រដ្ឋមន្ត្រីការពារជាតិអាមេរិកទៅតួកគី ក្នុងពេលមានទំនាក់ទំនងរវាងគ្នាស្មុគស្មាញ
ចុះផ្សាយនៅថ្ងៃ៖
ស្តាប់ - ០៦:៤៧
រដ្ឋមន្ត្រីក្រសួងការពារជាតិអាមេរិក លោក អាស្តុន ការទ័រ Ashton Carter បានអញ្ជើញមកបំពេញទស្សនកិច្ចនៅក្រុងអង់ការ៉ា ប្រទេសតួកគី នាព្រឹកថ្ងៃសុក្រនេះ ក្នុងពេលដែលទំនាក់ទំនងរវាងសម្ព័ន្ធមិត្តទាំងពីរអាមេរិក-តួកគីធ្លាក់ក្នុងសភាពស្មុគស្មាញ។ ជាទស្សនកិច្ចខ្លី រយៈពេលតែប៉ុន្មានម៉ោងប៉ុណ្ណោះ ប៉ុន្តែលោកត្រូវជួបប្រជុំជាមួយថ្នាក់ដឹកនាំតួកគីសំខាន់ៗជាច្រើនរូប មុននឹងបន្តដំណើរមកអឺរ៉ុប។ ទស្សនកិច្ចនេះប្រព្រឹត្តទៅក្នុងបរិបទតំបន់ដ៏តានតឹងមួយទៀត គឺការបើកប្រតិបត្តិការកម្ចាត់ពួកអង្គការរដ្ឋអ៊ីស្លាមនៅក្រុងមូស៊ូលប្រទេសអ៊ីរ៉ាក់។
លោក ការទ័រ មកបំពេញទស្សនកិច្ចនៅប្រទេសតួកគី តែពីរបីម៉ោងប៉ុណ្ណោះ ដោយបានជួបពិភាក្សាជាមួយសមភាគីតួកគី លោក ហ្វីគ្រី អ៊ីស៊ីក ជាមួយលោកនាយករដ្ឋមន្ត្រី និងលោកប្រធានាធិបតីតួកគី លោក អែរដូហ្កាន។ កម្មវត្ថុចំបងនៃទស្សនកិច្ចគឺ ផ្តោតទៅលើបញ្ហាសន្តិសុខតំបន់ ជាពិសេសជុំវិញវិបត្តិនៅស៊ីរីនិងអ៊ីរ៉ាក់។
ប្រមុខដឹកនាំមន្ទីរបញ្ចកោណអាមេរិក ត្រូវការជួបថ្នាក់ដឹកនាំសំខាន់ៗរបស់តួកគី ដើម្បីជជែកអំពីផែនការថ្ងៃមុខ សម្រុកកម្ចាត់ពួកអង្គការរដ្ឋអ៊ីស្លាមនៅក្រុងរ៉ាខា ប្រទេសស៊ីរី ដែលតួកគីនៅមិនទាន់ព្រមព្រៀង ព្រោះមិនឱ្យយុទ្ធជននៃកងកម្លាំងប្រដាប់អាវុធគួដឌីស្ថានប្រចាំតំបន់ស្វយ័តភាគខាងជើងស៊ីរី ចូលធ្វើប្រតិបត្តិការជាមួយសម្ព័ន្ធមិត្តអន្តរជាតិទេ។
ទាក់ទងនឹងប្រតិបត្តិការនៅក្រុងមូស៊ូល។ អាមេរិកដែលចង់រក្សាជំហរអព្យាក្រិត្យឱ្យអ៊ីរ៉ាក់និងតួកគី ចង់ដាស់តឿនរំលឹកតួកគី ឱ្យស្គាល់ពាក្យថា “គោរពបូរណភាពដែនដី» ដែលជាគោលការណ៍គ្រឹះដ៏សំខាន់ និងដែលគ្មានសមាជិកសម្ព័ន្ធអន្តរជាតិណាអាចរំលោភបានឡើយ។
តួកគីដែល មានបន្ទាត់នយោបាយរបស់ខ្លួនច្បាស់លាស់ ប្រឆាំងនឹងពួកអង្គការរដ្ឋអ៊ីស្លាមផង និងត្រូវដោះស្រាយវិបត្តិគួដឌីស្ថានដែលនៅក្នុងនិងក្រៅរបងផង រហូតដល់ពេលខ្លះត្រូវបានគេមើលឃើញជាអ្នកផ្សំគំនិតជាមួយពួកជីហាត ពេលខ្លះជាសត្រូវ ជំនះយ៉ាងដាច់ខាត ថាត្រូវតែមានចំណែកក្នុងយុទ្ធនាការប្រឆាំងនឹងពួកអង្គការរដ្ឋអ៊ីស្លាម និងចូលលុកក្នុងនៅក្រុងមូស៊ូលដែរ បើទោះបីជាតាមគោលការណ៍គេអនុញ្ញាតឱ្យទាហាននិងប៉ូលិសអ៊ីរ៉ាក់ចូលក៏ដោយ។ ព្រោះតួកគីយល់ថាជាសិទ្ធិត្រឹមត្រូវ និងមានសិទ្ធិជាប្រវត្តិសាស្ត្រលើក្រុងមូស៊ូលនេះ។
អ៊ីរាក់ សុំជំនួយទ័ពពីតួកគី ?
តួកគីមានមូលដ្ឋានទ័ពមួយ នៅភាគខាងជើងអ៊ីរ៉ាក់នៅចម្ងាយប្រមាណជា ១០-២០គីឡូម៉ែត្រពីក្រុងមូស៊ូល តាំងពីឆ្នាំ២០១២មក ហើយក្នុងរយៈពេលជាងមួយឆ្នាំចុងក្រោយនេះ តួកគីបានពង្រឹងកម្លាំងយោធា ទៅបំពាក់បំប៉នយុទ្ធជនអ៊ីរ៉ាក់និកាយស៊ុននីត សម្រាប់ប្រយុទ្ធប្រឆាំងនឹងពួកជីហាតរដ្ឋអ៊ីស្លាម។
បើតាមលោកអែរដូហ្កាន ប្រធានាធិបតីតួកគី គឺរដ្ឋាភិបាលក្រុងបាកដាត ជាអ្នកធ្វើសំណើជាផ្លូវការសុំកម្លាំងជំនួយ ដើម្បីប្រយុទ្ធប្រឆាំងនឹងពួកជីហាត កាលពីឆ្នាំ២០១៤។ ហើយកិច្ចព្រមព្រៀងបែបនេះ ក៏ធ្លាប់មានតាំងពីឆ្នាំ១៩៩០មកដែរ។ ប៉ុន្តែពេលខ្លះ តួកគីបាននិយាយថាវត្តមានទ័ពនេះ ជាសំណើរបស់អភិបាលតំបន់ភាគខាងជើងអ៊ីរ៉ាក់ទៅវិញ ម្តងថាជាសំណើរបស់អាជ្ញាធរសហព័ន្ធ។ ដូច្នេះមិនថាមួយណាពិតទេ !
សម្រាប់តួកគី រដ្ឋាភិបាលអ៊ីរ៉ាក់មានកង្វះខាតច្រើន ដូច្នេះទើបតួកគីដែលមានព្រំដែនជាប់ស៊ីរី និងអ៊ីរ៉ាក់ ដល់ទៅ១ពាន់គីឡូម៉ែត្រ ត្រូវតែមានភារៈចេះរក្សាថែតំបន់ព្រំដែននេះ។ លោក អែរដូហ្កាន ចង់ធានារ៉ាប់រងឱ្យច្បាប់ថានឹងភ្នែកថាគ្មានកម្លាំងគួដឌីស្ថាននិងកងកម្លាំងឈីអ៊ីតរបស់យោធាអ៊ីរ៉ង់ ព្រមទាំងកងយុទ្ធជនឈីអ៊ីតអ៊ីរ៉ាក់ ដណ្តើមកាន់កាប់ក្រុងមូស៊ូល នៅកៀកបង្កើយនឹងព្រំដែនខ្លួន ក្រោយពួកជីហាតរដ្ឋអ៊ីស្លាមបែកខ្ចាត់ខ្ចាយទៅ។
អ្វីដែលប្រាកដនោះគឺក្រុងមូស៊ូល ជាតំបន់យុទ្ធសាស្ត្រ ដែលគ្រប់ភាគីចង់បានចំណែកគ្រប់គ្រង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ