នាយករដ្ឋមន្ត្រីកម្ពុជាទទួលលោកថាក់ស៊ីន និងមេដឹកនាំក្រុមអាវក្រហមថៃ
លោកថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃបានមកដល់ភ្នំពេញកាលពីវេលាយប់ថ្ងៃសុក្រម្សិលមិញក្នុងដំណើរទស្សនកិច្ចរយៈពេល៤ថ្ងៃនៅកម្ពុជា។ លោកថាក់ស៊ីនត្រូវបានទទួលបដិសណ្ឋារកិច្ចជាកិត្តិយសដោយលោកនាយករដ្ឋមន្ត្រីហ៊ុន សែននៅឯវិមានសន្តិភាព ទីស្តីការគណៈរដ្ឋមន្ត្រីនៅព្រឹកថ្ងៃសៅរ៍នេះ។ លោកនាយករដ្ឋមន្ត្រីកម្ពុជាក៏បានទទួលជួបមេដឹកនាំ និងសកម្មជនអាវក្រហមនៃគណបក្សភឿថៃផងដែរ។
ចុះផ្សាយនៅថ្ងៃ៖
ស្តាប់ - ០២:២២
ទោះបីជាមានការពន្យារពេល ប៉ុន្តែ ទីបំផុត លោកថាក់ស៊ីន បានមកដល់កម្ពុជាហើយកាលពីយប់ថ្ងៃសុក្រម្សិលមិញ។ អតីតនាយករដ្ឋមន្ត្រីថៃត្រូវបានទទួលបដិសណ្ឋារកិច្ចយ៉ាងកក់ក្តៅពីលោកនាយករដ្ឋមន្ត្រី ហ៊ុន សែន នៅឯទីស្តីការគណៈរដ្ឋមន្ត្រីក្រុងភ្នំពេញនៅព្រឹកថ្ងៃសៅរ៍នេះ។ ជំនួបបិទទ្វាររយៈពេល៣០នាទីរវាងលោកនាយករដ្ឋមន្ត្រី ហ៊ុន សែន និងលោកថាក់ស៊ីន បានធ្វើឡើងដោយមានវត្តមានរបស់លោក សុខ អាន រដ្ឋមន្ត្រីទីស្តីការគណៈរដ្ឋមន្ត្រី និងលោក ទៀ បាញ់ រដ្ឋមន្ត្រីក្រសួងការពារជាតិផងដែរ។ លោកអ៊ាង សុផល្លែត ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន បានប្រាប់អ្នកកាសែតនៅក្រោយជំនួបថា នាយករដ្ឋមន្ត្រីកម្ពុជា និងអតីតនាយករដ្ឋមន្ត្រីថៃបានសម្តែងការនឹករលឹកគ្នាក្នុងឋានៈជាមិត្តភ័ក្តិដែលបែកគ្នាយូរ។
លោកថាក់ស៊ីន អះអាងថា លោកមកកម្ពុជាពេលនេះគឺជាការឆ្លើយតបតាមការអញ្ជើញរបស់លោក ដឺវេណេឡា ប្រធានក្រុមគណបក្សប្រជាធិបតេយ្យនិយមកណ្តាល និងតបតាមការអញ្ជើញរបស់រាជបណ្ឌិត្យសភាកម្ពុជា។ លោកថាក់ស៊ីន នឹងថ្លែងសង្កថា ស្តីពីសតវត្សរ៍ថ្មី នៃបញ្ហាប្រឈម និងក្តីសង្ឃឹមផ្នែកសេដ្ឋកិច្ចអាស៊ី។ លោកថាក់ស៊ីនបានមកដល់កម្ពុជាមួយថ្ងៃបន្ទាប់ពីដំណើរទស្សនកិច្ចរបស់លោកស្រីយីងឡាក់ ស៊ីណាវ៉ាត្រា នាយករដ្ឋមន្ត្រីថៃ និងជាប្អូនស្រីរបស់លោក។ តាមកម្មវិធីដែលបានគ្រោងទុកលោកថាក់ស៊ីនត្រូវធ្វើបទឧទ្ទេសនាមបង្ហាញស្តីពីបញ្ហាសេដ្ឋកិច្ចដែលរៀបចំដោយរាជបណ្ឌិត្យសភាកម្ពុជា នៅក្រសួងសេដ្ឋកិច្ច និងហិរញ្ញវត្ថុនៅម៉ោង ៤ ល្ងាច ថ្ងៃទី១៧កញ្ញា ឆ្នាំ២០១១នេះ។ នៅព្រឹកថ្ងៃទី១៩កញ្ញាឆ្នាំ២០១១ លោកថាក់ស៊ីន ត្រូវចូលរួមជាវាគ្មិនសេដ្ឋកិច្ចនៅទីស្តីការគណៈរដ្ឋមន្ត្រីដែលរៀបចំដោយគណបក្សប្រជាធិបតេយ្យនិយមកណ្តាលទាក់ទងនឹងប្រធានបទ សេដ្ឋកិច្ចអាស៊ី មុននឹងលោកទទួលមេដាយពីប្រមុខរដ្ឋាភិបាលកម្ពុជាជាមួយឥស្សរជនអ្នកនយោបាយអាស៊ីជាច្រើនផ្សេងទៀត។
ក្រោយពីជួបជាមួយលោកថាក់ស៊ីននៅព្រឹកមិញ សម្តេចហ៊ុនសែនក៏បានទទួលជួបដាច់ដោយឡែកមួយទៀត ជាមួយនឹងក្រុមអាវក្រហមថៃជាង ២០នាក់ដឹកនាំដោយលោក ចាទូផន ព្រំផាន មេដឹកនាំក្រុមអាវក្រហម និងជាអ្នកតំណាងរាស្ត្រគណបក្សភឿថៃ។ ក្រុមអាវក្រហមថៃ ដែលជាអ្នកគាំទ្រដែលមានភក្តីភាពជាមួយលោកថាក់ស៊ីនបានមកដល់រាជធានីភ្នំពេញ និងបានជួបជាមួយលោកថាក់ស៊ីនកាលពីយប់ថ្ងៃទី១៦កញ្ញា ឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ