អ៊ុយក្រែនអះអាងថាបានកំទេចក្បួនរថក្រោះរបស់រុស្ស៊ីមួយភាគធំដែលលួចចូលក្នុងដីអ៊ុយក្រែន
ចុះផ្សាយនៅថ្ងៃ៖
ស្តាប់ - ០៤:៣២
កាលពីថ្ងៃព្រហស្បតិ៍ទី១៤សីហា មានពត៌មានលេចលឺថា ក្បួនរថក្រោះរបស់រុស្ស៊ីចំនួន២៦គ្រឿង បានចូលមកក្នុងទឹកដីអ៊ុយក្រែន កាត់តាមតំបន់ដែលកាន់កាប់ដោយពួកឧទ្ទាមផ្តាច់ទឹកដី។ ភាគីអ៊ុយក្រែនបានចេញមុខមកបញ្ជាក់ភ្លាម កាលពីថ្ងៃសុក្រថា ពិតជាមានរថក្រោះរុស្ស៊ីដែលបានលួចចូលមកក្នុងដីអ៊ុយក្រែនប្រាកដមែន ប៉ុន្តែទាហានអ៊ុយក្រែនបានធ្វើការវាយបំផ្លាញរថក្រោះទាំងនោះ អស់មួយភាគធំហើយ។ ដំណឹងនេះបានបន្ថែមភាពតានតឹងមួយកម្រឹតថែមទៀត រវាងអ៊ុយក្រែននិងរុស្ស៊ី ដែលកំពុងតែប្រទាញប្រទង់គ្នា រឿងរថយន្តដឹកជំនួយមនុស្សធម៌រុស្ស៊ី។
អ្នកយកពត៌មាន បរទេស ឲ្យកាសែត The Guardian និង The Telegraph បានរាយការថា បានឃើញរថក្រោះរបស់រុស្ស៊ី២៦គ្រឿង ដោយមានរថយន្តដឹកគ្រឿងភស្តុភារបើកតាមផង បានបើកចូលទៅក្នុងទឹកដីអ៊ុយក្រែន ក្នុងតំបន់ដែលបច្ចុប្បន្នស្ថិតក្រោមការកាន់កាប់របស់ពួកឧទ្ទាមនិយមរុស្ស៊ី។ បើតាមស្មាន ពត៌មាននេះអាចជាការពិត ព្រោះថាអ៊ុយក្រែនក៍បានចេញមកបញ្ជាក់ដែរ ថាបានវាយបំផ្លាញរថក្រោះទាំងនោះ នៅយប់ថ្ងៃព្រហស្បតិ៍ឆ្លងចូលថ្ងៃសុក្រ។ លោកប្រធានាធិបតីអ៊ុយក្រែន ថែមទាំងបានទូរស័ព្ទទៅនិយាយជាមួយលោកនាយករដ្ឋមន្ត្រីអង់គ្លេសទៀតផង ទាក់ទងនឹងបញ្ហានេះ។ មួយវិញទៀត នេះមិនមែនជាលើកទីមួយទេ ដែលមានពត៌មានថារុស្ស៊ីបានបញ្ជូនកម្លាំងទ័ព និងគ្រឿងសព្វាវុធចូលទៅក្នុងទឹកដីអ៊ុយក្រែន។ កន្លងមកអ៊ុយក្រែនធ្លាប់បានចោទប្រកាន់ជាញយដង ថារុស្ស៊ីបានបញ្ជូនកម្លាំងទ័ពចូលទៅជួយពួកឧទ្ទាម។ តែនេះជាលើកទីមួយហើយ ដែលមានអ្នកកាសែតបរទេសបានឃើញ និងបានផ្តល់ពត៌មាន។
ដូចសព្វដង រុស្ស៊ីបានច្រានចោលទាំងស្រុង ចំពោះការចោទប្រកាន់នេះ។ លោករដ្ឋមន្រ្តីការពារជាតិរុស្ស៊ី បានថាការចោទប្រកាន់របស់អ៊ុយក្រែនជាការរវើរវាយទាំងស្រុង។ គ្មានរថក្រោះរុស្ស៊ីឯណាចូលទៅក្នុងទឹកដីអ៊ុយក្រែននោះទេ។ លោកស្រីហៃឌេន ប្រធានក្រុមប្រឹក្សាសន្តិសុខជាតិអាមេរិក បានថ្លែងថារុស្ស៊ីត្រួវតែបញ្ឈប់រាល់សកម្មភាពទាំងអស់ ដែលជំរុញឲ្យមានជម្លោះកាន់តែខ្លាំងទៅៗនៅអ៊ុយក្រែន។ លោកស្រីបន្តថា រុស្ស៊ីគ្មានសិទ្ធិណាមួយទៅបញ្ជូនកំលាំងទ័ពចូលក្នុងទឹកដីរបស់គេ ដោយគ្មានការអនុញ្ញាតនោះទេ មិនថាអ៊ុយក្រែន រឺប្រទេសណាមួយផ្សេងទៀតក៏ដោយ។ សូមបញ្ជាក់ថា អាមេរិក កន្លងមកក៏ធ្លាប់បានបរិហារនិងផ្តល់ភស្តុតាងបញ្ជាក់ថារុស្ស៊ីបានបញ្ជូនទ័ព និងអាវុធធំៗយ៉ាងសន្ធឹកសន្ធាប់ចូលក្នុងទឹកដីអ៊ុយក្រែនដែរ។ ចំណែកលោកនាយករដ្ឋមន្ត្រីអង់គ្លេសវិញ បានកោះហៅឯកអគ្គរដ្ឋទូតរុស្ស៊ីប្រចាំក្រុងឡុងដ៍្រ ឲ្យចូលជួបដើម្បីសាកសួរដើមទងពីបញ្ហានេះ។ សហភាពអឺរ៉ុបក៏បានកោះប្រជុំរដ្ឋមន្ត្រីការបរទេសរបស់ប្រទេសសមាជិកទាំង២៨របស់ខ្លួនផងដែរ ជុំវិញបញ្ហានេះ ហើយថាសហភាពអឺរ៉ុប នឹងគាំទ្រឲ្យមានការដាក់ទណ្ឌកម្មលើរុស្ស៊ី បើសិននេះជាការពិតមែន។
ទាក់ទិនទៅនឹងបញ្ហា រថយន្តដឹកជំនួយមនុស្សធម៌រុស្ស៊ី មកទល់ពេលនេះនៅមិនទាន់មានការព្រមព្រៀងណាមួយ ឲ្យបានច្បាស់លាស់នោះទេ ព្រោះថាភាពមន្ទិលសង្ស័យពីចេតនាអាក្រក់របស់រុស្ស៊ីនៅពីក្រោយការបញ្ជូនជំនួយមនុស្សធម៌នេះ មានកាន់តែធំទៅៗ។ រថយន្តដែលរុស្ស៊ីបញ្ជូនទៅទាំងអស់មានប្រហែលជា៣០០គ្រឿង ហើយមួយគ្រឿងៗមានផ្ទុកអ្នកបើកបរពីរនាក់។ ហើយបើតាមពត៌មានលេចលឺមក ថាអ្នកបើកបរទាំងនោះ សុទ្ធសឹងជាទាហានទាំងអស់។ ដូច្នេះមានន័យថា មានទាហានរុស្ស៊ីជិត៦០០នាក់នៅក្នុងឡានទាំងអស់នោះ។ បើតាមពត៌មានមួយទៀតថា រថយន្តទាំងនោះសុទ្ធសឹងជារថយន្តទាហាន ដែលគេបានលាបថ្នាំពណ៌សបន្លំ ហើយមានទាំងរូបថតបង្ហាញថា ឡានខ្លះគ្មានអីវ៉ាន់នៅក្នុងនោះទេ។ យោងតាមអ្នកនាំពាក្យយោធាអ៊ុយក្រែន រថយន្តទាំងនោះ ឈប់នៅចម្ងាយប្រមាណ៣០គីឡូមែត្រ ពីច្រកព្រំដែនអ៊ុយក្រែនក្បែរក្រុងដូនេតស្ក៍។ អ៊ុយក្រែនបានបញ្ជូនមន្ត្រីគយ និងឆ្មាំការពារព្រំដែនជាច្រើននាក់ ចាំត្រួតពិនិត្យរថយន្តទាំងនោះ ប៉ុន្តែនៅមិនទាន់បានធ្វើអ្វីទាំងអស់ ដោយត្រូវរងចាំឯកសារផ្លូវការរបស់កាកបាទក្រហមអន្តរជាតិ។
បើសិនជាពត៌មានអស់ទាំងនេះពិតប្រាដកមែន មូលហេតុនៅពីក្រោយទ្វើរបស់រុស្ស៊ី គ្មានអ្វីក្រៅពី ចង់លូកដៃចូលទៅជួយពួកឧទ្ទាមបះបោរនៅភាគខាងកើតអ៊ុយក្រែននោះទេ។ លោកអគ្គលេខាធិការអង្គការអូតង់បានមានប្រសាសន៍ ចោទរុស្ស៊ីដោយត្រង់ៗថា រុស្ស៊ីកំពុងតែចូលដៃជាមួយពួកឧទ្ទាម បង្កការបះបោរផ្តាច់ទឹកដីចេញពីអ៊ុយក្រែន។ ថាមិនត្រូវ ពេលដែលបានសម្រេចហើយ ទឹកដីទាំងនោះនឹងត្រូវរុស្ស៊ីចាត់បញ្ចូលក្នុងចំណុះរបស់ខ្លួន ដូចដែលរុស្ស៊ីបានធ្វើនៅតំបន់គ្រីមេអញ្ចឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ