតរបស់ពួកគេ។
បើ « Obamacare »ផ្តល់ប្រយោជន៍ដល់ពលរដ្ឋអាមេរិក ចុះហេតុអ្វីបានជាលោកដូណាល់ ត្រាំចង់លុបចោល?
រហូតមកដល់ពេលនេះ ហេតុផលដែលលោកដូណាល់ ត្រាំបានលើកឡើងគឺថា « Obamacare » បានធ្វើឲ្យថៅកែចំណាយលុយច្រើន ហើយរដ្ឋក៏បានចាយលុយយ៉ាងច្រើនសម្បើមដែរនៅក្នុងបញ្ហាសុខភាពសាធារណៈ។ ពាក្យពេចន៍ដដែលនេះក៏ត្រូវបានរម្លឹកជាថ្មីដោយលោក Mike Pence អនុប្រធានាធិបតីថ្មីរបស់លោកដូណាល់ ត្រាំនាថ្ងៃពុធ ទី៤ មករា។ លោក Pence បានថ្លែងច្បាស់ៗទៅកាន់ក្រុមអ្នកកាសែតថា អាទិភាពរបស់លោកដូណាល់ ត្រាំ គឺលុបចោលច្បាប់ « Obamacare » ព្រោះជាច្បាប់ដែលកំពុងទទួលបរាជ័យ និងដែលមានពលរដ្ឋអាមេរិកភាគច្រើនមិនទទួលយកទេ។
តាមលោក Pence ច្បាប់« Obamacare » នឹងត្រូវដាក់ជំនួសដោយច្បាប់ថ្មីស្តីពីសុខភាពដែលមានប្រសិទ្ធិភាពជាងច្បាប់« Obamacare » និងដែលរដ្ឋចំណាយលុយតិច។ លោក Pence បានបន្ថែមថា ពេលវេលាបានឈានមកដល់ហើយដែលត្រូវគោរពពាក្យសន្យារបស់លោកដូណាល់ ត្រាំក្នុងសម័យយុទ្ធនាការឃោសនាបោះឆ្នោត។ ឃើញថា ទាំងលោកប្រធានាធិបតី និងអនុប្រធានាធិបតីថ្មីមិនបោះបង់ចោលគម្រោងកំចាត់ « Obamacare » ទេ តែបញ្ហានៅត្រង់ថាមកទល់ពេលនេះ គេនៅមិនទាន់ឃើញលោកដូណាល់ ត្រាំស្នើច្បាប់អ្វីថ្មីស្តីពីសុខភាពដែលនឹងត្រូវចូលទៅជំនួសច្បាប់ « Obamacare » នៅឡើយទេ។
អ្វីដែលលោកដូណាល់ ត្រាំបានសន្យានោះគឺថា ពលរដ្ឋអាមេរិកដែលបានទទួលបានសេវាធានារ៉ាប់រងសុខភាព « Obamacare » នឹងមិនបាត់បង់សេវាធានារ៉ាប់រងសុខភាពរបស់ខ្លួនទេក្នុងពេលដែលច្បាប់ « Obamacare » ត្រូវកែប្រែ ត្រូវជំនួសដោយច្បាប់ថ្មី ឬមួយក៏ត្រូវលុបចោលទាំងស្រុងនោះ។ ចំណែកលោកអូបាម៉ាក៏បានបន្តជំរុញពលរដ្ឋអាមេរិកឲ្យបន្តទៅចុះឈ្មោះដើម្បីទទួលបាន « Obamacare »។
សូមជម្រាបជូនថាតាមរដ្ឋធម្មនុញ្ញអាមេរិក សភាអាចបោះឆ្នោតលុបច្បាប់ណាមួយដែលទើបបានអនុម័តនារយៈពេលប៉ុន្មានខែចុងក្រោយនេះ។ ក្រុមតំណាងរាស្រ្តគណបក្សសាធារណរដ្ឋដែលមានសំឡេងភាគច្រើនអាចបោះឆ្នោតលុបច្បាប់ណាដែលទើបអនុម័តថ្មីៗក្នុងជំនាន់រដ្ឋបាលលោកអូបាម៉ា ពិសេសច្បាប់ការពារបរិស្ថានដែលដាក់ពិន័យចំពោះរោងចក្រសហគ្រាសដែលបញ្ចេញផ្សែងពុលច្រើន។ តែលោកដូណាល់ ត្រាំយល់ថា ច្បាប់មួយនេះបានប៉ះពាល់ដល់សេដ្ឋកិច្ចអាមេរិក។ ដោយឡែក រឿងលុបច្បាប់ « Obamacare » ហាក់ដូចពិបាកបន្តិច ព្រោះជាច្បាប់ដែលបានបោះឆ្នោតតាំងពីឆ្នាំ ២០១០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ