ភេរវកម្ម ១១ កញ្ញា ២០០១៖ចាប់ពីពេលនេះទៅ ជនរងគ្រោះអាចដាក់ពាក្យប្តឹងប្រទេសអារ៉ាប៊ីសាអូឌីត
ចុះផ្សាយនៅថ្ងៃ៖
ស្តាប់ - ០៧:៥៤
នៅសហរដ្ឋអាមេរិក សភាបានបោះឆ្នោតនាថ្ងៃពុធ ទី២៨ កញ្ញាដោយច្រានចោលសិទ្ធិវ៉េតូរបស់លោកប្រធានាធិបតីអូបាម៉ាលើច្បាប់ដ៏ចម្រូងចម្រាសទាក់ទងនឹងមហាភេរវកម្មថ្ងៃទី១១ កញ្ញា ២០០១។ គឺជាច្បាប់ដែលបានបើកផ្លូវឲ្យក្រុមគ្រួសារជនរងគ្រោះអាចប្រទេសអារ៉ាប៊ីសាអូឌីត។ សូមជម្រាបជូនថា លោកអូបាម៉ាបានប្រើសិទ្ធិវ៉េតូប្រឆាំងនឹងច្បាប់នេះកាលពីថ្ងៃសុក្រ ទី២៤ កញ្ញាកន្លងទៅដោយលោកយល់ថា ជាច្បាប់ដែលនឹងបង្កឲ្យមានផលវិបាកធ្ងន់ធ្ងរដល់សន្តិសុខជាតិ ពិសេសពលរដ្ឋអាមេរិកាំងទូទៅ។ តែសម្រាប់អ្នកការពារច្បាប់នេះវិញយល់ថា ជាច្បាប់ដើម្បីស្វែងរកយុត្តិធម៌ជូនជនរងគ្រោះ។
តាំងពីលោកអូបាម៉ាកាន់តំណែងប្រធានាធិបតីអាមេរិករយៈពេល ៨ឆ្នាំមក នេះជាលើកទី១ ដែលសិទ្ធិវ៉េតូរបស់លោកត្រូវបានសភាបោះឆ្នោតច្រានចោល។ ក្នុងរយៈពេល ៨ឆ្នាំនៃការកាន់អំណាច លោកអូបាម៉ាបានប្រើសិទ្ធិវ៉េតូចំនួន ១២ដង តែលើកទី១២ នេះត្រូវបានសភាទាត់ចោល។ នៅអាមេរិក លោកប្រធានាធិបតីមានសិទ្ធិប្រើវ៉េតូប្រឆាំងនឹងច្បាប់ដែលសភាបានបោះឆ្នោត។ តែនៅក្រោយការប្រើសិទ្ធិវ៉េតូរបស់ប្រធានាធិបតី ច្បាប់ដដែលនោះនឹងវិលត្រឡប់ទៅកាន់សភាជាថ្មី។ នៅលើកនេះ សភាអាចបោះឆ្នោតច្រានចោលសិទ្ធិវ៉េតូរបស់ប្រធានាធិបតី តែត្រូវរកសម្លេងគាំទ្រឲ្យបាន ២ភាគ៣។
បន្ទាប់ពីសភាច្រានចោលសិទ្ធិវ៉េតូរបស់ប្រធានាធិបតីហើយ អ្វីៗនឹងត្រូវចប់ត្រឹមនេះ មានន័យថា ច្បាប់នោះត្រូវចូលជាធរមាន។ នេះហើយជាអ្វីដែលកំពុងកើតមានឡើងលើច្បាប់ដែលបើកផ្លូវឲ្យជនរងគ្រោះក្នុងមហាភេរវកម្មថ្ងៃ១១ កញ្ញា ២០០១ អាចប្តឹងប្រទេសអារ៉ាប៊ីសាអូឌីត។ គួររម្លឹកជូនថា ច្បាប់នេះត្រូវបានសភាបោះឆ្នោតគាំទ្រកាលពីខែឧសភា តែត្រូវបានលោកអូបាម៉ាបានប្រើសិទ្ធិវ៉េតូប្រឆាំងកាលពីថ្ងៃទី២៤ កញ្ញា និងទីបំផុតថ្ងៃទី២៨ កញ្ញា សភាបានបោះឆ្នោតច្រានចោលសិទ្ធិវ៉េតូរបស់លោកអូបាម៉ា។
លោកអូបាម៉ា៖ការបោះឆ្នោតនៅសភាមានលក្ខណៈនយោបាយ
នៅលើកញ្ចក់ទូរទស្សន៍ CNN លោកអូបាម៉ាបានបរិហារលើការបោះឆ្នោតរបស់សភាថា មានលក្ខណៈនយោបាយ និងជាកំហុសឆ្គងមួយធំណាស់។ លោកអូបាម៉ាចង់និយាយសំដៅលើការកេងចំណេញខាងនយោបាយរបស់ក្រុមសមាជិកសភា និងក្រុមសមាជិកព្រឹទ្ធសភាមួយចំនួននាការបោះឆ្នោតប្រធានាធិបតីខាងមុខ។ លោកអូបាម៉ាបានយល់ឃើញថា ច្បាប់មួយនេះមិនបានជួយការពារពលរដ្ឋអាមេរិកប្រឈមនឹងការវាយប្រហារភេរវកម្ម ហើយក៏មិនបានជួយបង្កើនប្រសិទ្ធិភាពនៃប្រព័ន្ធការពាររបស់អាមេរិកក្នុងការឆ្លើយតបនឹងការវាយប្រហារភេរវកម្មដែរ។
សម្រាប់លោកអូបាម៉ា ច្បាប់នេះនឹងធ្វើឲ្យចុះខ្សោយនូវគោលការណ៍អភ័យឯកសិទ្ធិដែលការពាររដ្ឋ និងពលរដ្ឋអាមេរិកាំង មានន័យថា អាមេរិក និងមន្រ្តីការទូតអាមេរិកនៅបរទេសក៏អាចប្រឈមនឹងការប្តឹងរបស់បណ្តាប្រទេសផ្សេងនៅទូទាំងពិភពលោក។ ក្រៅពីលោកអូបាម៉ា ក៏មានប្រតិកម្មរបស់នាយក CIA លោក John Brennan ដែលយល់ឃើញថា ច្បាប់នេះនឹងធ្វើឲ្យប៉ះពាល់ធ្ងន់ធ្ងរដល់សន្តិសុខជាតិ និងបង្កឲ្យមានផលវិបាកចំពោះមន្រ្តីរដ្ឋាភិបាលអាមេរិកនៅឯបរទេស។
តែសម្រាប់អ្នកការពារច្បាប់វិញ រួមទាំងបេក្ខជនប្រធានាធិបតីមកពីគណបក្សសាធារណរដ្ឋលោកដូណាល់ ត្រាំផងមិនបានយល់ឃើញដូចលោកអូបាម៉ាទេ។ សម្រាប់ពួកគេ ច្បាប់នេះនឹងអនុញ្ញាតឲ្យក្រុមគ្រួសារជនរងគ្រោះក្នុងភេរវកម្មថ្ងៃ១១ កញ្ញា ២០០១ ទទួលបានយុត្តិធម៌។ ទន្ទឹមគ្នានេះ ពួកគេក៏បានចាត់ទុកការប្រើសិទ្ធិវ៉េតូរបស់លោកអូបាម៉ាថាជាការប្រមាថលើក្រុមគ្រួសារជនរងគ្រោះ ពិសេសអ្នកស្លាប់ទាំងជិត ៣ ០០០នាក់។
ប្រភព និងខ្លឹមសារនៃច្បាប់ដ៏ប្រទាញប្រទង់រវាងលោកអូបាម៉ា និងសភា
នៅប៉ុន្មានថ្ងៃក្រោយមហាភេរវកម្ម ១១ កញ្ញា ២០០១ សភាអាមេរិកបានបង្កើតឲ្យមានគណៈកម្មការស៊ើបអង្កេតមួយដើម្បីស្វែងរកអ្នកទទួលខុសត្រូវក្នុងទឹកដីអាមេរិកាំង និងនិងនៅបរទេសដែលជាប់ពាក់ព័ន្ធដោយផ្ទាល់ ឬដោយប្រយោលនៅក្នុងអំពើភេរវកម្មនោះ។ នៅក្នុងខែកក្កដាឆ្នាំ ២០០៤ គណៈកម្មការស៊ើបអង្កេតបានផ្សព្វផ្សាយជាសាធារណៈនូវរបាយការណ៍មួយដែលមានកម្រាស់ ៨៣៨ទំព័រដោយបានបញ្ជាក់ច្បាស់ៗថា ភេរវកម្មថ្ងៃ១១ កញ្ញា ២០០១ ជាស្នាដៃរបស់អង្គការភេរវនិយមអាល់កៃដាមានមេកើយឈ្មោះអ៊ូសាម៉ា បិនឡាដិនជ្រកកោណក្នុងទឹកដីអាហ្វហ្កានីស្ថាន។
នៅពេលនោះ គណៈកម្មការស៊ើបអង្កេតក៏បានដកការចោទប្រកាន់ចេញពីអ៊ីរ៉ាក់ និងពីអ៊ីរ៉ង់វិញ។ ទាក់ទងនឹងប្រទេសអារ៉ាប៊ីសាអូឌីត គណៈកម្មការស៊ើបអង្កេតក៏បានអះអាងថា គ្មានភស្តុតាងណាមួយដែលបញ្ជាក់ពីការទទួលខុសត្រូវរបស់រដ្ឋាភិបាល ឬមេដឹកនាំជាន់ខ្ពស់អារ៉ាប៊ីសាអូឌីតនៅក្នុងមហាភេរវកម្មថ្ងៃ១១ កញ្ញា ២០០១ ទេ។ តែក្រុមអ្នកតំណាងរាស្រ្ត និងសមាជិកព្រឹទ្ធសភាអាមេរិកភាគច្រើននៅបន្តសង្ស័យដោយគេសំអាងថា តិច ឬច្រើន ដោយផ្ទាល់ ឬដោយប្រយោល អារ៉ាប៊ីសាអូឌីតពិតជាមានជាប់ពាក់ព័ន្ធ។
ការហ៊ានអះអាងយ៉ាងដូចនេះដោយគេសំអាងលើហេតុផលចំនួន ២ ទី១ នៅក្នុងចំណោមភេរវជនអត្តឃាតទំាង ១៩នាក់ដែលបានបើកយន្តហោះទៅទម្លាក់ខ្លួនកម្ទេចនៅក្នុងទីក្រុងវ៉ាស៊ីនតោន និងទៅបុកអាគារពាណិជ្ជកម្មពិភពលោក « World Trade Center » ទាំងពីរក្នុងទីក្រុងញូយ៉ក មាន ១៥នាក់ជាជនជាតិអារ៉ាប៊ីសាអូឌីត ទី២ ជនជាតិបារាំងម្នាក់ឈ្មោះ Zacarias Moussaoui ដែលតុលាការអាមរិកកាន់ទោសពីបទជាប់ពាក់ព័ន្ធនឹងភេរវកម្ម ១១ កញ្ញាបាននិយាយប្រាប់ក្រុមមេធាវីអាមេរិកក្នុងខែកុម្ភៈកន្លងទៅថា ក្រុមគ្រួសាររាជវង្សអារ៉ាប៊ីសាអូឌីតបានផ្តល់លុយរាប់សិបលានដុល្លារឲ្យអង្គការភេរវនិយមអាល់កៃដាក្នុងទសវត្សឆ្នាំ ៩០។
ច្បាប់ដែលធ្វើឲ្យទំនាក់ទំនងរវាងវ៉ាស៊ីនតោន និងរីយ៉ាដកាន់តែស្មុគស្មាញ
ចាប់ពីពេលនេះតទៅ ជនរងគ្រោះក្នុងភេរវកម្មថ្ងៃ១១ កញ្ញាអាចដាក់ពាក្យប្តឹងអារ៉ាប៊ីសាអូឌីត។ ខណៈនេះ រដ្ឋអំណាចអារ៉ាប៊ីសាអូឌីតនៅមិនទាន់បានបញ្ចេញប្រតិកម្មអ្វីតបនឹងអាមេរិកទេ តែបើតាមមើលទៅ ទីក្រុងរីយ៉ាដក៏នឹងមិនបន្តបិទមាត់យូរដែរ។ ចំណែករដ្ឋបាលអាមេរិករបស់លោកអូបាម៉ាក៏បានដឹងច្បាស់ណាស់ចំពោះបញ្ហានេះ ពិសេសពីទំនាក់ទំនងល្អក់កករកាន់តែខ្លាំងនាពេលខាងមុខ។ កន្លងមក អារ៉ាប៊ីសាអូឌីតធ្លាប់បានបានព្រមានលក់មូលប័ត្របំណុលរដ្ឋទាំងអស់របស់ខ្លួននៅអាមេរិកដែលគិតជាប្រាក់សរុបប្រមាណជា ៧៥០ ០០០លានដុល្លារ ព្រមទំាំងអចលនទ្រព្យផ្សេងទៀតរបស់អារ៉ាប៊ីសាអូឌីតនៅលើទឹកដីអាមេរិកាំង។
ឃើញថា ច្បាប់មួយនេះកំពុងចូលទៅបំពុលទំនាក់ទំនងវ៉ាស៊ីនតោន និងរីយ៉ាដអូឌីតដែលកំពុងតានតឹងស្រាប់ឲ្យកាន់តែឡើងកម្តៅមួយកម្រិតទៀត។ ក្រៅពីច្បាប់មួយនេះ នៅមានរឿងច្រើនទៀតដែលអារ៉ាប៊ីសាអូឌីតតូចចិត្ត និងមិនសូវទុកចិត្តសម្ព័ន្ធមិត្តអាមេរិក ពិសេសរឿងដែលអាមេរិកបានទៅល្អូកល្អឺនជាមួយអ៊ីរ៉ង់ដែលជាសត្រូវស៊ីសាច់ហុតឈាមរបស់ខ្លួននៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ