រដ្ឋមន្រ្តីការបរទេសបារំាងចេញមុខរិះគន់ ទិតៀនរបបស៊ីរី
លោករដ្ឋមន្រ្តីក្រសួងការបទេសបារំាង Lauent Fabius ទើបបានបិទបញ្ចប់ទស្សនកិច្ចរយៈពេល ៣ថ្ងៃនៅក្នុងប្រទេសជិតខាងប្រទេសស៊ីរី។ គឺជាទស្សនកិច្ចការទូតមួយដែលបានធ្វើឡើង ចំពេលដែលវិបត្តិនៅស៊ីរីកាន់តែធ្លាក់ដុនដាប និងចំពេលដែលសហគមន៍អន្តរជាតិនៅមិនទាន់អាចនិយាយចុះសម្រុងគ្នា។ ថ្លែងនៅក្នុងសន្និសីទកាសែតក្នុងទីក្រុង Ankara ប្រទេសតួកគី លោក Larent Fabius មិនញញើតនឹងទិតៀនរបបស៊ីរីរបស់លោក Bachar el-Assad។
ចុះផ្សាយនៅថ្ងៃ៖
ស្តាប់ - ០១:៣១
« លោក Bachar el-Assad មិនសក្តិសមនឹងស្ថិតនៅលើទឹកដីស៊ីរីទៀតឡើយ » នេះជាការថ្លែងរបស់លោករដ្ឋមន្រ្តីការបរទេសបារំាង Laurent Fabius នៅក្នុងជំរំជនភៀសខ្លួនស៊ីរីក្នុងទឹកដីតួកគីកាលពីថ្ងៃសុក្រ ទី១៧ សីហាម្សិលមិញ។ ការថ្លែងរបៀបនេះពិតជារឿងមួយដែលគេមិនធ្លាប់លឺចេញពីមាត់របស់ប្រមុខការទូតបារំាងពាក់ព័ន្ធនឹងវិបត្តិនៅក្នុងប្រទេសស៊ីរីទេ។
ក្នុងដំណើរទស្សនកិច្ចរយៈពេល ៣ថ្ងៃនៅក្នុងប្រទេសជិតខាងប្រទេសស៊ីរី លោក Laurent Fabius ត្រូវបានប្រជាជនស៊ីរីដែលរត់ភាសខ្លួនចេញពីប្រទេសស្រែកហៅឲ្យជួយ។ « យើងមិនត្រូវការជំនួយមនុស្សធម៌ទេ តែយើងត្រូវការគញរឿងសព្វាវុធដើម្បីបញ្ចប់របបដឹកនំាដោយ Assad »។ នៅត្រង់ចំណុចនេះ លោកប្រមុខការទូតបារំាងបានបញ្ជាក់យ៉ាងម៉ឹងម៉ាត់ថា ពាក់ព័ន្ធនឹងយោធា គឺជារឿងផ្ទៃក្នុងរបស់ប្រជាជនស៊ីរី។ ប្រទេសបារំាងនឹងធ្វើអន្តរាគមន៍យោធាតែនៅក្នុងក្របខ័ណ្ឌនៃក្រុមប្រឹក្សាសន្តិសុខអង្គការសហប្រជាជាតិប៉ុណ្ណោះ។
ថ្លែងកាលពីថ្ងៃពុធ ទី១៥ សីហា នៅក្នុងប្រទេស Jordanie លោក Laurent Fabius បានប្រមើលមើលទុកជាមុនថា អាចមានឥស្សរជនថ្មីៗទៀតនៅក្នុងរបបស៊ីរីបច្ចុប្បន្ននឹងធ្វើការផ្តាច់ខ្លួនចេញពីលោក Assad។ ក្រៅពីការចេញមុខទិតៀនលោកប្រធានាធិបតីស៊ីរី Assad លោក Laurent Fabius ក៏បានអំពាវនាវក្រុមអ្នកប្រឆំាងឲ្យបង្កើតនូវរដ្ឋាភិបាលអន្តរកាលមួយឆាប់រហ័សនាពេលខាងមុខ។ លោកប្រមុខការទូតបារំាងបានសន្យាថា នៅពេលបង្កើតបានហើយ ក្រុមប្រទេសលោកខាងលិចនឹងត្រូវទទួលស្គាល់រដ្ឋាភិបាលអន្តរកាលនោះដោយចៀសមិនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ