រដ្ឋាភិបាល បានប្រគល់លិខិតឆ្លងដែនជូនលោក ថាក់ស៊ីន
រដ្ឋាភិបាលថៃ បានប្រគល់លិខិតឆ្លងដែនជូនដល់អតីតនាយករដ្ឋមន្ត្រីថៃ លោក ថាក់ស៊ីនស៊ីណាវ៉ាតវិញហើយ។ លោក ថាក់ស៊ីនដែលជាឥស្សរជនទទួលរងការប្រកែកតវ៉ា នៅក្នុងជីវិតនយោបាយនៃរាជាណាចក្រថៃ។ នេះជាការគូសបញ្ជាក់របស់ក្រសួងការបរទេសថៃនៅថ្ងៃសុក្រទី ១៦ធ្នូម្សិលមិញ។ លោកថាក់ស៊ីនដែលត្រូវពួកយោធាថៃធ្វើរដ្ឋប្រហារទម្លាក់ចេញពីតំណែងនាយករដ្ឋមន្ត្រីនៅឆ្នាំ២០០៦ បានទទួលលិខិតសំរាប់ធ្វើដំណើររបស់លោក នៅខែតុលាកន្លងផុតទៅនេះនៅស្ថានទូតថៃប្រចាំនៅទីក្រុង Abou Dhabi។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ជាលិខិតឆ្លងដែនធម្មតា គ្មានជាប់ទាក់ទងអ្វីទៅនឹងលទ្ធភាពអាចចាប់ខ្លួនគាត់បញ្ជូនមកប្រទេសវិញ ទោះជាគាត់ជាប់ពិរុទ្ធឬគ្មានទោសពៃរ៍អ្វីសោះក្តី ប៉ុន្តែការប្រគល់លិខិតឆ្លងដែននេះ គឺដោយសារលោកថាក់ស៊ីន មានសញ្ជាតិថៃប៉ុណ្ណោះ។ នេះជាការគូសបញ្ជាក់របស់អ្នកនាំពាក្យនៃក្រសួងការបរទេសថៃ លោក Thani Thongphakdi ដែលអះអាងទៀតថា “ ការចេញលិខិតឆ្លងដែនថ្មីមួយនេះ ពុំមានការជំទាស់ពីទីភ្នាក់ងារណាមួយរបស់រដ្ឋាភិបាលថៃ ឬ ក៏ ប៉ូលិសទេ។
គួររំលឹកថា លោកថាក់ស៊ីនដែលសព្វថ្ងៃ រស់នៅបរទេស ដើម្បីគេចខ្លួនឲ្យផុត ពីការផ្តន្ទាទោសកំបាំងមុខឲ្យជាប់គុគ២ឆ្នាំ ពីបទ គៃបន្លំប្រាក់ដោយតុលាការថៃ និងត្រូវបានរដ្ឋាភិបាលមុនជំនាន់លោកអាភីស៊ីត ដកហូតលិខិតឆ្លងដែនរបស់គាត់ នៅឆ្នាំ ២០០៩។
ទោះបីជាអវត្តមានដ៏យូរនៅក្នុងប្រទេសថៃក្តី លោកថាក់ស៊ីនស្ថិតនៅជាឥស្សរជន នយោបាយមួយរូប ដែលមានទាំងអ្នកស្រឡាញ់គាំទ្រច្រើនផងនិងក៏មានទាំងអ្នកស្អប់គាត់ខ្លាំងផងដែរ ក៏មិនតិចទេ នៅក្នុងប្រទេសថៃ។
ស្របតាមបណ្តាញសារព័ត៌មានក្នុងស្រុកកាលពីពាក់កណ្តាលខែវិច្ឆិកាកន្លងផុតទៅនេះ រដា្ឋភិបាលលោកស្រី យីងឡាក់ ដែលជាប្អូនស្រីពៅរបស់លោកថាក់ស៊ីន មានគម្រោងលុបចោល ការផ្តន្ទាទោសលោកថាក់ស៊ីន តាមរយៈក្រឹត្យលើកលែងទោសមួយ ដើម្បីអនុញ្ញាតឲ្យលោកថាក់ស៊ីនបានវិលត្រឡប់ចូលក្នុងប្រទេសវិញ។
ពាក្យចចាមអារ៉ាមនេះ បានជំរុញឲ្យបក្សប្រឆាំងមានកំហឹងជាខ្លាំង រីឯរដ្ឋាភិបាលលោកស្រីយីងឡាក់វិញ បន្ទាប់មកក៏បានបដិសេធ ការលើកលែងទោសនេះ។ ចំណែក លោកថាក់ស៊ីន ខ្លួនឯង ផ្ទាល់វិញ ក៏បានអះអាងដែរថា លោកនឹងវិលត្រឡប់ចូលមកប្រទេសជាតិវិញ លុះណាតែប្រទេសគាត់សំរេចបាន ការរួបរួមជាធ្លុងមួយ និងផ្សះផ្សា គ្នាឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ