ជប៉ុនប្តូរយុទ្ធសាស្រ្តការពារប្រទេសពីភាគខាងជើងមកខាងត្បូងវិញ
រដ្ឋាភិបាលជប៉ុនបានអនុម័ត នៅថ្ងៃសុក្រនេះ យុទ្ធសាស្រ្តការពារប្រទេសថ្មីរបស់ខ្លួន សម្រាប់រយៈពេល ១០ឆ្នាំខាងមុខនេះ ដោយបានផ្លាស់ប្តូរយុទ្ធសាស្រ្តលែងសូវការពារផ្នែកជើង តែបែរជាមកពង្រឹងទ័ពនៅខាងត្បូងប្រទេស។ បើតាមឯកសាររបស់រដ្ឋាភិបាលជប៉ុនដែលមានចំណងជើងថា ទិសដៅស្តីពីកម្មវធីការពារជាតិ ការផ្លាស់ប្តូរយុទ្ធសាស្រ្តកងទ័ពនេះធើ្វឡើងដោយសារ ជប៉ុនបានមើលឃើញពីសក្តានុពលផ្នែកទ័ពរបស់ចិន និងការគំរាមកំហែងអាវុធនុយក្លេអ៊ែររបស់កូរ៉េខាងជើង
ចុះផ្សាយនៅថ្ងៃ៖
បទអត្ថាធិប្បាយរបស់ឈាង បុប្ផា
ក្រោយពីសង្រ្គាមត្រជាក់បានផុតរលត់ទៅ ជប៉ុនបានពង្រាយទ័ពរបស់ខ្លួននៅផ្នែកខាងជើងប្រទេស គឺនៅលើកោះHokkaido ដើម្បីទប់ទល់នឹងការឈ្លានពានណាមួយពីសំណាក់សហភាពសូវៀត និងក្រោយមកក្លាយជារុស្ស៊ី។ ប៉ុន្តែ ជប៉ុន ពេលនេះ បានមើលឃើញថា ការគំរាមកំហែងមកលើសន្តិសុខរបស់ជប៉ុន មិនមែនមកពីខាងជើងទេ ប៉ុន្តែមកពីខាងត្បូងជប៉ុនទៅវិញ នោះ គឺ ពីចិន និងកូរ៉េខាងជើង។
ការបង្កើនសក្តានុពលទ័ពចិន និងការផលិតអាវុធនុយក្លេអ៊ែររបស់កូរ៉េខាងជើងដែលកំពុងធ្វើឲ្យជប៉ុនឈឺក្បាល និងធ្វើការប្រយ័ត្នប្រយែងខ្ពស់។ ក្នុងរយៈពេលប៉ុន្មានឆ្នាំចុងក្រោយនេះ ជប៉ុននៅតែមានបារម្ភជាប់ជានិច្ច នៅពេលឃើញចិនកាន់តែពង្រឹង និងអភិវឌ្ឍផ្នែកទ័ពកាន់តែទំនើបៗ។ ជប៉ុនបានមើលឃើញចិនតែបង្កើនថវិកាសម្រាប់វិស័យការពាររបស់ខ្លួន (ចិនចំណាយលុយ១០០ពាន់លានដុល្លារ សម្រាប់វិស័យការពារជាតិឆ្នាំ ២០១០)។
មួយវិញទៀត ជប៉ុនកាន់តែព្រួយចិត្តថែមទៀតដែលបានសម្គាល់ឃើញចិនចេះតែពង្រីកឥទ្ធិពលរបស់ខ្លួន ចេះតែបង្កើនការល្បាតទ័ព នៅក្នុងតំបន់សមុទ្រលឿង ជាពិសេសគឺនៅម្តុំប្រជុំកោះSenkaku ដែលជប៉ុន និងចិនទាមទារ តវ៉ាយកទៅគ្រប់គ្រងរៀងៗខ្លួន។ គួររំលឹកថា វិបត្តិការទូតចិន និងជប៉ុនកាន់តែធ្លាក់ធ្ងន់ធ្ងរក្នុងឆ្នាំ នេះ គឺក្រោយពីជប៉ុនបានចាប់ឃាត់ទុកអ្នកបើកទូកនេសាទចិន ដែលចិនបានចាត់ទុកថា គឺជារំលោភច្បាប់មួយយ៉ាងធ្ងន់ធ្ងរ។
លើកនេះ ជប៉ុនបានផ្លាស់ប្តូរយុទ្ធសាស្រ្តការពារដ៏សំខាន់របស់ខ្លួន ដើម្បីទប់ទល់នឹងឥទ្ធិពលរបស់ចិនផង និងដើម្បីការពារពីការវាយប្រហារណាមួយពីខាងកូរ៉េខាងជើងផង។ សម្រាប់ជប៉ុន ការបាញ់សាកល្បង អាវុធនុយក្លេអ៊ែរកន្លងមករបស់ទីក្រុងព្យុងយ៉ាង និងការបន្តចម្រើនធាតុអ៊ុយរ៉ានីញ៉ូមដើម្បីផលិតអាវុធនុយក្លេអ៊ែររបស់ប្រទេសកម្មុយនិស្តនេះ គឺកំពុងតែគំរាមកំហែងដល់សន្តិសុខ និងសន្តិភាពរបស់ជប៉ុន និងប្រទេសក្នុងតំបន់។ ហើយបើតាមឯកសារដែលចែកចាយដោយរដ្ឋាភិបាលជប៉ុនព្រឹកថ្ងៃសុក្រទី ១៦ធ្នូនេះ ជប៉ុនបានចាត់ទុកកូរ៉េខាងជើងថាជា ”សត្រូវ”របស់ខ្លួន។
ក្នុងយុទ្ធសាស្រ្តថ្មីនេះ ជប៉ុននឹងកាត់បន្ថយកម្លាំងជើងគោក តែមកពង្រឹងផ្នែកជើងទឹក និងទ័ពអាកាសវិញ។ ក្រសួងការពារជាតិជប៉ុននឹងបន្ថែមនាវាមុជទឹកពី១៦ ទៅ ២២គ្រឿង និងអភិវឌ្ឍយន្តហោះប្រដេញរបស់ខ្លួនឲ្យកាន់តែមានកម្លាំងខ្លាំង។ ហើយនៅចំពោះមុខនៃការគំរាមកំហែងបាញ់ជាញយដង អាវុធនុយក្លេអ៊ែរ ពីខាងកូរ៉េខាងជើង ជប៉ុននឹងបង្កើនទ្វេដង ចំនួននាវាចម្បាំង និងយន្តហោះចម្បាំងដែលមានបំពាក់ដោយគ្រាប់មីស៊ីលជាខែល ប្រឆាំងនឹងគ្រាប់មីស៊ីល។
នៅក្នុងការពង្រឹងផ្នែកការពារនៅ ខាងត្បូងនេះ ជប៉ុន ដែលស្ថិតក្នុងសមុទ្រលឿង ជប៉ុនក៏គ្រោងនឹងធ្វើការសហការជាមួយសម្ព័ន្ធមិត្តរបស់ខ្លួន ដូចជាអាមេរិក កូរ៉េខាងត្បូង អូស្ត្រាលី និងឥណ្ឌា។ ទ័ពរបស់ជប៉ុននឹងត្រូវដាក់ពង្រាយជិតកោះOkinawa ដែលមានមូលដ្ឋានទ័ពអាមេរិកាំង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ