លោកពូទីននឹងត្រលប់មកគ្រប់គ្រងអំណាចនៅវិមានក្រេមឡាំង
ចុះផ្សាយនៅថ្ងៃ៖
ស្តាប់ - ០៦:៥៨
ប្រធានាធិបតី និងនាយករដ្ឋមន្រ្តីរុស្ស៊ី បានប្រកាសផ្លាស់ប្តូរតំណែងគ្នា សម្រាប់អាណត្តិបោះឆ្នោតលើកក្រោយ។ នៅក្នុងឳកាសមហាសន្និបាតគណបក្ស រៀបចំកាលពីថ្ងៃសៅរ៍ទី ២៤ កញ្ញា ក្នុងទីក្រុងម៉ូស្គូ ប្រធានាធិបតីរុស្ស៊ីលោកមេដវេឌេវបានសំណូមពរឲ្យគណបក្សរួបរួមរុស្ស៊ី បោះឆ្នោតជ្រើសរើសលោកពូទីន ដែលជានាយករដ្ឋមន្រ្តីបច្ចុប្បន្ន ឲ្យធ្វើជាបេក្ខជនប្រធានាធិបតីសម្រាប់ការបោះឆ្នោត នៅខែមីនា ឆ្នាំ ២០១២ខាងមុខ។ លោកពូទីនវិញប្រកាសថា បើលោកជាប់ឆ្នោតជាប្រធានាធិបតី នោះនាយករដ្ឋមន្រ្តីរបស់លោក គឺជាលោកមេដវេឌេវ។
គ្មានអ្វីភ្ញាក់ផ្អើល នាយករដ្ឋមន្រ្តី ពូទីន ដែលត្រូវគេចាត់ទុកជាបុរសខ្លាំង មានឥទ្ធិពល និងអំណាចគ្រប់គ្រងប្រព័ន្ធអ្នកនយោបាយរុស្ស៊ី ត្រូវបានប្រធានាធិបតីបច្ចុប្បន្ន លោកមេដវេឌេវជម្រុញឲ្យគណបក្សបោះឆ្នោតជ្រើសតាំងគាត់ជាបេក្ខជន ប្រធានាធិបតី។ លោកពូទីនធ្លាប់ធ្វើជាប្រធានាធិបតី រុស្ស៊ី ពីរអាណត្តិ ចាប់ពីឆ្នាំ ២០០០ ដល់ឆ្នាំ ២០០៨។ នៅឆ្នាំ ២០០០ លោកបានឈ្នះឆ្នោតជាប្រធានាធិបតី ក្រោយការចាកចេញរបស់ប្រធានាធិបតីចាស់ លោក Boris Yeltsin ដែលមានបញ្ហាសុខភាព។ តំណែងប្រធានាធិបតីរបស់គាត់ត្រូវផ្អាក ដោយសារតែរដ្ឋធម្មនុញ្ញ ហាមមិនឲ្យប្រធានាធិបតីកាន់អំណាចលើសពី ២អាណត្តិ។
ដោយហេតុផលនេះ ទើបបានជា នៅឆ្នាំ ២០០៨ លោកពូទីនបានរើស លោកមេដវេឌេវ ដែលកាលណោះជាអនុប្រធានាធិបតីរបស់គាត់ ឲ្យធ្វើជាបេក្ខជនប្រធានាធិបតី។ ក្រោយការបោះឆ្នោត ដែលមិនសូវមានគណបក្សប្រឆាំងចូលរួមច្រើន ដោយសារនយោបាយបង្រ្កាបរបស់លោកពូទីន លោកមេដវេឌេវក៏បានឡើងធ្វើជាប្រធានាធិបតី ហើយលោកពូទីនក៏បានក្លាយជានាយករដ្ឋមន្រ្តី។ ដោយពិតទៅ លោកពូទីនជ្រើសរើសយកមេដវេឌេវមកធ្វើជាប្រធានាធិបតីគឺគ្រាន់តែ ដើម្បីឆ្លងកាត់ឧបសគ្គមួយ កុំឲ្យគេចោទថា គាត់ធ្វើខុសរដ្ឋធម្មនុញ្ញកាន់អំណាចរហូតមក។
បច្ចុប្បន្ន បើទោះបីជាលោកមេដវេឌេវធ្វើជាប្រធានាធិបតីមែន ប៉ុន្តែ អំណាចពិតប្រាកដត្រូវគេមើលឃើញថា ស្ថិតនៅក្នុងកណ្តាប់ដៃរបស់លោកពូទីនដែលជានាយករដ្ឋមន្រ្តី ឯណោះទៅវិញទេ។
បញ្ចប់មន្ទិលសង្ស័យភ្នំមួយមានខ្លាពីរ
ការស្ទង់មតិកន្លងមក បង្ហាញថា លោកមេដវេឌេវមានប្រជាប្រិយភាពជាងលោកពូទីនក្នុងចំណោមប្រជាជនរុស្ស៊ី។ លោកមេដវេឌេវត្រូវគេមើលឃើញជាប្រធានាធិបតីដែលនាំមកនូវ ការផ្លាស់ប្តូរ នៅរុស្ស៊ី ដោយលោកបានចេញមុខប្រឆាំងនឹងអំពើអយុត្តិធម៌ និងពុករលួយ ដែលភាគច្រើនប្រព្រឹត្តដោយពួកមន្រ្តីស្និទ្ធនឹងលោកពូទីន។ ដូច្នេះ លោកមេដវេឌេវក៏ត្រូវពួកអ្នកស្និទ្ធនឹងលោកពូទីន មិនពេញចិត្ត និងរិះគន់ ដោយពួកគេចង់ឲ្យលោកពូទីនត្រលប់មកកាន់អំណាចប្រធានាធិបតីវិញឆាប់ៗ។
ប៉ះពាល់ដល់ផលប្រយោជន៍របស់ក្រុមមន្រ្តីរុស្ស៊ី ដែលកន្លងមកទទួលបានការការពារពីលោកពូទីន គឺដូចជាវាយប្រហារទៅលើលោកពូទីនដែរ។ មួយវិញទៀត គេឃើញថា លោកមេដវេឌេវហាក់មិនបានស្ថិតនៅក្រោមអំណាចរបស់លោកពូទីនដូចដែលគេបាន គិតស្មានពីមុនមកទេ ព្រោះ នៅប៉ុន្មានខែមកនេះ លោកមេដវេឌេវមិនបានសំចៃមាត់រិះគន់នយោបាយរបស់លោកពូទីន ដូចជាក្នុងរឿងប៉ះពាល់បរិស្ថានរុស្ស៊ីជាដើម។ បន្ទាប់មកគេឃើញលោកមេដវេឌេវហ៊ានដើរនយោបាយក្រៅប្រទេសផ្ទុយនឹងលោក ពូទីន ក្នុងសំណុំរឿងប្រទេសលីប៊ី។ លោកពូទីនជានាយករដ្ឋមន្រ្តីបានចេញមុខរិះគន់ និងប្រឆាំងមិនឲ្យមានអន្តរាគមន៍ទ័ពបរទេសនៅលីប៊ី ប៉ុន្តែ ប្រធានាធិបតីបែរជាស្ងាត់មាត់ មិនធ្វើវេតូ ជាហេតុធ្វើឲ្យក្រុមប្រឹក្សាសន្តិសុខអាចបោះឆ្នោតអនុម័តឲ្យមាន អន្តរាគមន៍ទ័ពនៅលីប៊ី។
ជំហរបញ្ច្រាសទិសគ្នានេះហើយដែលធ្វើឲ្យគេគិតស្មានថា លោកមេដវេឌេវចង់បះបោររើបម្រាសចេញពីកណ្តាប់ដៃគ្រប់គ្រងរបស់គ្រូពូទីន ដែលជាអ្នកធ្លាប់លើកតែងតាំងខ្លួនឲ្យបានក្លាយជាប្រធានាធិបតី។ ប៉ុន្តែ ជាក់ស្តែងទៅ លោកមេដវេឌេវមិនអាចធ្វើដូច្នេះបានទេ។ បើទោះជាគាត់មានប្រជាប្រិយភាពក្នុងចំណោមប្រជាជន ប៉ុន្តែ គាត់មិនអាចមានសំឡេងគាំទ្រច្រើនពីគណបក្ស ដូចជាលោកពូទីនដែលជាស្ថាបនិកនោះទេ។ ដូច្នេះជីវិតនយោបាយរបស់គាត់គឺបានត្រឹមតែដើរអបៗ តែមិនអាចវ៉ាប្រជែង ជាមួយលោកពូទីនបុរសខ្លាំងរបស់រុស្ស៊ីនោះទេ។
លោកពូទីន អតីតភ្នាក់ងារសម្ងាត់រុស្ស៊ី KGB តែងតែរិះគន់នយោបាយរបស់អាមេរិក ដូច្នេះ ចង់ នៅពេលរុស្ស៊ីផ្លាស់ប្តូរប្រធានាធិបតី គឺមានលោកពូទីនជាប្រធានាធិបតីនោះ ប្រាកដណាស់ដែលទំនាក់ទំនងល្អរវាងរុស្ស៊ី និងអាមេរិកក្នុងអាណត្តិលោកមេដវេឌេវនឹងត្រូវសើរើ ផ្លាស់ប្តូរឡើងវិញ។ ប៉ុន្តែ ចង់ មិនចង់ ពេលនេះ ប្រទេសលោកខាងលិចក៏ត្រូវសម្របខ្លួនដើម្បីអាចធ្វើ នយោបាយត្រូវគ្នាជាមួយរុស្ស៊ី ដែលមានបុរសខ្លាំងពូទីនត្រឡប់មកកាន់តំណែងប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ