លោកដូណាល់ ត្រាំ ប្តឹងឧទ្ធរណ៍ ប្រឆាំងសាលដីកាដែលសម្រេចព្យួរក្រឹត្យច្បាប់ស្តីពីជនអន្តោប្រវេសន៍អ៊ីស្លាម
ចុះផ្សាយនៅថ្ងៃ៖
ស្តាប់ - ០៦:៤៤
មួយថ្ងៃ ក្រោយពេលដែលលោកចៅក្រម នៃតុលាការសហព័ន្ធក្រុងSeattle រដ្ឋWashington បានចេញដីកាព្យួរការអនុវត្តក្រឹត្យប្រធានាធិបតី ស្តីពីការហាមឃាត់មិនឲ្យប្រជាជនមកពីប្រទេសអ៊ីស្លាម៧ប្រទេស ធ្វើដំណើរចូលសហរដ្ឋអាមេរិកនោះ នៅថ្ងៃសៅរ៍ម្សិលមិញនេះ សេតវិមាន បានសម្រេចដាក់ពាក្យប្តឹងឧទ្ធរណ៍ ទល់នឹងសាលដីកានេះ។ លោកដូណាល់ ត្រាំ បានសន្យាថាលោក នឹងយកជ័យជំនះឲ្យបាន ដើម្បីហាមឃាត់មិនឲ្យពួកភេរវកម្ម ចូលទឹកដីអាមេរិក។ ដោយឡែកបាតុកម្ម ប្រឆាំងនឹងក្រឹត្យប្រធានាធិបតីនេះ ត្រូវបានរៀបចំឡើងមិនថានៅសហរដ្ឋអាមេរិកទេ សូម្បីតែនៅតាមទីក្រុងធំៗនៅអឺរ៉ុប ក៏មានមនុស្សរាប់ពាន់នាក់ ចូលរួមដែរ។ ក្រឹត្យច្បាប់ ដែលក្រុមបាតុករបរិហារថា មានខ្លឹមសាររើសអើង និងស្អប់ខ្ពើមអ្នកកាន់សាសនាអ៊ីស្លាម។
អំណាចតុលាការ ទល់នឹងរដ្ឋាភិបាល
អំណាចនីតិប្រតិបត្តិ និងអំណាចតុលាការកំពុងតែប្រឈមមុខដាក់គ្នាហើយ។ ហើយអ្វីៗនៅពេលនេះ គ្រាន់តែជាការចាប់ផ្តើមប៉ុណ្ណោះ។ កុំភ្លេចថាលោកដូណាល់ ត្រាំ ទើបតែចូលកាន់ដំណែងមិនទាន់បាន១ខែស្រួលបួលផង តែភាពតានតឹងនៃស្ថាប័នកំពូលទាំងពីរ របស់អាមេរិក បានចាប់ផ្តើមមានទៅហើយ។
ក្រឹត្យច្បាប់ដែលបង្កបញ្ហា និងបង្កើតជាការតវ៉ា សឹងតែគ្រប់ទីកន្លែង មិនថានៅអាមេរិក និងនៅបរទេសនោះ ត្រូវបានលោកចៅក្រមសហព័ន្ធម្នាក់ឈ្មោះ James Robart ដែលជាចៅក្រមនៃតុលាការសហព័ន្ធរដ្ឋវ៉ាស៊ីនតោន បានសម្រេចព្យួរការអនុវត្តវាបណ្តោះអាសន្ន នៅទូទាំងសហរដ្ឋអាមេរិក ដើម្បីទុកពេលវេលាជំនំជំរះ លើខ្លឹមសាររបស់វា។
ដើមដំបូងគឺ រដ្ឋមន្ត្រីក្រសួងយុត្តិធម៌នៃរដ្ឋវ៉ាស៊ីនតោន គឺលោក Bob Ferguson ដែលជាអ្នកដាក់ពាក្យប្តឹង។ ក្នុងបណ្តឹង លោកបានលើកឡើងថា ក្រឹត្យច្បាប់របស់លោកត្រាំ ដែលសំដៅហាមឃាត់មិនឲ្យប្រជាជនមកពីប្រទេសអ៊ីស្លាម៧ប្រទេស ធ្វើដំណើរចូលសហរដ្ឋអាមេរិកនោះ គឺវាមានខ្លឹមសារផ្ទុយនឹងរដ្ឋធម្មនុញ្ញ សហរដ្ឋអាមេរិក។
ប្រតិកម្មរបស់លោកប្រធានាធិបតីត្រាំ ទល់នឹងសាលដីការរបស់ចៅក្រម James Robart គឺលោកដូណាល់ត្រាំបានសរសេរតាមទំព័រTwitter ដូចសព្វមួយដង ដោយបានប្រើពាក្យ និងឃ្លាបែបវាយប្រហារចំៗ តែម្តង។ លោកត្រាំបានសរសេរថា “ម្សៀលចៅក្រមនេះមិនដឹងមកពីណាទេ មកសម្រេចបំផ្លាញការអនុវត្តច្បាប់របស់រដ្ឋាភិបាល”។ លោកត្រាំបន្តថា “វាគឺសេចក្តីសម្រេច ដ៏ល្ងីល្ងើ ហើយត្រូវតែត្រូវបានរំលាយចោលជាបន្ទាន់”។
បន្ទាប់មកទៀត លោកត្រាំសរសេរថែមទៀតថា “ចៅក្រមម្នាក់នេះ មកសម្រេចបើកចំហរទ្វារអាមេរិក ធ្វើឲ្យពួកភេរវកម្មនិងពួកមនុស្សដែលស្អប់អាមេរិក ចូលដីអាមេរិកបានដោយសេរី។ ពពួកមនុស្សអាក្រក់ទាំងអស់នេះ កំពុងសប្បាយចិត្តណាស់”។ ហើយបន្ទាប់ពីសេតវិមាន បានប្រកាសថាដាក់ពាក្យប្តឹងឧទ្ធរណ៍ នៅថ្ងៃសៅរ៍ លោកដូណាល់ ត្រាំ ក៏បានបន្ថែមមួយឃ្លាទៀត ថា “យើងនឹងឈ្នះ!”។
តាមពិតទៅតុលាការសហព័ន្ធនៃរដ្ឋវ៉ាស៊ីនតោន នៅមិនទាន់ជំនំជំរះលើខ្លឹមសារនៃក្រឹត្យច្បាប់នេះ ថាវាផ្ទុយនឹងរដ្ឋធម្មនុញ្ញ នៅឡើយទេ។ លោកចៅក្រម James Robart គ្រាន់តែព្យួរការអនុវត្តក្រឹត្យនេះ ជាបណ្តោះអាសន្នសិន ក្នុងកំឡុងពេលជំនំជំរះ។ ឥឡូវសំណុំរឿងនេះ ត្រូវបានរដ្ឋាភិបាលលោកត្រាំ ដាក់ពាក្យប្តឹងឡើងទៅឧទ្ធរណ៍ ហើយបើក្នុងករណីភាគីណាមួយនៅតែមិនសុខចិត្ត សំណុំរឿងនេះ នឹងត្រូវឡើងទៅតុលាការកំពូលនៃសហរដ្ឋអាមេរិក។
ក្រឹត្យច្បាប់ ផ្ទុយនឹងរដ្ឋធម្មនុញ្ញរឺទេ?
សំណួរដែលចោទសួរ គឺថា តើក្រឹត្យច្បាប់ ដែលដូណាល់ ត្រាំបានចុះហត្ថលេខា កាលពីថ្ងៃទី២៧មករា កន្លងទៅនេះ វាផ្ទុយនឹងរដ្ឋធម្មនុញ្ញសហរដ្ឋអាមេរិក មែនរឺក៏អត់? នេះគឺចំណោទ! យោងតាមដើមបណ្តឹង គឺក្រឹត្យច្បាប់នេះ វាផ្ទុយនឹងរដ្ឋធម្មនុញ្ញ ព្រោះវាមានខ្លឹមសាររើសអើងប្រកាន់ពូជសាសន៍ និងសាសនា។ ក្រឹត្យនេះសំដៅហាមឃាត់មិនឲ្យចូលសហរដ្ឋអាមេរិក នូវប្រជាជនមកពីប្រទេស៧ មានស៊ីរី អ៊ីរ៉ាក់ អ៊ីរ៉ង់ លីប៊ី សូម៉ាលី ស៊ូដង់ និងយេមែន ដែលសុទ្ធជាប្រទេសអ៊ីស្លាម។
ក៏ប៉ុន្តែ សម្រាប់សេតវិមាន គេបានអះអាងថា នៅក្នុងក្រឹត្យច្បាប់នេះ គេមិនមានសរសេរពាក្យ “សាសនាអ៊ីស្លាម” សូម្បីតែមួយម៉ាត់។ ការហាមឃាត់ គឺគេសំដៅទៅលើប្រទេស មិនមែនសំដៅទៅលើអ្នកកាន់សាសនាអ៊ីស្លាមទេ។ យ៉ាងណាមិញ មានចៅក្រមសហព័ន្ធនៅរដ្ឋម៉ាសាជូសេត ម្នាក់ ក៏បានសម្រេចដែរ ថាក្រឹត្យនេះ មិនមានខ្លឹមសារផ្ទុយនឹងរដ្ឋធម្មនុញ្ញទេ ព្រោះគេមិនមានសរសេរពាក្យសាសនាអ៊ីស្លាមទេ។
ក៏ប៉ុន្តែយ៉ាងណាក៏ដោយ សម្រាប់អ្នកតវ៉ា បើទោះបីជាលោកដូណាល់ ត្រាំបានជ្រើសរើសយកវិធីការពារខ្លួន ដោយមិនបានសរសេរពាក្យសាសនាអ៊ីស្លាម នៅក្នុងក្រឹត្យនេះក៏ដោយ ក៏ប៉ុន្តែ មានតែមនុស្សល្ងង់ទេទើបមិនយល់ថា ក្រឹត្យនេះសំដៅលើអ្នកកាន់សាសនាអ៊ីស្លាម។ ប្រទេសទាំង៧ ដែលជាប់បំរាម គឺសុទ្ធតែជាប្រទេសកាន់សាសនាអ៊ីស្លាម។
មួយវិញទៀត លោកត្រាំខ្លួនឯងនេះតែម្តង ដែលធ្លាប់ស្រែកក្តែងៗ ក្នុងពេលឃោសនាបោះឆ្នោត ថាចង់ហាមឃាត់កុំឲ្យអ្នកកាន់សាសនាអ៊ីស្លាម ចូលសហរដ្ឋអាមេរិក។ ហើយជាងនេះទៅទៀត ក្រោយពេលធ្វើក្រឹត្យនេះហើយ លោកត្រាំបាននិយាយថា គាត់កំពុងពិចារណា ចង់បើកឲ្យប្រជាជនដែលកាន់សាសនាគ្រិស្ត មកពីប្រទេសទាំង៧ដែលជាប់បំរាម អាចចូលអាមេរិកបាន។ អញ្ចឹងមានន័យថា ស្មារតី គោលគំនិតចំបងរបស់លោកត្រាំ គឺសំដៅហាមឃាត់អ្នកកាន់សាសនាអ៊ីស្លាមតែប៉ុណ្ណោះ។ ហើយហេតុផលទាំងនេះ អាចនឹងត្រូវបានចៅក្រមនៃតុលាការសហព័ន្ធយកទៅពិចារណា ដើម្បីជំនំជំរះលើសំណុំរឿងនេះ។
ព្រំដែនចាប់បើក ក្រុមហ៊ុនអាកាសចរណ៍ចាប់ដឹកអ្នកដំណើរតាមធម្មតាវិញ៖
តាមធម្មតា សេចក្តីសម្រេចព្យួរការអនុវត្តក្រឹត្យ របស់ចៅក្រុមសហព័ន្ធ គឺមានប្រសិទ្ធិភាពភ្លាមៗ។ អាជ្ញាធរ មន្ត្រីនគរបាលច្រកព្រំដែន ជាពិសេសតាមច្រកព្រលានយន្តហោះ និងក្រុមហ៊ុនអាកាចរណ៍តែម្តង កំពុងស្ថិតក្នុងភាពស្រពេចស្រពិល មិនដឹងត្រូវអនុវត្តតាមអ្នកណាទេ។
តែយ៉ាងណា បើតាមព័ត៌មានចុងក្រោយដែលទទួលបាន ពីអ្នកនាំពាក្យក្រសួងសន្តិសុខផ្ទៃក្នុងរបស់អាមេរិកបានបញ្ជាក់ថា អាជ្ញាធរទាំងអស់ ត្រូវផ្អាក មិនត្រូវអនុវត្តក្រឹត្យច្បាប់នេះ ក្នុងកំឡុងពេលនេះ។ ដូច្នេះមានន័យថា ចាប់តាំងពីថ្ងៃព្រឹកថ្ងៃសៅរ៍មក មន្ត្រីនគរបាលអន្តោប្រវេសន៍ បានទទួលបញ្ជា ឲ្យបើកផ្លូវ ឲ្យប្រជាជនដែលមកពីប្រទេសទាំង៧ខាងលើ អាចចូលសហរដ្ឋអាមេរិកបាន ឲ្យតែអ្នកនោះមានទិដ្ឋាការត្រឹមត្រូវ។
ចំណែកខាងក្រុមហ៊ុនអាកាសចរណ៍មួយចំនួនធំ ដូចជា Airfrance Qatar airways Lufthansa ជាដើម បានប្រកាសថា គេបានបើកទទួលដឹកអ្នកដំណើរ ដែលមកពីប្រទេសទាំង៧ខាងលើ ចូលអាមេរិកវិញហើយ។ តែស្ថានភាពនេះ ក៏ជាស្ថានភាពបណ្តោះអាសន្នដែរ ព្រោះវាអាស្រ័យទៅលើការសម្រេចរបស់ចៅក្រមនៅតុលាការឧទ្ធរណ៍សហព័ន្ធបន្តទៀត។ ដូច្នេះហើយ បានជាមានភាពជ្រួលច្របល់ ម្នាក់ៗនាំគ្នាប្រញ៉េបប្រញ៉ាប់ធ្វើដំណើរ ទាន់ពេលគេបើកទ្វារ។
តាមពិតទៅភាពស្មុគស្មាញរញ៉េរញ៉ៃ មានតាំងតែពីក្រឹត្យនេះបានដាក់ចុះឲ្យអនុវត្តភ្លាមម្លេះ។ ភាពស្រពេចស្រពិល គឺទាក់ទិននឹង អ្នកដំណើរដែលមានបណ្ណស្នាក់នៅអចិន្ត្រៃយ៍នៅសហរដ្ឋអាមេរិកស្រាប់ ព្រមទាំងមនុស្សមួយចំនួនដែលមានសញ្ជាតិពីរ។ បន្ទាប់ពីស្ទាក់ស្ទើរចុះឡើង សេតវិមាន បានសម្រេចប្តូរចិត្ត លើកលែងមិនអនុវត្តទៅលើករណី អ្នកដែលមានបណ្ណស្នាក់អចិន្ត្រៃយ៍ និងអ្នកមានសញ្ជាតិពីរទេ។
យើងសង្កេតឃើញថា ក្រុមការងាររបស់លោកត្រាំ មិនបានគិតគូរវែងឆ្ងាយ ពីបញ្ហាផ្លូវច្បាប់ រឺពីផលវិបាកឲ្យបានគ្រប់ជ្រុងជ្រោយទេ គឺធ្វើក្រឹត្យនេះឲ្យតែបានៗ តែប៉ុណ្ណោះ។ ឥឡូវពេលនេះ បញ្ហាកាន់តែរីកធំ ក្លាយជាជម្លោះផ្លូវច្បាប់ ជាមួយប្រព័ន្ធតុលាការ។ បើសិនជាលោកត្រាំ ចាញ់ក្នុងសំណុំរឿងនេះ មានន័យថា វាគឺជាបរាជ័យនិងភាពអម៉ាស លើកទីមួយរបស់លោក។ តែយ៉ាងណា លោកដូណាល់ ត្រាំត្រូវបានគេស្គាល់ថា ជាមនុស្សមិនចេះចុះចាញ់ទេ បើគេដាក់គាត់១ដៃ គាត់ដាក់គេវិញ១០ដៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ