ការដាក់ពង្រាយកាំជ្រួចមីស្ស៊ីលកូរ៉េខាងជើងនៅជិតព្រំដែនកូរ៉េខាងត្បូង
កូរ៉េខាងជើងបានដាក់ពង្រាយកាំជ្រួចmissiles sol-air បាញ់បានឆ្ងាយគឺបាញ់ពីដីសំដៅទៅអាកាស នៅជិតព្រំដែនកូរ៉េខាងត្បូងស្របតាមព័ត៌មានផ្តល់ដោយកាសែតកូរ៉េខាងត្បូង Chosun Ilbo ចេញផ្សាយនៅថ្ងៃពុធ៤សីហានេះ ដោយយោងទៅលើប្រភពព័ត៌មានយោធាកូរ៉េខាងត្បូង។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
ស្របតាមប្រភពព័ត៌មានយោធាកូរ៉េខាងត្បូងដែលត្រូវបានទិនានុប្បវត្តិ Chosun Ilbo យកមកចុះផ្សាយ នៅថ្ងៃពុធ៤សីហានេះ កាំជ្រួចmissiles SA-5 ជាច្រើនដើម ត្រូវបានលើកពីខែត្រ Hwanghae នៅប៉ែកនិរតីប្រទេស កាលពីខែមីនា បន្ទាប់ពីការលិចនាវាចម្បាំងកូរ៉េខាងត្បូងយកមកដាក់នៅជិតព្រំដែនកូរ៉េខាងត្បូងវិញ ដើម្បីរារាំងកុំឱ្យយន្តហោះកូរ៉េខាងត្បូងអាចហោះទៅវាយសំពងលើទីដៅជាយុទ្ធសាស្ត្រនៃកូរ៉េខាងជើង។ប៉ុន្តែអ្នកនាំពាក្យម្នាក់នៃកងទ័ពកូរ៉េខាងត្បូងបានបដិសេធពុំព្រមធ្វើអត្ថាធិប្បាយអំពីព័ត៌មានទាំងនេះទេ។
កងទ័ពកូរ៉េខាងជើងបានទិញកាំជ្រួចmissiles SA-5 បាញ់បានចម្ងាយ ២៥០គីឡូម៉ែត្រចំនួន៣៥០ដើមនិងរានសំរាប់បាញ់កាំជ្រួចមីស្ស៊ីលចំនួន២០ ពីសហភាពសូវៀត នៅចុងទសវត្សឆ្នាំ១៩៨០។
ម្យ៉ាងទៀត កូរ៉េខាងត្បូងនៅថ្ងៃពុធ៤សីហានេះដែរ បានព្រមានប្រាប់ថា ខ្លួននឹងពុំអត់ឱនឱ្យចំពោះ “ ការបង្ករឿងហេតុអ្វីណាមួយឡើយ “ មុនពេលសមយុទ្ធថ្មីរបស់ខ្លួន នៅសមុទ្រលឿង បន្ទាប់ពីព្យុងយ៉ាងបានគំរាមថានឹងឆ្លើយតប-តវិញចំពោះល្បែងសង្គ្រាមនេះ។
សមយុទ្ធកូរ៉េខាងត្បូងនឹងចាប់ផ្តើមនៅថ្ងៃព្រហស្បតិ៍ស្អែកសំរាប់រយៈពេលប្រាំថ្ងៃហើយនិងត្រូវឩទ្ទិសចំពោះកិច្ចការពារប្រឆាំងនឹងនាវាមុជទឹក ៤ខែបន្ទាប់ពីព្យុងយ៉ាងបានបាញ់គ្រាប់បែកបុកកម្ទេចកប៉ាល់ចម្បាំងកូរ៉េខាងត្បូងមួយគ្រឿងមក។
កូរ៉េខាងជើង នៅថ្ងៃអង្គារម្សិលមិញ បានចាត់ទុកសមយុទ្ធនេះថាជា “ ការលុកលុយមួយដោយចំពោះ “ ដោយគំរាមថានឹង “ធ្វើការឆ្លើយតបតវិញយ៉ាងខ្លាំង“។
របបកុម្មុយនិស្តកូរ៉េខាងជើងដែលគាំទ្រដោយរដ្ឋការប៉េកាំងបានបដិសេធជានិច្ចថា ខ្លួនពុំបានបាញ់ពន្លិចនាវាចម្បាំងកូរ៉េខាងត្បូងទេ។
សហរដ្ឋអាមេរិកនិងកូរ៉េខាងត្បូង កាលពីចុងខែកក្កដាមុននេះ បានធ្វើសមយុទ្ធរួមគ្នាដ៏សំខាន់បំផុត ដើម្បីព្រមានប្រាប់កូរ៉េខាងជើងឱ្យដឹងខ្លួនជាមុន។
ប្រទេសចិនជាសម្ព័ន្ធមិត្តជិតដិតរបស់ព្យុងយ៉ាងបានប្រឆាំងនឹងសមយុទ្ធនេះ ហើយក៏ពុំព្រមរួមចំណែកជាមួយសហគមន៍អន្តរជាតិក្នុងការថ្កោលទោសព្យុងយ៉ាងក្នុងរឿងបាញ់ពន្លិចនាវាចម្បាំងកូរ៉េខាងត្បូងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ