កូរ៉េខាងត្បូងបោះឆ្នោតសភា ក្រោមការគំរាមកំហែងរបស់ព្យុងយ៉ាង
ចុះផ្សាយនៅថ្ងៃ៖
ស្តាប់ - ០៥:២៦
នៅថ្ងៃនេះ បណ្តាជនកូរ៉េខាងត្បូង ត្រូវអញ្ជើញឱ្យចូលរួមបោះឆ្នោតសភា។ បើតាមការស្ទង់មតិ គណបក្សអភិរក្សនិយមកំពុងកាន់អំណាច និងគណបក្ស ប្រឆាំង ប្រជាធិបតេយ្យ មានសំឡេងប្រដេញគ្នាយ៉ាងប្រកៀកប្រកិតបំផុត។ ជាមួយនឹងអប្រជាប្រិយភាពរបស់ប្រធានាធិបតី បក្សកាន់អំណាចកំពុងស្ថិតក្នុងស្ថានភាពមិនជាក់លាក់មួយ ព្រោះការបោះឆ្នោតប្រធានាធិបតីក៏នឹងខិតមកដល់ក្នុងពេលឆាប់ៗនេះដែរ។ម្យ៉ាងវិញទៀត ការបោះឆ្នោតសភាកូរ៉េខាងត្បូងនេះប្រព្រឹត្តទៅ ជួនចំពេលដែលសហគមន៍អន្តរជាតិ និងកូរ៉េខាងត្បូងខ្លួនឯងផ្ទាល់ កំពុងផ្តោតចក្ខុទៅកាន់កូរ៉េខាងជើង ព្រោះតែកូរ៉េខាងជើងកំពុងត្រៀមជាស្រេចនឹងបាញ់រ៉ុកកែតបង្ហោះផ្កាយរណប នៅរវាងថ្ងៃទី១២-១៤មេសា ឆ្នាំ២០១២ ប៉ុន្តែគ្រប់គ្នាយល់ថាជាលេសបិទបាំងការបាញ់សាកល្បងកាំជ្រួចមីស្ស៊ីសអន្តរទ្វីប។
ការបោះឆ្នោតសភាកូរ៉េខាងត្បូងប្រព្រឹត្តទៅរាល់បួនឆ្នាំម្តង ! សភាកូរ៉េខាងត្បូងមានអាសនៈ សរុប ៣០០ ប៉ុន្តែមានតែសមាជិកសភាតែ ២៤៦ប៉ុណ្ណោះ ដែលជ្រើសតាំងដោយផ្ទាល់ ដោយសំឡេងឆ្នោតរបស់ពលរដ្ឋកូរ៉េទាំងជាង៤០លាននាក់។ ៦៤ អាសនៈ ដែលនៅសល់ នឹងត្រូវធ្វើការតែងតាំងតាមបែបសមមាត្រ។ អត្រាអ្នកចូលរួមបោះឆ្នោតមានប្រមាណតែ៥៣,៧% ប៉ុណ្ណោះ ! ជាចំនួនតិចមែន តែច្រើនជាងសម័យបោះឆ្នោតសភាលើកមុនៗ ! នេះទំនងជាមកពីមានចលនាយុវជនយុវនារីចូលរួមច្រើន។ លទ្ធផល ជាផ្លូវការនឹងត្រូវប្រកាសនៅអាធ្រាត្រយប់ថ្ងៃទី ១១ មេសា ២០១២នេះ។
នេះជាលើកទីមួយហើយ គិតក្នុងរយៈពេល២០ឆ្នាំចុងក្រោយនេះ ដែលការបោះឆ្នោតសភាប្រព្រឹត្តទៅក្នុងឆ្នាំតែមួយនៃការបោះឆ្នោត ជ្រើសរើសប្រធានាធិបតី។ ដូច្នេះ ការបោះឆ្នោតសភាលើកនេះ ជាតេស្តស្ទាបស្ទង់ជំហររបស់មតិសាធារណៈ។ ជ័យជម្នះថ្ងៃនេះជាពង្រឹងបេក្ខភាពប្រធានាធិបតីរបស់បក្សនោះ ៖ លោកស្រី Park Geun-hye ជាបេក្ខនារីប្រធានាធិបតីបក្សព្រំដែនថ្មី និង លោក Moon Jae-in បេក្ខជនប្រធានាធិបតីបក្សប្រជាធិបតេយ្យរួម។
ម្យ៉ាងទៀត ការបោះឆ្នោតសភានេះ ប្រព្រឹត្តទៅជួនចំពេលដែលសម្ពាធតានតឹង ក្នុងឧបទ្វីប និង ការគំរាមកំហែងសន្តិសុខបានកើនឡើងខ្លាំង ព្រោះតែកូរ៉េខាងជើងបានត្រៀមលក្ខណៈគ្រប់គ្រាន់ហើយ រង់ចាំតែដល់ម៉ោងចុចបាញ់បង្ហោះកាំជ្រួចរបស់ខ្លួនតាមបញ្ជា ថ្នាក់ដឹកនាំប៉ុណ្ណោះ ! ទោះបីជាមានគំនាបពីសហគមន៍អន្តរជាតិយ៉ាងណា ក៏ព្យុងយ៉ាងមិនប្តូរផ្លាស់ជំហរ និងគម្រោងបាញ់បង្ហោះផ្កាយរណបរបស់ខ្លួនដែរ !
ថ្វីដ្បិតតែសន្តិសុខជាតិនេះ ជាបញ្ហាសំខាន់ ! រដ្ឋាភិបាលក្រុងសេអ៊ូលបានថែមទាំងចាត់ទុកការបាញ់រ៉ុកកែតរបស់ កូរ៉េខាងជើង គ្រោងធ្វើនៅរវាងពីថ្ងៃទី ១២ -១៦មេសា ជាការប្រុងប្រៀបរៀបចំបាញ់សាកល្បងនុយក្លេអ៊ែរជាលើកទីបី សំណុំរឿងនុយក្លេអ៊ែរកូរ៉េខាងជើងនេះ បានក្លាយជាប្រធានបទដ៏សំខាន់មួយនៃការឃោសនាបោះឆ្នោត។ បណ្តាជនកូរ៉េខាងត្បូង ខ្វល់ខ្វាយខ្លាំង ក៏ពិតមែន ក៏ប៉ុន្តែ បញ្ហាសេដ្ឋកិច្ចជាតិនៅតែជាអាទិភាពចម្បងបំផុត គ្របដណ្តាប់លើអ្វីៗទាំងអស់ រហូតអាចនិយាយបានថា ទំនាក់ទំនងអន្តរជាតិ និងសន្តិសុខជាតិ មានឥទ្ធិពលតិចតួចណាស់ ក្នុងការបោះឆ្នោតលើកនេះ។
បើតាមអ្នកវិភាគ ចំណោទក្នុងស្រុក មានជាអាទិ៍គម្លាតរវាងអ្នកក្រនិងអ្នកមាន អតិផរណា ទៅវិញទេ ដែលម្ចាស់ឆ្នោតកំពុងត្រូវការ និងរង់ចាំដំណោះស្រាយ។ ការបោះឆ្នោតនេះមានតម្លៃស្មើនឹងប្រជាមតិ អារកាត់ការគ្រប់គ្រងរបស់លោក លី ម្យ៉ុងបាក់ ដែលគេយល់ថាធូររលុងជាមួយក្រុមហ៊ុនធំៗ តែតឹងតែងជ្រុលជាមួយនឹងកូរ៉េខាងជើង។ គណបក្សប្រឆាំងបានទទួលការគាំទ្រខ្លាំងពីយុវជន ព្រោះបានសន្យាធ្វើការរុះរើឡើងវិញ កិច្ចព្រមព្រៀងផ្តោះប្តូរសេរីជាមួយអាមេរិក ដែលបណ្តាជនកូរ៉េខាងត្បូងភាគច្រើនយល់ថាគ្មានសមភាព តែជាការបំផ្លាញទីផ្សារការងារក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ