មហាសន្និបាតអ.ស.បផ្តោតខ្លាំងលើសំណុំរឿងអាវុធគីមីស៊ីរី និងកម្មវិធីនុយក្លេអ៊ែរអ៊ីរ៉ង់
ចុះផ្សាយនៅថ្ងៃ៖
ស្តាប់ - ០៨:០១
មហាសន្និបាតប្រចាំឆ្នាំរបស់អង្គការសហប្រជាជាតិ បើកសម្ពោធ នៅថ្ងៃអង្គារនេះ នៅទីក្រុងញូវយ៉ក។ ដូចយើងបានដឹងហើយថា ក្នុងរបៀបវារៈនៃកិច្ចប្រជុំដែលនឹងដំណើរការរហូតដល់ថ្ងៃទី ១ តុលា មហាសន្និបាតរបស់អង្គការសហប្រជាជាតិនឹងផ្តោត ពិភាក្សាលើសំណុំរឿងធំៗ ដូចជាការបំផ្លាញអាវុធគីមី របស់រដ្ឋាភិបាលស៊ីរី អាវុធនុយក្លេអ៊ែរបស់អ៊ីរ៉ង់ និងសង្រ្គាមនៅអាហ្រ្វិក។
នៅថ្ងៃបើកដំបូង មហាសន្និបាតនឹងផ្តោតលើយន្តការដើម្បីសន្តិភាពនៅស៊ីរីផង និងលើការបំផ្លាញអាវុធគីមីរបស់ស៊ីរីផង។ ការប្រើអាវុធគីមី នៅស៊ីរី កំពុងក្លាយជាប្រធានបទនាំមុខគេ ដោយសារតែអង្គការសហប្រជាជាតិបានរកឃើញថា ពិតជាមានការប្រើអាវុធគីមីសម្លាប់មនុស្សរាប់រយ នាក់ នៅក្នុងប្រទេសស៊ីរី។ នៅក្នុងមហាសន្និបាតថ្ងៃនេះ លោកប្រធានាធិបតីអាមេរិក បារ៉ាក់ អូបាម៉ា និងប្រធានាធិបតី បារាំង ហូឡង់ ដែលជាអ្នកព្រមានប្រើយន្តការយោធា ប្រឆាំងរដ្ឋាភិបាលស៊ីរី ត្រូវឡើងថ្លែងការណ៍ពីជំហររបស់ប្រទេសទាំងពីរ ទៅលើវិបត្តិស៊ីរី។
អ្វីដែលសំខាន់ និងដែលគេទន្ទឹងរង់ចាំ គឺការប្រជុំរបស់ក្រុមប្រឹក្សាសន្តិសុខ អ.ស.ប ដែលនឹងធ្វើនៅក្រៅក្របខ័ណ្ឌមហាសន្និបាត និងដែលតាមពិត ជាអ្នកសម្រេចលើជោគវាសនាស៊ីរី។
តាមលោករដ្ឋមន្រ្តីការបរទេសរបស់ប្រទេសបារាំង ដែលជាសមាជិកអចិន្ត្រៃយ៍មួយរបស់ក្រុមប្រឹក្សាសន្តិសុខ គេនឹងធ្វើឲ្យចេញសេចក្តីសម្រេចមួយ ទាក់ទងនឹងការបំផ្លាញអាវុធគីមីរបស់ស៊ីរី ពោលគឺគេនឹងពិភាក្សា ហើយ និងអាចបោះឆ្នោតអនុម័តលើកិច្ចព្រមព្រៀង ដែលរុស្ស៊ី និងអាមេរិកបានរកឃើញរួមគ្នា នៅទីក្រុងហ្សឺណែវ កាលពីពាក់កណ្តាលខែកញ្ញានេះ។
ប៉ុន្តែ សេចក្តីសម្រេចរបស់ក្រុមប្រឹក្សាសន្តិសុខមិនងាយនឹងអាចចេញស្រួល ក្នុងសប្តាហ៍នេះ ដូចតាមការអះអាងរបស់រដ្ឋមន្រ្តីបរទេសបារាំង ព្រោះថា រុស្ស៊ី ដែលជាសម្ព័ន្ធមិត្តរបស់ស៊ីរី នៅតែប្រឆាំង មិនចង់ឲ្យគេប្រើកម្លាំងយោធា នៅករណីដែលរដ្ឋាភិបាលស៊ីរីមិនគោរពកិច្ចព្រមព្រៀងបំផ្លាញអាវុធគីមី។ មួយវិញទៀត នៅក្រោយពេល ដែលរដ្ឋាភិបាលទីក្រុងដាម៉ាសបញ្ជូនបញ្ជីរាយមុខអាវុធគីមីទៅឲ្យអង្គការត្រួតពិនិត្យ អាវុធនុយក្លេអ៊ែរ រុស្ស៊ីទើបចេញមុខជំទាស់ មិនយល់ស្របពីមធ្យោបាយបំផ្លាញអាវុធគីមីស៊ីរី។ បើសិនជារុស្ស៊ី ដែលជាអ្នកមានសិទ្ធិវេតូជាមួយចិន នៅតែប្រឆាំង នោះ គេសង្ឃឹមតិចតួចណាស់ថា វិបត្តិស៊ីរី នឹងអាចគេដោះស្រាយចេញរួច នៅក្នុងមហាសន្និបាតលើកនេះ។
កម្មវិធីនុយក្លេអ៊ែរអ៊ីរ៉ង់ ជាផ្ទាំងស៊ីបមួយទៀត នៅក្នុងមហាសន្និបាត
នៅមុនមហាសន្និបាតចាប់ផ្តើម ទីក្រុងតេអេរ៉ង់ ក្រោមការដឹកនាំរបស់ប្រធានាធិបតីថ្មី ខិតខំប្រឹងប្រែង សម្រុកនយោបាយការទូត ដើម្បីបញ្ចុះបញ្ចូលសហគមន៍អន្តរជាតិ។ លោកប្រធានាធិបតី អ៊ីរ៉ង់ ហាសាន រូហានី ដែលត្រូវគេមើលឃើញថា ជាអ្នកដឹកនាំមិនសូវអភិរក្សដូចប្រធានាធិបតីមុន បានប្រកាសហើយថា អ៊ីរ៉ង់ត្រៀមខ្លួនដើម្បីចរចាស្តីពីកម្មវិធីនុយក្លេអ៊ែររបស់អ៊ីរ៉ង់។ លោកហាសាន រូហានី ដែលនៅតែបដិសេធពីការលួចផលិតអាវុធនុយក្លេអ៊ែរ និយាយការពារសិទ្ធិរបស់អ៊ីរ៉ង់ ក្នុងការប្រើប្រាស់នុយក្លេអ៊ែរស៊ីវិល។
ដោយសារតែនយោបាយបើកផ្លូវរបស់អ៊ីរ៉ង់ រដ្ឋមន្រ្តីការបរទេសរបស់ក្រុមប្រទេសដើម្បីកិច្ចចរចា៥ ភាគីបូក ១ នឹងជួបប្រជុំគ្នា នៅក្រៅក្របខណ្ឌមហាសន្និបាត ដើម្បីពិភាក្សា ស្តីពីកម្មវិធីនុយក្លេអ៊ែររបស់អ៊ីរ៉ង់។ ចាប់តាំងពីដាក់ទណ្ឌកម្មលើអ៊ីរ៉ង់ តាំងពីឆ្នាំ ១៩៧៩ នេះជាលើកទីមួយ ដែលរដ្ឋមន្រ្តីការបរទេសអាមេរិក បានចូលរួមក្នុងតុចរចាស្តីពីនុយក្លេអ៊ែរអ៊ីរ៉ង់ ព្រោះ កន្លងមក គ្រាន់តែអ្នកតំណាងតែប៉ុណ្ណោះដែលចូលតុចរចា ក្នុងក្របខណ្ឌរបស់ទីភ្នាក់ងារ ថាមពលនុយក្លេអ៊ែរ AIEA។
តាមគម្រោង ក្រៅតែពីកិច្ចប្រជុំរបស់រដ្ឋមន្រ្តីរបស់ក្រុមប្រទេសទាំងប្រាំបូកមួយ លោកប្រធានាធិបតីអ៊ីរ៉ង់ នឹងត្រូវជួប លោកប្រធានាធិបតីបារាំង នៅក្រោយមហាសន្និបាត។ ហើយ នៅប៉ុន្មានថ្ងៃចុងក្រោយនេះទៀត ក៏ មានពាក្យលេចលឺថា លោកប្រធានាធិបតីអាមេរិក បារ៉ាក់ អូបាម៉ា ក៏នឹងអាចជួបជាមួយប្រធានាធិបតីអ៊ីរ៉ង់ ដែរ នៅក្រៅក្របខណ្ឌមហាសន្និបាតអ.ស.ប។
លោកអូបាម៉ាអាចជួបលោកប្រធានាធិបតីអ៊ីរ៉ង់
នៅថ្ងៃនេះ ប្រធានាធិបតីអាមេរិក និងអ៊ីរ៉ង់ នឹងអាចឃើញគ្នា ដោយសារលោកអូបាម៉ានឹងត្រូវឡើងសុន្ទរកថា មុនលោកប្រធានាធិបតី អ៊ីរ៉ង់ តែប៉ុន្មានម៉ោងប៉ុណ្ណោះ។ បើតាមអ្នកវិភាគខ្លះ ជំនួបរវាងលោកអូបាម៉ា និងលោករ៉ូហានី ឬយ៉ាងហោចចាប់ដៃគ្នា នឹងអាចកើតឡើង នៅក្នុងពិធីទទួលភោជនាហារដែលលោកអគ្គលេខាធិការបាន គីមូនជាម្ចាស់រៀបចំ នៅយប់ថ្ងៃអង្គារនេះ។
ជំនួបរវាងប្រមុខដឹកនាំទាំងពីរសំខាន់ នេះ បើសិនជាអាចមានមែន ព្រោះថា ជាលើកទីមួយ ចាប់តាំងពីអាមេរិកបានកាត់ផ្តាច់ទំនាក់ទំនងការទូតជាមួយអ៊ីរ៉ង់ បន្ទាប់ពីអ៊ីរ៉ង់ផ្លាស់ប្តូររបបដឹកនាំ ក្រោយបដិវត្តន៍សាសនា ឆ្នាំ ១៩៧៩។ គឺឆ្នាំនោះឯង ដែលក្រុមនិស្សិតអ៊ីរ៉ង់បានចូលលុកលុយស្ថានទូតអាមេរិក និងចាប់ប្រជាជនអាមេរិក ធ្វើជាចំណាប់ខ្មាំង ដែលធ្វើឲ្យអាមេរិក ខឹង កាត់ទូត និងដាក់ទណ្ឌកម្មជាឯកត្តោភាគី។ ចាប់តាំងពីពេលនោះ អាមេរិក និងសហគមន៍អន្តរជាតិដែលមានការសង្ស័យថា អ៊ីរ៉ង់កំពុងពួនសំងំផលិតគ្រាប់បែបបរិមាណូ បានដាក់ទណ្ឌកម្មសេដ្ឋកិច្ច ជាពិសេស ការហាមមិនឲ្យទិញប្រេង ពីអ៊ីរ៉ង់ ហាមមិនឲ្យដឹកអាវុធទៅអ៊ីរ៉ង់ ហើយដែលសំខាន់ជាងគេ គឺផ្អឹបទុកទ្រព្យសម្បត្តិរបស់ក្រុមហ៊ុន ឬមន្រ្តីជាន់ខ្ពស់របស់អ៊ីរ៉ង់។ ទណ្ឌកម្មសេដ្ឋកិច្ចពីអាមេរិក និងអឺរ៉ុប បានធ្វើឲ្យសេដ្ឋកិច្ចរបស់អ៊ីរ៉ង់ ជួបវិបត្តិកាន់តែធ្ងន់ធ្ងរ ក្នុងរយៈពេលប៉ុន្មានទសវត្សរ៍ចុងក្រោយនេះ
មកដល់សព្វថ្ងៃនេះ ទំនាក់ទំនងរវាងអាមេរិក និងអ៊ីរ៉ង់ត្រូវបានធ្វើឡើងនៅក្នុងក្របខ័ណ្ឌនៃកិច្ចប្រជុំ ៥ភាគី បូក១ស្តីពីកម្មវិធីនុយក្លេអ៊ែរអ៊ីរ៉ង់។ ប៉ុន្តែ លោករូហានី ដែលមាននយោបាយទន់ភ្លន់ជាង ប្រធានាធិបតីមុន បានបោះដៃ ចង់ចរចាជាមួយអាមេរិក។ លោកបានសរសេរសំបុត្រមួយទៅលោកអូបាម៉ា។ លោកអូបាម៉ាវិញទទួលស្គាល់ថា លោកបានទាក់ទងជាមួយលោករូហានីតាមរយៈសំបុត្រ ដែលនៅក្នុងនោះ លោកបានទាមទារឲ្យអ៊ីរ៉ង់បញ្ចេញសកម្មភាពជាក់ស្តែង ដើម្បីបញ្ជាក់ថា អ៊ីរ៉ង់គ្មានមហិច្ឆតាលួចផលិតអាវុធនុយក្លេអ៊ែរ។
ជំនួប ជាមួយប្រធានាធិបតីអាមេរិក និងអាចបញ្ចុះបញ្ចូលឲ្យអាមេរិកជឿជាក់ គឺជារឿងចាំបាច់សម្រាប់ប្រធានាធិបតីអ៊ីរ៉ង់ ព្រោះថា ចង់ ឬមិនចង់ គឺទណ្ឌកម្មសេដ្ឋកិច្ចរបស់អាមេរិក ដែលកំពុងច្របាច់កសេដ្ឋកិច្ចរបស់អ៊ីរ៉ង់បច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ