ស៊ីរី៖រដ្ឋអំណាចបន្តកាប់សម្លាប់ ការទូតអន្តរជាតិបន្តរាំងស្ទៈ
នៅថ្ងៃពុធទី១៥សីហានេះ អង្គការសហប្រតិបត្តិការអ៊ីស្លាមអាចនឹងព្យួរសមាជិកភាពរបស់ប្រទេសស៊ីរី។ រីឯរដ្ឋមន្ត្រីក្រសួងការបរទេសបារាំងផ្តើមបំពេញទស្សកិច្ចនៅក្នុងបណ្តាប្រទេសជិតខាងស៊ីរី ដើម្បីបង្កើនការគាបសង្កត់ទៅលើរបបលោកបាស្ហា អាល់អាសាដ។ ទន្ទឹមនេះ គេរង់ចាំការចេញផ្សាយជាសាធារណៈនៃរបាយការណ៍របស់គណៈកម្មការស៊ើបអង្កេតឯករាជ្យមួយស្តីពីសិទ្ធិមនុស្សនៅស៊ីរី នៅក្រុមប្រឹក្សាសិទ្ធិមនុស្សរបស់អង្គការសហប្រជាជាតិក្នុងប្រទេសស្វីស។
ចុះផ្សាយនៅថ្ងៃ៖
ស្តាប់ - ០១:៥១
១៧ខែក្រោយពីមានការបះបោរប្រឆាំងនឹងរបបរបស់ខ្លួន លោកបាស្ហា អាល់អាសាដ ត្រូវប្រឈមមុខនឹងការគាបសង្កត់មួយថ្មី នោះគឺការដកប្រទេសស៊ីរីចេញពីអង្គការសហប្រតិបត្តិការអ៊ីស្លាម ហៅកាត់ថា0CI។ បណ្តាប្រទេសសមាជិកOCI ដែលកំពុងបន្តរួមប្រជុំគ្នានៅប្រទេសអារ៉ាប៊ី សាអ៊ូឌីត(Arabie Saoudite) នឹងត្រូវធ្វើការសម្រេចចិត្ត នៅថ្ងៃពុធទី១៥សីហានេះ។
នៅថ្ងៃនេះដែរ លោករដ្ឋមន្ត្រីក្រសួងការបរទេសបារាំង ឡូរ៉ង់ ហ្វាប៊្យូស(Laurent Fabius) បានផ្តើមបំពេញទស្សនកិច្ចនៅប្រទេសហ្សូរដានី(Jordanie) រួចហើយលីបង់(Lyban) និងតួរគី(Turquie) ដែលជាបណ្តាប្រទេសមានព្រំដែនជាប់នឹងប្រទេសស៊ីរី។ ប៉ុន្តែ ទោះជាយ៉ាងណាក៏ដោយ ទស្សនកិច្ចរបស់ប្រមុខការទូតបារាំងនៅក្នុងតំបន់ នឹងមិននាំមកនូវលទ្ធផលអ្វីជាដុំកំភួនទេ។ ការទូតអន្តរជាតិទាំងមូលត្រូវរាំងស្ទះ ដោយហេតុតែនៅអង្គការសហប្រជាជាតិ រុស្ស៊ីនិងចិនបន្តប្រើសិទ្ធិវេតូដើម្បីខ្ទប់មិនឱ្យមានសេចក្តីសម្រេចចិត្តណាមួយដែលប្រឆាំងនឹងរបបរបស់លោកបាស្ហា អាល់អាសាដ។
ដោយឡែកនៅថ្ងៃនេះដែរ អតីតអ្នកការទូតស៊ីរីទទួលបន្ទុកកិច្ចការសិទ្ធិមនុស្សរបស់អង្គការសហប្រជាជាតិនៅប្រទេសស្វីស(Suisse) ដែលបានរត់ចោលជួររដ្ឋាភិបាលរបស់លោកអាសាដកាលពីសប្តាហ៍មុន បានចោទកងកម្លាំងសន្តិសុខរបស់ស៊ីរីថា បាននិងកំពុងបន្តប្រព្រឹត្តទារុណកម្ម។
នៅថ្ងៃនេះដែរ របាយការណ៍នៃគណៈកម្មការស៊ើបអង្កេតឯករាជ្យមួយស្តីពីសិទ្ធិមនុស្សនៅប្រទេសស៊ីរីត្រូវចេញផ្សាយនៅក្រុមប្រឹក្សាសិទ្ធិមនុស្សរបស់អង្គការសហប្រជាជាតិក្នុងប្រទេសស្វីស។ គឺជាលទ្ធផលនៃការអង្កេតមួយដែលធ្វើឡើងពីខែកុម្ភៈដល់ខែកក្កដា២០១២។
នៅលើសមរភូមិឯណោះវិញ ការប្រយុទ្ធគ្នានៅតែបន្ត រវាងកងទ័ពស៊ីរីនិងកងកម្លាំងរបស់អ្នកបះបោរ។ ជាលើកទីមួយបង្អស់ ពួកបះបោរបានអះអាងថា ពួកគេបានបាញ់ទម្លាក់យន្តហោះប្រដេញMigមួយគ្រឿងរបស់កងទ័ពស៊ីរី។ ប៉ុន្តែនៅខាងរដ្ឋអំណាចវិញ គេអះអាងថា យន្តហោះចម្បាំងមួយនេះបានធ្លាក់ ដោយហេតុតែមានបញ្ហាបច្ចេកទេស។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ